Popular Bible Verses from ᓭᐣᐟ ᒫᐟᔪ 6

Deildu

ᒫᑲ ᑭᔭᐋᐧᐤ ᓇᓈᑐᓇᒧᐠ ᓂᑳᐣ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ, ᒥᓇ ᐅ ᑲᐧᔭᐢᐠ ᐃᓯᐁᐧᐱᓯᐃᐧᐣ; ᐁᑯᓯ ᒫᑲ ᑲᐦᑭᔭᐤ ᐆᐦᐃ ᑭ ᑲ ᐊᓯᒋ ᒥᔨᑲᐃᐧᓈᐋᐧᐤ.

ᐁᑳᐃᐧᔭ ᒫᑲ ᐅᓵᒣᔨᑕᒧᐠ ᑭᑕ ᒪᒥᑐᓀᔨᑕᒣᐠ ᐋᐧᐸᐦᑭ; ᒋᑫᒫ ᐋᐧᐸᐦᑭ ᑭᑕ ᒫᒥᑐᓀᔨᑕᒧᒪᑲᐣ ᐁ ᐃᓯ ᑎᐯᔨᑕᒧᒪᑲᕽ. ᑌᐱᔨᑰᕽ ᑭᑕ ᐋᔨᒪᐣ ᑖᐦᑐ ᑭᓯᑳᐤ.

ᐁᐊᐧᑯ ᐅᐦᒋ ᑳ ᐃᑎᑕᑯᐠ, ᐁᑳᐃᐧᔭ ᐅᓵᒣᔨᑕᒧᐠ ᑭ ᐱᒫᑎᓯᐃᐧᓂᐋᐧᐤ, ᑫᑲᐧᐩ ᑫ ᒥᒋᔦᐠ, ᐊᐦᐳ ᑫᑲᐧᐩ ᑫ ᒥᓂᑫᐧᔦᐠ; ᐊᐦᐳ ᑭᔭᐃᐧᐋᐧᐤ, ᑫᑲᐧᐩ ᑫ ᐳᓯᐢᑲᒣᐠ. ᓇᒪ ᒋ ᐱᒫᑎᓯᐃᐧᐣ ᐊᔨᐋᐧᐠ ᐃᑌᔨᑖᑲᐧᐣ ᐃᐢᐱᐨ ᒥᒋᐃᐧᐣ, ᒥᓇ ᒥᔭᐤ ᐃᐢᐱᐨ ᐊᔪᐃᐧᓂᐢ?

ᒫᑲ ᑭᔭ, ᐁᔭᒥᐦᐋᔭᓂ, ᐱᐦᑐᑫ ᑭ ᐱᐢᑭᒋ ᐋᐧᐢᑳᐦᐃᑲᓂᓯᕽ, ᐃᐢᐱ ᒫᑲ ᑭ ᑭᐸᐦᐊᒪᓂ ᑭᐟ ᐃᐢᑳᐧᑌᒼ, ᐊᔭᒥᐦᐁᐢᑕᐤ ᑯᑖᐃᐧ, ᑳ ᐊᐧᓂᒨᑎᓯᐟ; ᐁᑯᓯ ᒫᑲ ᑯᑖᐃᐧ ᐊᐧᓂᒧᑕᓄᕽ ᑳ ᐋᐧᐸᐦᑫᐟ, ᒧᓯᐢ ᑭ ᑲ ᑎᐸᐦᐊᒫᐠ.

ᐅᒥᓯ ᒫᑲ ᑭᔭᐋᐧᐤ ᐃᓯ ᐊᔭᒥᐦᐋᐠ: ᓄᑖᐃᐧᓈᐣ ᑭᐦᒋ ᑭᓯᑯᕽ ᐁᔮᔭᐣ, ᑭᑕ ᑲᓈᒋᑖᓂᐃᐧᐤ ᑭ ᐃᐧᔪᐃᐧᐣ. ᑭᐟ ᐅᑌᓇᐃᐧᐃᐧᐣ ᑭᑕ ᐅᑎᐦᒋᐸᔨᐤ. ᐁᑌᔨᑕᒪᐣ ᑭᑕ ᐃᐧ ᑐᒋᑳᑌᐤ ᐅᑕ ᐊᐢᑭᕽ, ᑳ ᐃᓯ ᐊᔮᐠ ᑭᐦᒋ ᑭᓯᑯᕽ.

