Vinsæl biblíuvers úr Matiyo 6

Anie nakara, ọ́ mịẹ ḅẹẹye-ḅẹẹye nẹngị na-iḅi ye anie, Tamụnọ Ama-da mẹ na ò ḅiiarị ọ́ mịẹ ḅẹ kura-aị ma na ḍọkịị, tẹ ori nwẹnị ḅarana osi-aị mamgba mịẹ tẹ arị ḅo ọmịna ḅara la.

Mie ḅụ, ọ́ ḅaa ḅụ paka ḅarịye gotẹ ḅụụ-ḅalaḅala ma; ḅaa mẹ anị ḅẹ ḅụụ-ḅalaḅalama aị nyana ḅa. Anị sọye mịẹ tomḅọ pịrị ḅịa, mḅọ sime mịmgba mẹ pịrị ḅụụ-fụka ma ḅụ ofori aị dogi-ḅo sụa.

Miemẹ anie à gotẹ ọ́ ḅẹẹarị mịnẹ ọmịnị ọ́ fị ḅẹ aị na, ó ḅuu ḅẹ aị na ẹrẹsị ḅụụ-ḅalaḅala ma, mịẹtẹ ó ḍumo sime ḅarị ḅara, anịanịa ọ́ sụa ḅẹ kapa. Mie-mẹmgba ọgọnọ ḅụ, ọ́ kọkọ nimi wararị, mịnẹ tomḅọ ḍumo mẹ, ḅịḅị-ḅio sụa fịye nẹngịm, anịsakị oju mẹ pịkị kẹ anị sụarị kapa nẹngịm.

Kụma,, ị́ tẹkẹ ḅarị sakị, ị́ kala-ḅio sọ mu tẹ ḅọkọ gbaịn tẹrẹmẹ ị́ Ḍa kịnị tọrụngbọ kẹ ẹrị-ẹrịa ḅọ ḅe tẹkẹẹ. Tẹ ị́ Ḍa ḅe tẹ ḅọị anga ị́ mịẹye, mịẹye ẹrịarị ḅọ ḅe gbẹẹ-ye kẹ ị́ pịrị ḅa.

Anị ḅara ḅụ, mie ọ́ tẹkẹ na-iḅi ḅara: “Wamịna Ḍaḅọ So-ḅio simearị ḅọ: fịafịa sime ị́ ẹrẹ pịrị; yee ị́ Ama ḅọ; yee í minini ye tomikiri ḅụ mịẹ, So-ḅio anị sime-ḅara.

Mịmgba wa fị na-iḅi fịye kẹ wa pịrịị.

Wa mịẹ-irima tẹ aị ma wẹrịso wa pịrịị, wa ja apụ kẹ wa iri tẹ aị ma wẹrịso ịn pịrịarị ḅara.

Ḍụkụ tẹ wa mu kụrọtẹ daaḍiki ḅio sọma, kụma Si-ḅọ ḅe ḅara-ḅio wa ḍụa pakama-ḅo.”

“Ị́ ja apụ kẹ í iri tẹ aị ma wẹrịso ịn pịrị, pịrị, ị́ Ḍa So-ḅio simearị ḅọ ḅe sọ wẹrịso ị́ pịrị ḅa.

Ó So-tọrụ fiin ma ḅọrọarị afeni ma ḍikii: ịn ḍụọ ḍiḅi tẹ, soku tẹ, fịaị kobiri mu koko ḅụụ wẹrịma-a: anịsọ ịn paa ye fịarị, ọmịna Ḍaḅọ So-ḅio simearị ḅọ ḅe mie in kokoarị! Ọmịnị ma ọ́ kpọma ye la feni ma nẹngị-a?

