Vinsæl biblíuvers úr Eseia 60

“Cod! Disgleiria! Mae dy olau wedi dod. Mae ysblander yr ARGLWYDD wedi gwawrio arnat!

Bydd cenhedloedd yn dod at dy oleuni, a brenhinoedd yn troi at dy wawr ddisglair.

Er bod tywyllwch yn gorchuddio’r ddaear a thywyllwch dudew dros y gwledydd, bydd yr ARGLWYDD yn tywynnu arnat ti, a bydd ei ysblander i’w weld arnat.

Bydd yr un fechan yn troi yn llwyth, a’r lleiaf yn troi’n genedl fawr. Fi ydy’r ARGLWYDD! Pan ddaw’r amser iawn bydda i’n gwneud hyn ar frys!”

Fydd dim angen yr haul i oleuo’r dydd, na llewyrch y lleuad yn olau yn y nos. Yr ARGLWYDD fydd dy olau di am byth, a bydd ysblander dy Dduw yn disgleirio arnat.

Fydd dy haul ddim yn machlud byth mwy, a llewyrch y lleuad ddim yn cilio; yr ARGLWYDD fydd dy olau di am byth, a bydd dy gyfnod o alaru drosodd.

Pan weli hyn byddi’n wên i gyd; bydd dy galon yn curo wrth brofi’r wefr. Bydd cyfoeth y moroedd yn cael ei roi i ti, a chyfoeth y gwledydd yn dod atat.

Edrych o dy gwmpas! Maen nhw i gyd yn ymgasglu! Maen nhw’n dod atat ti! Bydd dy feibion yn dod o wledydd pell, a dy ferched yn cael eu cario adre.

Bydd dy bobl i gyd yn gyfiawn, ac yn etifeddu’r tir am byth. Nhw ydy’r blagur dw i wedi’i blannu, gwaith fy llaw sy’n fy anrhydeddu.

Fydd neb yn gweiddi ‘Trais!’ yn y wlad byth eto, a fydd dim dinistr o fewn dy ffiniau. Byddi’n galw dy waliau yn ‘Achubiaeth’ a dy giatiau yn ‘Foliant’.

Bydd dy giatiau ar agor drwy’r amser; fyddan nhw ddim yn cael eu cau ddydd na nos – er mwyn i gyfoeth y cenhedloedd a’u brenhinoedd gael ei gario i mewn.

Bydd gyrroedd o gamelod yn llenwi dy strydoedd, camelod o Midian, Effa a Sheba. Byddan nhw’n cario aur a thus, ac yn canu mawl i’r ARGLWYDD.

Bydd estroniaid yn ailadeiladu dy waliau, a’u brenhinoedd nhw yn dy wasanaethu di. Achos, er fy mod wedi dy daro di pan oeddwn i’n ddig, dw i am ddangos tosturi a bod yn garedig.

Yn lle bod wedi dy wrthod, a dy gasáu, a neb yn mynd drwot ti, bydda i’n dy wneud di’n destun balchder am byth – yn llawenydd o un genhedlaeth i’r llall.

Byddi’n yfed o laeth y cenhedloedd, ac yn sugno bronnau brenhinoedd. Wedyn byddi di’n gwybod mai fi ydy’r ARGLWYDD sy’n dy achub, Ie, fi, Un Cryf Jacob, sy’n dy ollwng di’n rhydd.