ᒥᔨᓈᐣ ᐊᓄᐦᐨ ᑳ ᑭᓯᑳᐠ ᑫ ᐅᐦᒋ ᐱᒫᑎᓯᔮᕽ.

ᒥᓇ ᐳᓀᔨᑕᒪᐃᐧᓈᐣ ᓂ ᒪᓯᓇᐦᐊᒫᑫᐃᐧᓂᓈᓇ ᑳ ᐃᓯ ᐳᓀᔨᑕᒪᐋᐧᔮᐦᑭᐠ ᑳ ᒪᓯᓇᐦᐊᒫᑯᔮᐦᑭᐠ.

ᐁᑳᐃᐧᔭ ᑲᑫᐧᒋᐃᐦᐁᐧᐃᐧᓂᕽ ᐊᑎ ᐃᑐᐦᑕᐦᐃᓈᐣ, ᒫᑲ ᐸᐢᐱᑎᓯᓂᓈᐣ ᒪᒑᔨᐃᐧᓂᕽ ᐅᐦᒋ: ᑭᔭ ᑭᐟ ᐅᑌᓇᐃᐧᐃᐧᐣ, ᒥᓇ ᓱᑳᑎᓯᐃᐧᐣ, ᒥᓇ ᑭᐢᑌᔨᑖᑯᓯᐃᐧᐣ, ᑳᑭᑫ. ᐋᒣᐣ.

ᒋᑫᒫ ᑭᐢᐱᐣ ᑭ ᐳᓀᔨᑕᒪᐋᐧᐋᐧᐊᐧᐠ ᐊᔨᓯᔨᓂᐊᐧᐠ ᐅ ᒪᒋᑐᑕᒧᐃᐧᓂᐋᐧᐊᐧ, ᑯᑖᐃᐧᐋᐧᐤ ᑭᐦᒋ ᑭᓯᑯᕽ ᑳ ᐊᔮᐟ ᐃᐧᐢᑕ ᑭ ᑲ ᐳᓀᔨᑕᒫᑯᐋᐧᐤ.

ᐋᐧᐸᒥᐦᑯᐠ ᐱᔦᓯᓴᐠ ᑳ ᐸᐹᒥᔮᒋᐠ; ᓇᒪᐃᐧᔭ ᑭᐢᑎᑫᐊᐧᐠ, ᒥᓇ ᓇᒪᐃᐧᔭ ᒪᓂᓯᑫᐊᐧᐠ, ᓇᒪᐃᐧᔭ ᒫᐊᐧᒋᒋᑫᐊᐧᐠ ᒪᐢᑯᓯᐃᐧᑲᒥᑯᕽ: ᐁᔨᐁᐧᕽ ᒫᑲ ᑯᑖᐃᐧᐋᐧᐤ ᑭᐦᒋ ᑭᓯᑯᕽ ᑳ ᐊᔮᐟ ᐊᓴᒣᐤ ᐁᐅᑯᓂ. ᓇᒪ ᒋ ᑭᔭᐋᐧᐤ ᐊᔨᐋᐧᐠ ᑭᐟ ᐃᐢᐱᑌᔨᑖᑯᓯᓈᐋᐧᐤ ᐃᐢᐱᐨ ᐁᐊᐧᑯᓂᐠ?

ᐁᑳᐃᐧᔭ ᐊᐢᑖᐧᓱᐠ ᑭᐟ ᐊᐢᑖᐧᑳᓂᑳᓱᐃᐧᓂᐋᐧᐊᐧ ᐅᑕ ᐊᐢᑭᕽ, ᑫ ᑕᓯ ᓂᓯᐊᐧᓈᒋ ᒪᓂᒍᓯᐊᐧᑭ ᒥᓇ ᒥᓯᐋᐧᐱᐢᑳᑭ, ᒥᓇ ᐃᑕ ᑭᒧᑎᐢᑲᐠ ᐁ ᐱᑯᓂᑫᒋᐠ ᒥᓇ ᐁ ᑭᒧᑎᒋᐠ: ᒫᑲ ᐊᐢᑖᐧᓱᐠ ᑭᐟ ᐊᐢᑖᐧᑲᓂᑳᓱᐃᐧᓂᐋᐧᐊᐧ ᑭᐦᒋ ᑭᓯᑯᕽ, ᐊᓂᑕ ᐁᑳ ᑫ ᑕᓯ ᓂᓯᐊᐧᓈᒋ ᒪᓂᒍᓯᐊᐧᑭ ᐋᐦᐳ ᒥᓯᐋᐧᐱᐢᑳᑭ, ᒥᓇ ᐁᑯᑌ ᓇᒪᐃᐧᔭ ᐅᑭᒧᑎᐢᑲᐠ ᐁ ᐱᑯᓂᑫᒋᐠ ᓇᒪᐃᐧᔭ ᒥᓇ ᑭᒧᑎᐊᐧᐠ: ᒋᑫᒫ ᐃᑕ ᐁ ᐊᐢᑌᐠ ᑭᐟ ᐊᐢᑖᐧᑲᓂᑳᓱᐃᐧᐣ, ᐁᑯᑕ ᒥᓇ ᑭᑌᐦ ᑭᑕ ᐊᔮᐤ.

ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᓂᓱ ᐅᑭᒫᐊᐧ ᑭᑕ ᑭ ᐊᑐᐢᑫᐢᑕᐁᐧᐤ; ᒋᑫᒫ ᐯᔭᐠ ᑭᑕ ᐃᐧ ᐸᑳᐧᑌᐤ, ᐁᑯᓯ ᑯᑕᑲ ᑭᑕ ᓵᑭᐦᐁᐤ; ᐊᐦᐳ ᐯᔭᐠ ᑭᑕ ᒥᒋᒥᓀᐤ, ᐁᑯᓯ ᑯᑕᑲ ᑭᑕ ᒫᔦᔨᒣᐤ. ᓇᒪᐃᐧᔭ ᑭ ᑲ ᑭ ᐊᑐᐢᑲᐋᐧᐋᐧᐤ ᑭᓭᒪᓂᑐ ᒥᓇ ᐁᐧᔪᑎᓯᐃᐧᐣ.

ᒫᑲ, ᑭᐢᐱᐣ ᑭᓭᒪᓂᑐ ᐁᑯᓯ ᐃᓯ ᐃᐧᔮᑕᑖᒋ ᒪᐢᑯᓯ ᐱᑲᐧᒑᔨᕽ ᑳ ᐊᔮᐠ, ᐊᓄᐦᐨ ᑳ ᑭᓯᑳᐠ ᑳ ᐊᔮᐠ, ᐁᑯᓯ ᐋᐧᐸᐦᑭ ᐃᐢᑯᑌᐃᐧᑲᒥᑯᕽ ᑲ ᐃᓯ ᐁᐧᐱᓂᑳᑌᐠ, ᓇᒪ ᒋ ᐊᐊᐧᓯᒣ ᑭᔭᐋᐧᐤ ᑭ ᑲ ᐃᐧᔮᑕᐃᑯᐋᐧᐤ, ᐅ ᑭᔭᐋᐧᐤ ᑳ ᐊᐱᐢᒋ ᐅᑖᐯᐧᔦᔨᑕᒧᐃᐧᓂᔦᐠ?

