MAT 2
2
ज्ञानी मंदीद पुर्व तीकेल वच्चेद
1हेरोद राजान शासन काळला यहुदीया प्रांतलोन बेथलहेम नगरला येशुनदी जन्म आयनेंका, पुर्व तीकुड देशकेल ज्ञानी मंदी यरुशलेम शहरकी वच्ची आडगेदेंक आंटीर की, 2“यहुदी मंदीक राजा आयेदेंक फुट्टीनोड बिडा यंदु उंडाड? येनटीक की, मिम पुर्व दिशाला वानदी सुक्का सुस्तीम इंगा वानदी दर्शन शेशेदेंक वच्चीनाम.”#गणना 24:17. 3यप्पुड हेरोद राजाड इदी इन्या, आप्पुड वाड इंगा वान जताक आंता यरुशलेम शहर येरस्कुन्या; 4इंगा हेरोद राजाड आंता यहुदी मुख्य याजकलान इंगा नियमशास्त्र शिक्षकलान वगातळा फिल्ची वारनी आडग्या की, ख्रिस्तद जन्म यंदु आय्येद उंड्या? 5वार उत्तर इच्चीर, “यहुदिया प्रांतलोन बेथलहेम नगरला, येनटीक की मीखा संदेष्टाड पहिलाने राशीन्या;
6‘हे यहूदा प्रांतलोन, बेथलहेम नगरलोन मंदीलाला,
मीर यहूदालोन आन्नी सरदारला काना शिन्नावोर उंडार इल्ला अजिबात लेद
येनटीक की मी दिंटल्योन्केल इल्ला राजा यल्ली
यवाड ना इस्राएल मंदीन सांभाळीच्ची.’”#मीखा 5:2.
7इ माटलु इनीनेंका हेरोद राजाड ज्ञानी मंदीन दोंगातारला फिल्ची वार तीकेल सुक्का नक्की यप्पुड कमशीन्या दानदी वेळ आडगी तिस्कुन्या. 8इंगा वाड वारनी बेथलहेमकी आंपेताप्पुड आन्या, “मीर फोईगास आ बिडा बद्दल यरका शेयना इंगा मिक शिक्कीनेंका नाक वापस वच्ची शपना की मीर येम सुस्तीर आंटे निन पण वच्ची दर्शन तिस्कुन्यान.” 9-10राजानदी माटा इनीगास ज्ञानी मंदी वार दावाता यल्लीर. याद सुक्का वार पुर्व दिशाला सुशीनीर आदी सुक्का सुशी ज्ञानी मंदीक शेंगेम आनंद आय्या आदी सुक्का बेथलेहेम नगर नंताक वार मुंदा-मुंदार नडशा इंगा ज्ञानी मंदीक बिडा शिक्की नंताक वार मुंदार नडशा. 11यंकसार वार आ इंटल्योंग फोईर इंगा आ बिडान वान आम्मा मरीयादान देगार उंडीनेद सुशीर इंगा किंदा कुसनी वानदी दर्शन तिस्कुनीर. वार वारी थैलील उघडाशी वानकी बंगार, ऊद इंगा गंधरस इ दानलु अर्पण शेशीर. 12आप्पुड परमेश्वर वारकी कलाला हेरोद तीकुड वापस फोकुंडा, इल्ला शप्पीनेंका वार इंगोगो दावाता वार देशामकी यल्ली फोईर इंगा हेरोद राजानकी येमीच यरका काक फो.
मिसर देशलोंग फारेद
13ज्ञानी मंदी फोयनेंका, परमेश्वर दुत योसेफकी कलाला दर्शन इच्ची आन्या, “लेय, बिडान इंगा वान आम्मान तिस्केन मिसर देशकी फारी फो इंगा यप्पुड नंताक निन निक वापस वच्चेदेंक शप्पान आड नंताक आंदे उंड येनटीक की बिडान मतेशेदेंक हेरोद राजाड फुडकुतुनाड.” 14आप्पुड योसेफ लेशा इंगा आद्दे मोब्बुला बिडान इंगा वान आम्मान तिस्केन मिसर देशकी यल्ली फोया. 15इंगा वार हेरोद सच्ची नंताक आंदे निलचीर.
“निन ना कोडकुन मिसर लोन्केल फिल्चीनान.” इल्ला जे प्रभुड होशेय संदेष्ट्यान तीकेल शप्पीन्या आदी पुर्ण आय्या.#होशेय 11:1.
बेथलहेमला मोगा बिळ्ळान मत्तेस्काम
16आप्पुड ज्ञानी मंदी वान फसाय मतीर इल्ला सुशी हेरोद राजाक शेंगेम कोफाम वच्या इंगा याद वेळ वाड ज्ञानी मंदी तीकेल आडकुनी तिस्कुन्या दान लेकाने वाड बेथलहेमला इंगा आजुबाजुक उंडीने आन्नी उळाला यवार रोंड यंडला वोर इंगा दान काना पण कमी वय उंडीने मोगाबिळ्ळु उंडीर वार आंदारनी सैनिकलान आंपी वार शेयता मतेशा. 17इदी दिनिचांग आय्या की यिर्मया संदेष्ट्याड शप्पीनेद वचन पुर्ण कावाला.
18“रामा नगरला #2:18 रामा नगरला रामा नगर इल्लोनदी जागा उंडाद यंदु दावीदान वंशजलु उंडीर येडशेद
इंगा बेग्गे कीरलेद वगा माटा इना वच्या, राहेलदी दान बिळ्ळा इचांग येडस्तुनाद,
येनटीक की वार इप्पुड लेर आंका दानकी शांत आय्येद लेकुंड्या.” #यिर्मया 31:15.
मिसर देश लोन्केल वापस वच्चेद
19हेरोद राजा सच्ची फोयनेंका, सुडना परमेश्वर दुत मिसर देशला योसेफकी कलाला दर्शन इच्ची आन्या, 20“लेय, बिडान इंगा वान आम्मान तिस्केन इस्राएल देशकी फो, येनटीक की बिडाद जेम तिस्कुनेदेंक यवार सुस्तुनीर वार सच्ची फोयनार.” 21आप्पुड वाड लेशा बिडान इंगा वान आम्मान तिस्केन इस्राएल देशकी वच्या. 22पण अर्खेलाव वान आब्बाड हेरोद इन जागाला यहुदीया प्रांतला राज्य शेस्तुनाड इल्ला इनीगास योसेफ आंदुक फोयेदेंक यरस्कुन्या, इंगा कलाला परमेश्वर सुचना इच्चीनेंका वाड गालील प्रांतकी यल्ली फोया, 23इंगा आद्दे प्रांतलोन नासरेथ फेर उळ्या फोई निलच्या दिनिचांग की, “वान नासोरी आन्यार” इदी जे संदेष्ट्यान तीकेल शप्पीनेद उंड्या आदी पुर्ण कावाला.
Nke Ahọpụtara Ugbu A:
MAT 2: WNT
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye