Popular Bible Verses from PEIKHIETNA 32

Deildu

Muol tung panin Moses a kumsuh ha lam mite in a thei ciengun Aaron kimvelah kikhawmin ama kungah, “Hing pei inlen, kote dingin ka mai vua pei ding pasien-te ei bawlpieh in; Egypt gam pan ei peipito pa Moses lah bang suoh ta ahei ka thei sih uhi,” a ci uhi.

TOPA in Moses kungah, “Thakhatin kumsuh in! Egypt leitang pana na peitopi na mite a lelamin a gamta sieng ta uhi; ka thupieh lampi panin amate a piel zuai ta uhi; amate dingin a kituisun bawngno lim khat bawlin tua tungah biehpiehna lui-in a bie vua, tuale ‘Israel aw, tamte khu Egypt leitang pana ang peipito na pasien-te uh ahi hi!’ ci uhi,” a ci hi.

Aaron in tua a mu bepin a mai-ah maitam khat a lam hi; tuale Aaron in tangtawh a, “Zing cieng pen TOPA ading pawi bawl ni hi ding hi,” a ci hi. Zingmawngin amate tho bai-in meihal biehnate a lui vua, thunuom biehnate a peipi uhi; tuale anne tuidawn dingin mite a to vua, zu khamin numei le pasal guolnuomin a thangtat uhi.

A zing ni-in Moses in mite kung ah, “Mawna lienpi khat na bawl zo uhi. Hinanle TOPA kungah tu-in ka peito ding a, na mawna ziehun thoidamna ka bawl kha thei ding hi,” a ci hi.