1 Begyu-dɩrɛ 12
12
Isareli ɛ tɔ e yela Rehobwam wo koro
1Ɛwʋ gɛ Rehobwam ɛ tɔ ɛ san Sekem ditele daanɩ, yema Isareli bete powu bɛ san dʋkɔ, bàà ma sɩ̀ wɔ bugyu. 2Gɛtɛ Nebati wobi Yerobwam ɛ nʋn ade nyayɩ fɔ, e biri e ye Egyipiti ɛ ba. Waanɩ fɔ ɛ̀ sangba ɛ̀ sa Egyipiti, ɔkʋn gɛtɛ e serenti e ye egyu-dɩrɛ Solomon wakʋn ɛ san fɔ. 3Okoro bɛ sa bɛnɩ bɛ ma kpèlè Yerobwam, gɛ ɛwɔ ma Isareli bɛnɩ powu, bɛ san Rehobwam wakʋn, gɛ bɛ dɔ̀ wɔ alan, 4<<Aate ɛ ka ditola ma ɔdʋrʋ ɛ kyɔlɔga tɩ gigyen, mɔ nkele awɔ tɩyɛra dɩkpankpasan dɩɩ gʋtʋn, ma ditola ma ɔdʋrʋ gɛtɛ aate ɛ ka ɛ sa ti gigyen fɔ. Gɛlɛ fɔ taà sʋma wɔ̀.
5Ɛwʋ gɛ Rehobwam e tiri wuunyun alan, <<Ɩ san, gɩsarama fɔ yàà biri ba.>> Okoro bɛnɩ fɔ bɛ da.
6Ɛwʋ gɛ egyu-dɩrɛ Rehobwam e lila bɛndɩrɛ gɛtɛ bɛ sʋma wote Solomon, wɔ nkpa awi yaanɩ fɔ alan, <<Amɩnlɛ-mɔmɔ gɛ yaà tɛ mɩ nan ka n tiri bɛnɩ nyabɛ baade fɔ yiinyun n tɛ bɛ?>>
7Gɛ be tiri wuunyun alan, <<Gengyi ǹdò aà mɛ ɛsʋmalɛ a tɛ bɛnɩ nyabɛ, gɛ aà sʋma bɛ, gɛ aà tiri baade fɔ yiinyun gepe a tɛ bɛ fɔ, ɛbɛ mɔ baà mɛ aa bɛsaranyan gakpaakpa.>>
8Mɔ Rehobwam e terema bɛndɩrɛ fɔ baade-wùlàlɛ gɛtɛ bɛ dɔ̀ wɔ fɔ, gɛ ɛ ma lila bɛsaranyanbi gɛtɛ ɛwɔ ma ɛbɛ bè di akʋsʋ, gɛ bɛɛ sʋma wɔ fɔ. 9E lila bɛ alan, <<Amɩnlɛ-mɔmɔ gɛ yaà tɛ mɩ? Lan gɛ taà tiri ade nyayɩ yiinyun tɩ tɛ bɛnɩ nyabɛ gɛtɛ bɛ dɔ̀ mɩ alan, <<Tɩyɛra ditola gɛtɛ aate ɛ ka ɛ kyɔlɔga tɩ gigyen fɔ?> >>
10Gɛ bɛsaranyanbi gɛtɛ bè di wakʋsʋ fɔ, be tiri wuunyun bɛ tɛ wɔ alan, <<Dɔ̀ bɛnɩ gɛtɛ bɛ dɔ̀ wɔ̀ alan, <Aate ɛ ka ditola-dɩrɛ e tola tɩ, mɔ awɔ bɩrɛ, tɩyɛra dɩ tɛ tɩ> fɔ alan, <Aburu-buru ɩ lɛ, adɩrɛ-dɩrɛ ɩ̀ sa gama. 11Miinte e tola yɩ ditola ma ɔdʋrɔ, mɔ nmɩ nan yɛ dàà biri mɛ ɔdʋrɔ fɩya. Miinte ɛ ka gɛ binyanibi ɛ lanla yɩ, mɔ nmɩ bɩrɛ, nan ka gɛ bikpemani n lanla yɩ.> >>