“Ọmịnị ngọ tan kpolima ọmịna ḅụụ wẹrịma ma mị tomikiri ḅụ, anie akarakaraḅa na, asarị na, ye gulugulumarị, tẹ furu apụ pịkị kan sọ tẹ ye furu, furu anga mẹ. Anie nakara, ọmịnị ngọ tan kpolima ọmịna ḅụụ wẹrịma So-ḅio, anịanga akarakaraḅa na, asarị na, ye guluguluma guluguluma-a, tẹ furu apụ pịkị inetẹ kan sọ tẹ furu ḅịa. Ị́ ngọ simearị anga mie sakị mamgba í ḅioḅẹngbọ pịkị sime ḅarị anga.”

Gbọrụḅọ-sọ inetẹ gbọrụ sakị ḅụ omoni-sọ maa sịḅịdapụ pịrị ḅịa; ọ̀ gbọrụḅọ ḍiki-ḅioḅu tẹ osi-ḅọ ḅẹlẹma ḅa; ọ̀ sịḅị-tuu gbọrụḅọ pịrị tẹ osi-ḅọ ḍiki-sima ḅa. Ọmịnị inetẹ Tamụnọ na igbigi na kẹ pii-pii ḅẹẹ ḅara kẹ fịrịmẹnjị pịrị ḅịa.

Kapa kẹ piri-ḅio so-pakarị osuan mẹ sụarị ḅọ anie ḅị Tamụnọ ḅe — osuka tẹ mịmgba emi tẹ ḅaa ḅarị sime ḅịa tẹ ịn kẹ kọrị fịnị ḅio suu dọkịmarị ye mẹ. Ori inetẹ mịẹtẹ, gbarị-a ḅara ḅụ, ọ́ kapa sụa anị ḅara nẹngị ḅịa? Ọ́ nyana minini boowa ḅara ḍiki!

Kụma, ị́yẹrị, ị́ ḅarasụa mịẹ ḅẹ ọkụ ofori ḅọ pịrịarị sakị ḍụkụ tẹ í ere-ḅara ị́ ama-ḅara mịẹarị ye nimi ma. Anịsakị anị ḅo ḅọị anga mịẹ ye sọ ḅa. Tẹ ị́ Ḍa So-ḅio simearị ḅọ ḅe tẹ ḅọị anga ị́ mịẹarị ye ẹrịarị ḅọ ḅe nwẹnị gbẹẹ-ye kẹ ị́ pịrị ḅa.

“Ẹrị mịnẹ Tamụnọ nimi ḅọ ḅara ḅụ, ị́ mịẹarị ye mịẹarị ye í tomi ẹrị ḅẹ ḅara gotẹ ama-karakara-ogbo anị mịẹ-a. Ị́ kịnị ẹrị ḅarị ḅara gotẹ ama-karakara-ogbo mịna aị ma mịẹ kụma, ị́ Ḍa So-ḅio simearị ḅọ ḅe ḅara ị́ gbẹẹ-ye nyana ḅịa.

“Tẹ í ḅuru-ịmọ ḅarị sakị, ị́ kururuarị ḅara kẹ ị́ tọrụkuḅu wẹrị ḅịa, anie mịẹ tomi ḍie apụ ma mịẹ-mịẹ ḅara mẹ. In go ịna tọrụ kuḅu mịẹ simearị ye tomi in ḅuru-ịmọarị mẹ nimi ḅarị ḅara. Ó nimi mịnẹ ịna gbẹẹ-ye ịn nyana gbasịma kụra ḅio iḅerea. Ị́yẹrị, í ḅuru-ịmọarị sakị, ị́ tọrụ sịkịrị fịafịama, olo ọmbịị, tẹ ị́ sịḅị-dala pompomaa, mịẹtẹ ja apụ inetẹ nimi ḅịa ḅara, mịnẹ ị́ ḅuru-ịmọarị — ị́ Ḍa kịnị tọrụngbọ kẹ ẹrị-ẹrịa ḅọ ḅe ngẹrị mie nimi ḅarịye. Tẹ ị́ Ḍa ḅe, tẹ ḅọị anga ị́ mịẹarị ye mịẹarị ye ẹrịarị ḅọ ḅe nwẹnị gbẹẹ-ye kẹ ị́ pịrị ḅa.”