Popular Bible Verses from Génesis 25

Deildu

Yun te jiñaꞌa Jitoꞌo: Ini chii ron, chi uu suchi yii ka ñuꞌu ja kuu uu ñuu naꞌnu, te nduu ñuu yun ja ka saꞌa siin tnaꞌa guaa ndee jiti ron, te in ñuu yun koo ndakui ka saa inka ñuu yun, te suchi kaꞌnu yun kokunukuechi nuu suchi lule yun, jiñaꞌa ya.

Te jiñaꞌi nuu Jacob: ―Jikantaꞌu rin, vi ñani, taa tna joo ndei ndikuaꞌa nuu ja ni saꞌa ron jian na kaa rin, chi ni kuita ndevaꞌa rin ―jiñaꞌi. Te suu guaa ni ka xnani ña jin Esaú, Edom.

Te Rebeca, chi tu ni oo seꞌe ñaꞌa yun, te ni ndakuatu Isaac ja jaꞌa ñasiꞌi de nuu Jitoꞌo, te ni onini ya ja ni jikantaꞌu de, te ni junkuꞌun seꞌe ña.

Yun te jiñaꞌa Esaú: ―Yaꞌa ndia vi jiꞌi rin soko vitna ñuꞌni, te nagua jiniuꞌu nuu rin, visi na kokuu rin suchi xtnañuꞌu ―jiñaꞌi. Te jiñaꞌa Jacob: ―Kee yuꞌu nuu ia Dios vitna ñuꞌni nuu saa, te na taa rin ―jiñaꞌi. Te ni kee yuꞌu Esaú nuu ia Dios ja ni ndaxikoi nuu Jacob ja suchi yun ni nduu suchi xtnañuꞌu.

Yun te ni kaku inkai tnii guaꞌi xujaꞌa ñani Esaú, te ni ka xnani jin Jacob. Ja oo Isaac uni xiko kuia na ni ka kaku lulu Rebeca.

Te ni okutoo ka ña Isaac jin Esaú, chi ni ojintnaꞌa ini de ja kaa de kuñu kiti yuku ni ojaꞌni. Te ndia Rebeca, chi ni okutoo ka ña Jacob.