12Awi asiyee yɩɩ gama fɔ, Yerobwam ma bɛnɩ fɔ powu be biri bɛ san Rehobwam wakʋn, anlɛ gɛtɛ egyu-dɩrɛ ɛ sɩ̀ bɛ alan, <<Ɩ biri ɩ ba gɩsarama fɔ.>> 13Egyu-dɩrɛ ɛn ka wɔ bɛndɩrɛbi baamɩnlɛ gɛtɛ bɛ tɛ wɔ fɔ, ɛ ŋmanyan bɛ gɛ. 14Ɛ ka gɛ bɛsaranyanbi fɔ baamɩnlɛ gɛtɛ bɛ tɛ wɔ̀ fɔ, gɛ ɛ dɔ̀ alan, <<Miinte e tola yɩ ditola ma ɔdʋrɔ, mɔ nmɩ miinyo daà nɩ da woyo fɔ. Miinte ɛ ka gɛ binyanibi ɛ lanla yɩ, mɔ nmɩ nan ka gɛ bikpemani n lanla yɩ.>> 15Okoro egyu-dɩrɛ ɛn nʋn bɛnɩ fɔ baakʋn, yema ade gɛtɛ i sere lɛ i ye Yahwe wakʋn, fɔ wàà yɛ Yahwe wade gɛtɛ ɛ dama Silon-te Ahiya wo koro ɛ tabʋrʋ ɛ tɛ Nebati wobi Yerobwam fɔ yàà ba waanɩ.
16Gɛtɛ Isareli bete powu be we gɛtɛ egyu-dɩrɛ ɛn nʋn baakʋn fɔ, bɛ dɔ̀ wɔ alan,
<<Anʋn gɛ ɛtɩ ma Dafidi wɔnana tɩ̀ ba?
Anʋn gɛ taà wura ti ye Yese wɔnana fɔ wakʋn?
Oo Isareli bete! Ɩ san yaakwo yaanɩ.
Dafidi wɔnana, kpà ma aa dɩkpaara!>>
Okoro Isareli bete fɔ bɛ da baakpaara yaanɩ. 17Mɔ Isareli bete gɛtɛ bè si Yuda atele yaanɩ fɔ bɩrɛ, Rehobwam ee di bugyu ɛ tɛ bɛ.
18Ɛwʋ gɛ egyu-dɩrɛ Rehobwam ɛ sa Adoniram, gɛtɛ nafɔ ɛɛ nya dɩkpankpasan dɩɩ gʋtʋn gii koro fɔ Isareli bete baakʋn, mɔ Isareli bete powu be fun wɔ ataa be wolo. Wʋ ba gɛlɛ fɔ, egyu-dɩrɛ Rehobwam ɛ mɛ bilen e gyu wotiiramisan wanɩ gɛ e serenti ɛ da Yerusalem. 19Anlɛ gɛ Isareli bete bɛ tɔ be yela Dafidi dɩkpaara dii koro bè sere ma ǹdò. 20Gɛtɛ Isareli bete powu bɛ nʋn alɛ Yerobwam e biri e ye Egyipiti ɛ ba fɔ, be kpèlè wɔ bɛ san boo getumakʋn, gɛ bɛ sɩ̀ wɔ bugyu bɛ tɛ Isareli powu. Yuda wofoli fɔ wuuko na kuruma gɛtɛ wʋ̀ tɛrɛma egyu-dɩrɛ Dafidi dɩkpaara.
21Gɛtɛ Rehobwam e bè gyu Yerusalem fɔ, ɛ kʋla Yuda ma Benyamin boo-ifoli yɩɩ bɩtà bʋʋ bɛtàlɛ asepekyi yɛkɩ (180,000) gɛtɛ bɛ̀ nyɩ̀ bɩtà bʋʋ gɛtà gepepe bàà ma kpa ma Isareli, fɔ èè biri to bugyu fɔ tɛ ɛwɔ Solomon wobi Rehobwam.
22Mɔ Wurubwarɛ ɛ tabʋrʋ ma wɔsaranyan Semaya alan, 23<<Dɔ̀ Solomon wobi Rehobwam Yuda wogyu ma Yuda dɩkpaara, ma Benyamin boo-ifoli powu, ma bɛnɩ-kurumakyɛɛ fɔ alan, 24<<Yahwe alan, <Ɩ kara bʋn ɩ san ɩ ma kpà ma yɩɩwɔlɔn ɛbɛ Isareli bete fɔ. Ɛkamasɛ e biri ɛ san wɔ dɩkpaara, yema nmɩ n tɛ mɛ wʋ gɛlɛ.> >> Okoro bɛ nʋn Yahwe wanyun-gyebi fɔ, ɛkamasɛ e biri ɛ da wɔ dɩkpaara, anlɛ gɛtɛ Yahwe wanyun-gyebi ɩ dɔ̀ fɔ.
