संत.मत्ती 18
18
सिरमा राईज रे जामा तरअः बड़े ओके?
(संत.मरकुस 9:33–37; संत.लुकास 9:46–48)
1 #
सं.लुका 22:24
हिमीन बेरा चेलाकु ईसु दुबाःड़े हीःग केते कुली लियाकु, “सिरमा राईज रे जामा तरअः बड़े ओके एदानिया?”
2तब हुनी मियांड चेंगा के आएंग दुबाःड़े राअः केते आउर हुंकू तलारे तिंगु केते, कंहड़ी लःअय, 3#सं.मर 10:15; सं.लुका 18:17“ईङ आपे के सचे कंहड़ीओ-दिपीईंग ची जब तक आपे एरपे फिराआ आउर चेंगाकु लकान एरपे बनाआ, आपे सिरमा राईज रे बोल एरपे दड़ीआ। 4हिना लःअय जे अपने के नुई चेंगा लकान छोटे समझाआय, हुनी सिरमा राईज रे जामा तरअः बड़ेआय। 5आउर जे ईङ आला नुमू रे मियांड नोकान चेंगा के गरहानियाकु, हुंकू ईङ के गरहानिङायाकु।
पाप रअः परीकछा
(संत.मरकुस 9:42–48; संत.लुकास 17:1–2)
6“बकिर जे नुकू छोटेकु मेसे जे ईङ रे बिसवासे-आकु जाहें मियांड छोटेकु के पाप रअः कारन बनाव कुआकु, दो हुनी के नोःआँ बेस एदनाआ ची हुनी आला होटोः रे बड़े जानता रेनअः पटनी के तोल केते समुदर रे डु-डुबाव। 7दुनिया रिनकु होड़कु के भयभयान हुयाव कोआ, एता लःअय ची पाप रअः कारन, दो दुनिया रे हुयाअः गीआ, बकिर भयभयान हुयाव कोआ हुनी होड़ के जे पाप रअः कारन पड़ीयोआय।
8 #
सं.मत्ती 5:30
“जदि आम आला तीः चाहे जांगा ताम पाप रअः कारन पाड़ीयोआ, दो होना के मांअ खांड़ा केते गिड़ी गुलतामे, निआँ बेस एदनाअ ची आम लुलहा चाहे लंगड़ा केते का-अन्तोः जिनगी रे बोलमे, बकिर बनार तीः चाहे बनार जांगा ताहिकोअते, का-इड़िगोअ सेंगेल रे आलकु घलाव केमे। 9#सं.मत्ती 5:29आउर जदि आम आला मेःड आम आला पाप रअः कारन पाड़ीयोआ, होले मेःड तामके उडुंग केते गिड़ी गुलतामे, एता लःअय ची आम काना केते का-अन्तोः जिनगी रे बोल, आम लःअय बेस एदनाअ, बकिर आम आला बनार मेःड ताहिनोअ रे होः नरग रअः सेंगेल रे आलकु घलाव केमे।
आःड उनी भेंड़ा आला गाम
(संत.लुकास 15:3–7)
10 #
सं.लुका 19:10
“चौंचित तहिनपे, हुंकू बालेककु रे मिहोंड़ केहोः तुछ आलपे समझाव कोअ। ईङ आपे के बेताः दिपीईंग, हुंकू आलकु सिरमादूत जामा बेरा ईङ आली सिरमा रिनी बाबा के नेल इकायाकु। 11#18:11 जामा तरअः बढ़ियाँ पुथी रे नोःआँ पद कनोआँ एता लःअय ची मनवा होपोन जे आःड थिनाकु, हिंकु के बा-बनचाव लःअय हीःग तनाय।
12“आपे आला एतान सोंच एदनाअ? जदि जाहें आलकु मि-साव भेंड़ा एदान कुआ, आउर हुंकू मेसे मियांड आःड जुनोआय, दो हुंकू निनानब्बे भेंड़ा के टुंगरी रे बाईःग तु केते, हुनी आःड उनी के अनौरी काय भेटाअः जगुत हुनी के एरे नामीया एतान? 13आउर जदि हुनी के नामीयाय, दो ईङ आपे के सचे कंहड़ीओ दिपीईङ ची हुनी हुंकू निनानब्बे भेंड़ाकु लःअय, जे काकु आःड थिना हुंकू लःअय एरे खुसोआ, जेतना ची हुनी आःड उनी लःअय खुस कोआय। 14निआँ लकान गी आपे आली सिरमा रिनी बाबा होः काय चहाआ ची हुंकू छोटेकु मेसे मियांड-मिन होः आलु नास कोअ।
बोको आला सुधराअ
15 #
सं.लुका 17:3
“जदि आम आली बोको ताम जहान कसुरेआय, दो सेन केते हुनी के एकला रे समझाई में। जदि हुनी आम आला कंहड़ी के मनाव जुनोआय, दो आम अपन बोको के बंचाव किदयाम। 16#कन 19:15जदि हुनी आम आला कंहड़ी के काय मनाअ, दो आउर मिहोंड़ चाहे बनहोंड़ के साँघे इदिकिनमे, ची बनहोंड़ चाहे पे-होड़ गोवाहीकु सहाड़ा रे जामा साबुत कोआ। 17जदि हुनी, हुंकू आला बात के होः काय मनाअ, दो कलीसिया रिनकु के उदूः कुमे। आउर जदि कलीसिया रिनकु आला कंहड़ी के होः काय आयुमेआ, दो हुनी के एटाअ जाईत आउर मालगुजारी ताइसलावकु समझाअपे।
मि-जामुक बि-बिनती
18 #
सं.मत्ती 16:19; सं.जोह 20:23 “ईङ आपे के सचे कंहड़ीओ दिपीईंग, जे ओत रे तोलेआय हुनी सिरमा रे होः तोल ओना ताही कोआ, आउर जे ओत रे जेके खोलायाय होना सिरमा रे होः खोलाव कोआ।
19“ईङ आपे के नोःआँ होः सचे कंहड़ीओ दिपीईंग, जदि ओत रे आपे मेसे जाहें बनहोंड़ होड़ मिमात केते जहान होः कोयाकिन, दो होना हुंकिन के ईङ आली सिरमा रिनी बाबा होना के पुराव केआय। 20एता लःअय ची जहान दुबाःड़े ईङ आला नुमू रे बनहोंड़ चाहे पे-होड़ जवारोआकु, होनाःड़े ईङ हुंकू ताला रे ताहिनोअ ईङ।”
का छछमाई धाँगड़ आला गाम
21 #
सं.लुका 17:3,4 तब पतरस ईसु दुबाःड़े हीःग केते बेता लियाय, “ए परभु, जदि ईङ आली बोको कसुर एकायाय दो ईङ इकिन खेप हुनी के छमायींग? सात खेप जगुत एतान?”
22 #
एहेः 4:24
ईसु कंहड़ी रूवाड़ लःअय, “ईङ आपे के सात खेप काईंग कंहड़ीः दा, बकिर सत्तर गुना सात खेप जगुत#18:22 सत्तर गुना सात खेप जगुत जामा बेरा क-छमा रेनअः बात हेके। 23हिना लःअय ची सिरमा राईज हुनी राजा लकाना। जे अपन बंधाउवाकु तरअः लेखा-जोखा ईइदी नाम केनाय। 24जब हुनी लेखा-जोखा इदी एहेःब लःअय, दो मियांड रिंड़दार के आगु लियाकु, जेकर रे करजा पे-लाख चालीस हजार किलो रअः चाँदी रअः ठर्ड़रा बराबईर उडुंग नेना। 25जब धाँगड़ दुबाःड़े रूरुवाड़ लःअय एतान होः का-थिना, हिना लःअय धाँगड़ आली गोमके हुकूम एमा लिकुआय, ची हुनी धाँगड़ के आउर हुनी आली आउराईत, हुनी आलकु चेंगाकु, आउर हुनी आला जामा जिनीस के आखरिंग गोअता, आउर रिंड़ के रूवाड़ गुलता। 26तब बंधाउवा हुनी आला जांगा दुबाःड़े नुर केते जोहार लियाय, आउर गोहराव नेनाय, ‘ए गोमके, ईङ के समय इमाईंगमे ईङ जामा के रूवाड़े-ईंग।’ 27तब बंधाउवा आली गोमके के सोग आदा लिया, आउर हुनी आला रिंड़ केहोः माफ लःअय आउर हुनी के बाई किदयाय।
28“बकिर जब बंधाउवा बाहरी उडुंग नेनाय, दो हुनी, आनेःग बंधाउवा गाती ते लोः जुमाव नेनाय, जे हुनी आला रिंड़ मि-साव चाँदी ठर्ड़रा #18:28 मि-साव चाँदी ठर्ड़रा मियांड चाँदी रअः ठर्ड़रा मुसिङ दिन भाईर रअः कमाई रअः बराबईर ताहिना।लकान ताहिना। हुनी गाती तेके सःब केते आउर हुनी आला होटोः तेके सःब केते बेता लियाय, ‘अपन रिंड़ के चुकाय मे।’ 29नोःआँ रअः चलते हुनी बंधाउवा गाती ते इकड़ुम केते हुनी आला जांगा ताय रे उयुअ नेनाय, आउर नोःआँ कंहड़ी यअते गोहराव नेनाय, ‘ईङ के समय एमाईङ मेईङ जामा के चुकायीङ।’ 30बकिर हुनी काय मनाव नेना, आउर जब तक रिंड़ के काय चुकाया जगुत, हुनी के जेहेल रे लगाव लियाय। 31नोःआँ जामा के नेल केते हुनी आली बंधाउवा गाती ते धाँगड़ मुरुक उदास नाय, आउर हुनी गोमके ते दुबाःड़े सेन केते जामा के उदूओ लियाय। 32तब गोमके हुनी बंधाउवा के राअः केते बेता लियाय। ‘ए खपतान बंधाउवा, आम ईङ तरअः गोहरअ रअः चलते, दो ईङ आम आला होना जामा रिंड़ के माफ थिलिईंग। 33दो ईङ जे लकान आम के दया थिलमिईंग, हिना लकान आम होः अपन बंधाउवा गाती के म-माया का-ताहिना एतान?’ 34आउर हुनी आली गोमके खीस नाय, जब तक होना रिंड़ के कौड़ी-कौड़ी काय चुकाया जगुत हुनी के डांड़ एमोअ कु आला तीः रे जिमाओ लिकुआय।
35“जदि आपे मेसे जामेकु अपन बोको के पुरा मन दिल तरअः कापे छमाईया, दो ईङ आली सिरमा रिनी बाबा होः आपे लोः निकान केआय।”
Nke Ahọpụtara Ugbu A:
संत.मत्ती 18: ASR
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023 NLCI CC BY-NC-ND 4.0