ᒫᑲ ᐃᐢᐱ ᑎᔪᑕᒪᓂ ᒥᔪ ᑐᑕᒧᐃᐧᓇ, ᐁᑳᐃᐧᔭ ᑭ ᓇᒫᑎᐣ ᑭᑕ ᑭᐢᑫᔨᑕᒧᒪᑲᐣ ᑫᑲᐧᐩ ᐁ ᑐᑕᒧᒪᑲᕽ ᑭ ᑭᐦᒋᓂᐢᐠ: ᑭᑕ ᑭᒧᑕᑭ ᒫᑲ ᑭ ᒥᔪ ᑐᑕᒧᐃᐧᓇ; ᐁᑯᓯ ᑯᑖᐃᐧ ᐊᐧᓂᒧᑕᓄᕽ ᑳ ᐋᐧᐸᐦᑫᐟ, ᐃᐧᔭ ᑎᐱᔭᐤ ᒧᓯᐢ ᑭ ᑲ ᑎᐸᐦᐊᒫᐠ.

ᐯᔮᑕᐠ ᑭᑕ ᐁᑳ ᑐᑕᒣᐠ ᑭ ᒥᔪ ᑐᑕᒧᐃᐧᓂᐋᐧᐊᐧ ᐅᐟ ᐋᐢᑕᒥᐃᐧᓂᐋᐧᕽ ᐊᔨᓯᔨᓂᐊᐧᐠ, ᑭᑕ ᐋᐧᐸᒥᑯᔦᑯᐠ; ᐁᑯᓯ ᐃᐧᔭ ᐁᑳ ᑫ ᑎᐸᐦᐊᒫᑯᔦᐠ ᑯᑖᐃᐧᐋᐧᐤ ᑭᐦᒋ ᑭᓯᑯᕽ ᑳ ᐊᔮᐟ.

ᒥᓇ ᒫᑲ, ᐃᐢᐱ ᐃᔨᐊᐧᓂᐦᐃᓱᔭᓂ, ᐁᑳᐃᐧᔭ ᐃᓯᓈᑯᓯ ᑳ ᐃᓯᓈᑯᓯᒋᐠ ᐅᑕᔭᒥᐦᐁᑳᓱᐢᑲᐠ ᐁ ᑲᐢᑫᔨᑕᒧᐃᐧᓈᑯᓯᒋᐠ; ᒋᑫᒫ ᒫᔨᐦᑫᐧᓈᑯᐦᐃᓱᐊᐧᐠ ᑭᑕ ᐋᐧᐸᒥᑯᒋᐠ ᐊᔨᓯᔨᓂᐊᐧ ᐁ ᐃᔨᐊᐧᓂᐦᐃᓱᒋᐠ. ᑖᐯᐧ ᑭᐟ ᐃᑎᓈᐋᐧᐤ ᐊᔮᐊᐧᐠ ᐅ ᑎᐸᐦᐊᒫᑯᐃᐧᓂᐋᐧᐤ. ᒫᑲ ᑭᔭ, ᐃᐢᐱ ᐃᔨᐊᐧᓂᐦᐃᓱᔭᓂ, ᑕᒪᐢᑯ, ᒥᓇ ᑳᓯᐦᑫᐧ; ᐁᑳ ᑭᑕ ᐋᐧᐸᒥᐢᑭᐠ ᐊᔨᓯᔨᓂᐊᐧᐠ ᐁ ᐃᔨᐊᐧᓂᐦᐃᓱᔭᐣ, ᒫᑲ ᐱᑯ ᐊᓇ ᑯᑖᐃᐧ ᑳ ᐊᐧᓂᒧᑎᓯᐟ; ᐁᑯᓯ ᒫᑲ ᑯᑖᐃᐧ, ᐊᐧᓂᒧᑕᓄᕽ ᑳ ᐋᐧᐸᐦᑫᐟ, ᐃᐧᔭ ᒧᓯᐢ ᑭ ᑲ ᑎᐸᐦᐊᒫᐠ.