रोमियां 2
2
नरीकारा चा धर्मी न्यां
1 #
मत्ती 7:1; लूक 6:37 ऐवास्ते हे दोष लावणे आले, तु चाहे कुई वी कां ना हो, तु कुई वी बहाना ना बणा सग़ी, कांकि जिसी बाते मां तु ङुजा उपर दोष लावी, वेही बाते मां आपणे नु वी दोषी बणावी, ऐवास्ते कि जको तु दोष लावी, खौद्द ही ऊंही काम करी। 2ते अम्ही जाणु कि इसड़े-इसड़े काम करने आला उपर नरीकारा ची ओर कनु सच्चे ङण्ड ची आज्ञा हुवे वे। 3ते हे बन्दे, तु जको इसड़े-इसड़े काम करने आला उपर दोष लावी, ते खौद्द ही ऊंही काम करी, का तु समझी पला कि तु नरीकारा ची ङण्ड ची आज्ञा कनु बचती जाये? 4का तु बङी भलाई ते सहनशीलता, ते धीरजरुपी धन्न नु तोच्छ समझी? ते का ईं ना समझी कि नरीकारा ची भलाई तनु मन फिरावणे ची ओर गेहती जाये? 5पर आपणी कठोरता ते हठीले मन चे अनुसार, ओचे क्रोध चे ङिओ वास्ते, जाये मां नरीकारा चा सच्चा न्यां प्रकट हुवी, आपणे वास्ते क्रोध कमावी पला। 6नरीकार हर-हेक नु ओचे कामा चे अनुसार बदला ङिही। 7जको लगातार आच्छे काम करते हुले, महिमा ते आदर ते अनन्त जीवन ची खोज मां रिही, वानु नरीकार अनन्त जीवन ङिही। 8पर जको स्वार्थी छी ते सच्चाई नु ना मनी, बल्कि अधर्म नु मनी, वांचे उपर क्रोध ते क्रोप पड़ी। 9ते क्लेश ते मुसीबत हर-हेक इन्साना ची जेन्द उपर जको बुरे करी, आती पड़ी, पेहले यहूदिया उपर बल्ति नेरीया जातिया उपर पड़ी। 10पर महिमा ते आदर ते शान्ति हर-हेक नु मिली, जको भले करी, पेहले यहूदिया नु बल्ति नेरीया जातिया नु। 11कांकि नरीकार काया पक्षपात ना करी।
12ऐवास्ते कि जेह्णे बिना मूसा ची व्यवस्था गेहले पाप करला, वे बिना व्यवस्था चे नाश वी हुवे, ते जेह्णे व्यवस्था गेहती कर पाप करला, वांचा ङण्ड व्यवस्था चे अनुसार हुवी। 13कांकि नरीकारा ची नजरी मां, व्यवस्था नु सुणने आले धर्मी कोनी, पर व्यवस्था उपर चलणे आले धर्मी ठहराले जाये। 14बल्ति जिसे बेले नेरीया जातिया चे लौक जाये कनु व्यवस्था कोनी, सुभाव लारे ही व्यवस्था ची बाता उपर चली, तां व्यवस्था वांचे कनु ना हुवणे उपर वी वे आपणे आप वास्ते आप ही खौद्द व्यवस्था छी। 15वे आपणे कामा लारे व्यवस्था चा बाता आपणे आपणे दिला उपर लिखलीया हुलीया ङिखाणी, ते वांचे विवेक वी ग़वाही ङी, ते वांचे विचार कङी दोष लावे ते कङी वानु बेकसूर ठहरावे।
16ईं सब ओ ङिओ स्पष्ट हुती जई, जिसे ङिओ नरीकार सुसमाचार चे अनुसार जको मैं सुणावे, ईशु मसीह चे जरिये इन्साना ची गुप्त बाता चा न्यां करी।
यहूदी ते व्यवस्था
17तु आपणे आप नु यहूदी किही, व्यवस्था उपर भरोसा राखी, नरीकारा चे बारे मां घमण्ड करी। 18ते ओची इच्छा जाणी ते व्यवस्था ची शिक्षा पाती कर खास-खास बाता नु प्यारे जाणी। 19अगर तु आपणे-आप उपर भरोसा राखी कि, तु अन्धा चा अग़ुवा, ते अन्धारे मां पले आला ची ज्योति, 20ते ब़ुध्दिहीना चा सिखावणे आला, ते ब़ाला चा शिक्षक छी, कांकि व्यवस्था मां ज्ञान ते सच्चाई चा नमुना तनु मिड़ला छै। 21का तु नेरा नु सिखावी, आपणे-आप नु ना सिखावी? का तु चोरी ना करने चा उपदेश ङिही, तु आप-खौध्द ही चोरी करी? 22तु जको किही कि, “व्यभिचार ना करजा,” का आप-खौध्द ही व्यभिचार करी? तु जको मूर्तिया कनु नफरत करी, का आप-खौध्द ही मन्दरा नु लूटी? 23तु जको व्यवस्था चे बारे मां घमण्ड करी, का व्यवस्था ना मनती कर, नरीकारा चा अनादर करी? 24कांकि जिसड़े कि पवित्रशास्त्रा मां लिखले वी पले, “तम्ची वजह कनु नेरीया जातिया मां नरीकारा चे नांवा ची निन्दा करली जाये।”
यहूदी ते व्यवस्था
25अगर तम्ही व्यवस्था उपर चला, तां खतने लारे फायदा छै, पर अगर तम्ही व्यवस्था नु ना मना, तां तम्चा खतना, बिना खतने ची दशा ठहरला। 26तां अगर खतनारहित इन्सान व्यवस्था ची विधिया मनले करो, तां का ओची बिना खतने ची दशा खतने चे बराबर नी गिणली जई? 27ते ऊं इन्सान जाया शरीरिक रूपा कनु बिना खतने चे रेहले, अगर ऊं व्यवस्था नु पुरी करे, तां का तनु जको लिखली आली व्यवस्था मिड़ली ते खतना करले जाणे उपर वी व्यवस्था नु ना मनी, का दोषी नी ठहरावी? 28कांकि वे यहूदी कोनी जको सेर्फ ब़ाहरले रूपा मां यहूदी छी, ते ना सेर्फ शरीरा चा खतना, सच्चा खतना छै। 29सच्चा यहूदी ओही छै, जको मना कनु यहूदी छै। ते सच्चा खतना ओही छै, जको आत्मा चे जरिये दिला चा हुवे, ना कि लिखली आली व्यवस्था चा। इसड़े ची बढ़ाई इन्साना चे तरफु कोनी पर नरीकारा ची ओर कनु करली जाये।
Nke Ahọpụtara Ugbu A:
रोमियां 2: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0