Yerobwam e ye Wurubwarɛ gama
25Wʋʋ gama fɔ, Yerobwam e sere gɛsarakʋn Sekem, Efarim wo-idon yɩɩ gɛtʋnkwaa gaanɩ gɛ ɛ sara dʋkɔ. E ye dʋkɔ, gɛ ɛ ma sere ɔpɔrɩ e silin Peniyeli, gɛ ɛ sara dʋkɔ.
26Gɛ Yerobwam ɛ dɔ̀ woturu waanɩ alan, <<Nkele bugyu fɔ baà biri bʋ̀ ba Dafidi dɩkpaara. 27Gengyi bɛnɩ nyabɛ bɛ̀ bʋn bɛ san bɛ ma tɛ gedi Yahwe Dikwo-dɩrɛ daanɩ Yerusalem fɔ, baamɩnlɛ yaà biri i fi ɩ san boofonte Yuda wogyu-dɩrɛ Rehobwam wakʋn. Baà wolo mɩ fɔ bàà biri san Yuda wogyu-dɩrɛ Rehobwam wakʋn.>> 28Gɛtɛ ɛ sara ma wamɩnlɛ yɩɩ bɛtɛlɛ e were fɔ, ɛ ka sɩka-sɩya ɛ mɛ akwɔbi anyɔɔ. Gɛ ɛ dɔ̀ bɛnɩ fɔ alan, <<Yɩɩ gɛbʋn-waran Yerusalem fɔ wʋ̀ sɔ gʋsɔ. Oo! Isareli bete, ɩ nya yii bekpen, gɛtɛ be tiri yɩ be ye Egyipiti gɛtʋnkwaa gaanɩ fɔ.>> 29E sere ekpen fɔ ɛkɩ Beteli, gɛ ɛ ka ɛnyɔɔfɛ fɔ ɛ ma sere Dan. 30Gɛ ade nyayɩ ɩ bɛ mɛ ade-kpen, yema bɛnɩ fɔ bɛ yɛ bɛɛ san sɩyɛɛ Dan bɛ ma sʋma ekpen fɔ dʋkɔ. 31Yerobwam e ni sere akpen-kwo idon yii koro, gɛ e tiri bɛnɩ ɛ mɛ gedi gii bɛtɛlɛ e ye bɛnɩ powu baanɩ, ma gɛtɛ ben di Lefi bete gba fɔ. 32Gɛ Yerobwam e tiri ebon-nɩyɛfɛ fɔ wo duwi fwo-tonfɛ fɔ ɛ sɩ̀ ɛ tɛ ɔsɛ wuu gedi-dɩrɛ anlɛ gɛtɛ bee di ɔsɛ Yuda fɔ. Gɛ ɛ tɛ gedi, gedi gɩɩ gɛtɛ̀kʋn fɔ gii koro. Gɛlɛ ke gɛ ɛ mɛ dɩkwɔbi gɛtɛ ɛ mɛ Beteli fɔ, gɛ ɛ tɛ dɩ gedi. Gɛ e tiri gedi gɩɩ bɛtɛlɛ ɛ sɩ̀ Beteli wo-idon yii koro fɔ bàà tɩ tɛ gedi. 33Ebon-nɩyɛfɛ wo duwi fwo-tonfɛ, n di ebon gɛtɛ ɛwɔ gbagba e tiri fɔ. Ɛ tɛ gedi, gedi gɩɩ gɛtɛ̀kʋn gɛtɛ e sere Beteli fɔ gii koro. Okoro ɛ sɩ̀ ɔsɛ wuu gedi fɔ ɛ tɛ Isareli bete gɛ ɛɛ bʋn ɛ san gatala dʋkɔ ɛ ma tɛ gedi.
Nke Ahọpụtara Ugbu A:
1 Begyu-dɩrɛ 12: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation