Popular Bible Verses from أيث-روما 12

Deildu

وَار تݣّم شَا مِين تݣّن يِوْذَان ذِي ڒْوقْث-أَ ثَانِيتَا. ئِتْخصَّا اَغَارْوم يِيڒِي يجّن ن ڒَعْقڒ ذ جْذِيذ حمَا اَذ تْوَابدّْڒم، سّنِّي اَذ تسّْنم كنِّيو مِين يخس أَربِّـي، يعْنِي مِين يصبْحَان ذ مِين ذَاس يتعْجِيبن وَار ذَايس بُو وخطِّي.

إِذن فَا آي اَيثْمَا، س اَرَّاحْمث ن أَربِّـي تْشجَّاعغ-كنِّيو اَذ تْقدّْمم يخف نْوم إِ أَربِّـي اَمشْنَاو يجّن ن دْبِيحث ثدَّر، ذ ثَمْقدّسْت، أَخَاس يَارْضَا نتَّا. مَانَايَا ذ لْوَاجِب ن لْعِبَادَا خَاوم.

فَرْحث ذِي لْأَمَال. صْبَارث خ تَمَارَا. دَاوّْمث خ ثْࢲَادْجِيث.

وَار تجَّا شَا شَّرّْ اَش يغْڒب، ذ شك إِي غَا يغڒْبن شَّرّْ س ڒْخِير.

خْسث اَيَاوْيَا اَم ثَاوْمَات. وقَّارث اَيَاوْيَا كْتَار زِي جّْهذ.

ڒمْحِبّث يتْخصَّا اَذ تِيڒِي بْڒَا نِّفَاق. عِيفّث مِين يدْجَان ذ شَّرّْ، طّْفث ذِي مِين يدْجَان ذ ڒْخِير.

عْلَاحْسَاب كنِّيو، مڒَا مُمْكن ݣّث اَذ تِيڒِيم ذِي ڒهْنَا اَك يِوْذَان مَارَّا.

آي يمْعِيزّن ينُو، وَار تنْتَاقَامم زِي حَدّ، لْعِقَاب جّم-ث إ أَربِّـي. أَقَا لْكِتَاب يقَّار: <ذ نش إِݣ يتنْتَاقَامن، ذ نش إِݣ يتْخدْجَاسن، ئِقَّار-يت سِيذِي أَربِّـي.>

حَوْڒث وَار تعْݣِيزم شَا. خذْمث إِ سِيذِي أَربِّـي س وُوْڒ ذ اَرُّوْح.

فَا س لْبَرَكَا إِي ذَايِي يُوْشَا أَربِّـي قَّارغ إِ مْكُڒ يجّن زَّايْوم: وَار حسّب شَا يخف نّش كْتَار زِي مِين ثعْنِيذ. شك فكَّر س ڒَعْقڒ نّش عْلَاحْسَاب مشْحَاڒ ن لإِيمَان إِي ذَاش يُوْشَا أَربِّـي.

وَار تَارَّام شَا شَّرّْ س شَّرّْ. أَرّم-د ڒْبَڒ نْوم بَاش اَذ تحْتَرْمم مَارَّا يوْذَان ذِي مِين تݣّم.

عِيشث اَݣ وَايَاوْيَا ذِي ڒهْنَا. وَار سمْغَارث شَا يخف نْوم، مْعَشَارث اَݣ يپُـوْبْرِيثن. وَار تَارَّاث شَا يخف نْوم ذ يمِيغِيسن.

لْعَكْس: ڒَعْذُو نّش مڒَا يدْجُوْز، ؤُش-اَس اَذ يشّ. مڒَا يفُّوْذ، ؤُش-اَس اَذ يسو. أُو مَايمِّي؟ مڒَا ثݣِّيذ-اَس اَمُّو، أَخْمِي ثْسرْغذ-اَس ڒفْحَم خ وزدْجِيف نّس.

بَرْكث إِ يِنِّي كنِّيو يتْعدَّابن، بَرْكث وَار ثن نعّْڒم شَا. فَرْحث اَك يِنِّي يفَرّْحن، تْرُوْث اَك يِنِّي يتْرُوْن.

عَاوْنث ڒْمُوْمِنِين صَّالِحِين يِنِّي يتحْذَاجن. رحّْبث خ يِنِّي يتْسَفَارن.

لِأَنَّا دَّات ذَايس اَطَّاس ن طْرُوْفَاث، مْكُڒ طَّارْف يخدّم ڒْخذْمث نّس. أَمنِّي إِي ندْجَا ؤُڒَا ذ نشِّين. وَاخَّا نشِّين اَطَّاس إِي إِذْنغ أَقَانغ مَارَّا إِذْنغ ذ يجّن ن دَّات ذِي لْمَسِيح، كُڒ طَّارْف يتحْذَاجَا ونّغْنِي.