Popular Bible Verses from Noo Mian 24

Deildu

As er‐yn‐oyr dy jean olkys bishaghey, nee graih‐ghiastyllagh ymmodee feayraghey. Agh bee eshyn, nee tannaghtyn firrinagh gys y jerrey, er ny hauail.

As bee sushtal yn reeriaght er ny phreacheil ayns ooilley yn seihll, son feanish da dy chooilley ashoon, as eisht nee yn jerrey cheet.

As cluinnee shiu jeh caggaghyn, as jeh imraaghyn dy chaggaghyn: jeeagh nagh bee shiu seaghnit: son shegin da dy chooilley nhee jeu shoh cheet gys kione, agh cha bee yn jerrey foast.

Son nee ashoon girree‐magh noi ashoon, as reeriaght noi reeriaght: as bee gennaghyn as crampyn, as craaghyn‐thallooin ayns ymmodee ynnydyn. Bee ooilley shoh toshiaght seaghyn diu.

Nee yn aer as yn ooir cherraghtyn, agh my ghoan’s cha jean cherraghtyn.

Son hig ymmodee ayns my ennym’s, gra, Mish yn Creest: as nee ad ymmodee y volley.

Eisht livreyee ad shiu seose dy ve seaghnit, as marree ad shiu: as bee dy chooilley ashoon dwoaiagh erriu er coontey yn ennym aym’s. As eisht nee ymmodee scarrey rish nyn gredjue, as brahee ad, as ver ad feoh yn derrey yeh da’n jeh elley. As nee ymmodee phadeyryn‐foalsey girree seose, as mooarane y volley.

As dreggyr Yeesey as dooyrt eh roo, Cur‐jee twoaie nagh moll dooinney erbee shiu.

Shen‐y‐fa bee‐jee shiuish myrgeddin ullee: son ec lheid yn oor as nagh vel shiu smooinaghtyn er, hig yn Mac dooinney.

Shen‐y‐fa bee‐jee er nyn arrey, son cha vel fys eu er yn oor tra hig nyn Jiarn.

Agh er y laa as yn oor shen, cha vel fys ec dooinney erbee, cha vel ec ainleyn niau, agh ec my Ayr ny lomarcan.

Son nee Creestyn foalsey, as phadeyryn foalsey girree, as cowraghyn mooarey as yindyssyn y hoilshaghey, ayns wheesh (my oddagh eh ve) dy jinnagh ad molley yn eer chloan reiht.

Agh myr va laghyn Noe, myr shen myrgeddin vees cheet Mac y dooinney. Son myr ayns ny laghyn va roish y thooilley, v’ad gee as giu, poosey as coyrt ayns poosey, derrey yn laa hie Noe stiagh ayns yn arg, As cha dug ad tastey, derrey haink y thooilley, as ghow eh ad ooilley ersooyl; myr shen myrgeddin vees cheet Mac y dooinney.