रोमियां 15
15
ङुजा चा बोझ चवणा
1जरुरी छै कि अम्ही, जको विश्वास मां मजबूत छिऊं, वानु सहन करु जको विश्वास मां कमजोर छी, ना कि सेर्फ आपणे-आप नु खौश करु। 2अम्चे महु हर-हेक नु विश्वासीया नु ओची भलाई वास्ते खौश करा, कि वांची आत्मिक बढोतरी हो। 3कांकि मसीह ने आपणे आप नु खौश कोनी करले, जिंवे पवित्रशास्त्रा मां लिखले पले, “दुधी निन्दा करने आला ची निन्दा माये उपर आती पली।” 4जितनीया बाता पेहले कनु लिखलीया गेलीया वे अम्ची ही शिक्षा चे वास्ते लिखलीया गेलीया, ताकि अम्ही सब्र ते पवित्रशास्त्रा ची हिम्मत चे जरिये आस राखु। 5ते सब्र, ते हिम्मत चा दाता नरीकार तम्हानु हा वरदान ङियो, कि मसीह ईशु चे अनुसार आपस मां हेक मन रिहा, 6ताकि तम्ही हेक मन ते हेक ही अवाज हुती कर अम्चे प्रभु ईशु मसीह चे ब़ा नरीकारा ची स्तुति करा।
7ऐवास्ते, जिसड़े मसीह ने वी नरीकारा ची महिमा चे वास्ते तम्हानु ग्रहण करले, यूंही तम्ही वी हेके-ङुजे नु ग्रहण करा। 8मैं किहे कि, जको वायदा नरीकारा ने पुरखा लारे करला गेला हुता, ओनु मजबूत करने वास्ते ते नरीकारा ची सच्चाई चा सबूत ङेणे वास्ते, मसीह खतना करले आले लौका चा सेवक बणला, 9ते नेरीया जातिया वी नरीकारा नु ओची दया ची वजह स्तुति करो, जिसड़े कि पवित्रशास्त्रा मां लिखले पले,
“ऐवास्ते मैं नेरीया जातिया मां दुधा धन्यवाद करी,
ते दुधे नांवा चे भज़न गावी।”
10ते ईं वी केहले गेले,
“हे नेरीया जातिया चे सारे लौक,
ओची प्रजा लारे खौश रिहा।”
11ते बल्ति पवित्रशास्त्र ईं वी किहे,
“हे नेरीया जातिया चे सारे लौक, प्रभु ची स्तुति करा,
ते हे सब लौक, ओची स्तुति करा।”
12ते बल्ति भविष्यवक्ता यशायाह हा वी किहे,
“यिशै ची हेक वंश प्रकट हुवी,
ते ओ नेरीया जातिया उपर शासन करने चे वास्ते हेक खड़ा हुवी,
ते ओचे उपर नेरीया जातिया आस राखे।”
13ऐवास्ते नरीकार जको आस चा दाता छै, तम्हानु विश्वास करने मां ते हर-तरहा ची खुशी ते शान्ति लारे भरती नाखो, कि पवित्र आत्मा ची सामर्थ लारे तम्ची आस बधती जाओ।
पौलुस चे जरिये आपणी चिठ्ठी ते कामा ची चर्चा
14हे माये भऊ, मैं आप वी खौद्द तम्चे बारे मां पक्के ही जाणे कि, तम्ही आप ही भलाई लारे भरीले आले छिवा ते ज्ञान मां भरपूर छिवा ताकि हेके-ङुजे नु समझा सग़ा। 15तां वी मैं किठी-किठी याद ङिवाणे वास्ते तम्हानु बङी हिम्मत करती कर लिखले, ईं वे अनुग्रह चे जरिये हुले, जको नरीकारा ने मनु ङिला। 16कि मैं नेरीया जातिया वास्ते मसीह ईशु चा सेवक हुती कर नरीकारा चे सुसमाचार ची सेवा हेक याजक चे समान करे, जाये कनु नेरीया जातिया चे मनती गिहा कि भेंट चढ़ाले जाणे, पवित्र आत्मा लारे पवित्र बणती कर ग्रहण करला जाये।
17ऐवास्ते वां बाता चे बारे मां जको नरीकारा लारे सम्बन्ध राखी, मैं मसीह ईशु मां गर्व कर सग़े। 18कांकि वां बाता नु छोड़ती कर मनु नेरी कुई बात केहणे ची हिम्मत कोनी, जको मसीह ने नेरीया जातिया नु नरीकारा ची अधीनता स्वीकार करने वास्ते माये वचन, ते कर्म, 19ते चैन्ह ते अदभोत कामा ची सामर्थ लारे, ते पवित्र आत्मा ची सामर्थ लारे माये ही जरिये करले गेले। इठे तक मैं यरुशलेम कनु लाती कर चऊं पासु ते इल्लुरिकुम तक मसीह चे सुसमाचार चा पूरा-पूरा प्रचार करला। 20पर माये मना ची इच्छा हा छै कि, जिठे-जिठे मसीह चे नां कोनी गेहले गेले, उठी सुसमाचार सुणावे, इसड़े ना हो, कि ङुजे ची नीम उपर घर बणावे। 21पर जिसड़े कि पवित्रशास्त्रा मां लिखले पले,
“जानु ओचा सुसमाचार कोनी पुज़ला वे ही ङेखे,
ते जेह्णे कोनी सुणले वे ही समझे।”
पौलुस ची रोम नु जाणे ची योजना
22 #
रोमि 1:13
माई इठली सेवा ची वजह कनु मैं तम्चे गोढु आणे कनु बार-बार रुकला रेहला।
23पर हमा यां देशा मां माये काम करने ची जग़हा कोनी रेहली, ते ब़ोहत साला कनु मनु तम्चे गोढु आणे ची इच्छा छै। 24ऐवास्ते जब मैं स्पेन जई तां तम्चे गोढु हुता हुला जई कांकि माई उम्मीद छै कि, ओ सफरा मां तम्चे लारे भेंट करे, ते जब तम्ची संगति लारे माये जी कोच्छ भरीती जई, तां तम्ही मनु कोच्छ दूर आग़ु पुचाती ङिजा।
25 #
1 कुरि 16:1–4
पर हमा तां नरीकारा चे लौका ची सेवा करने वास्ते यरुशलेम सनु जाये पला। 26कांकि मकिदुनिया ते अखाया प्रदेस चे लौका नु ईं आच्छे लाग़ले कि, यरुशलेम चे नरीकारा चे लौक जको कंगाल छी वांचे वास्ते कोच्छ चंद ङिहें। 27#1 कुरि 9:11आच्छे तां लाग़ले, पर वे वांचे कर्जदार वी छी, कांकि अगर नेरीया जातिया वांचीया आत्मिक बाता मां शामिल हुले तां वांचे वास्ते वाजिब छै कि, संसारिक चीजा लारे वांची सेवा करा। 28ऐवास्ते मैं ईं काम पुरे करती कर, ते वानु हा चन्दा सपोत्र करती कर तम्चे गोढु हुता हुला स्पेन सनु जई। 29ते मैं जाणे, कि जिसे बेले मैं तम्चे गोढु आवी, तां मसीह ची पुरी आशीष चे लारे आवी।
30ते हे माये भऊ, मैं ईशु मसीह चा, जको अम्चा प्रभु छै ते पवित्र आत्मा चे प्रेम ची याद ङिवाती कर, तम्चे कनु बिनती करे पला, कि माये वास्ते नरीकारा कनु प्राथना करने मां माये लारे मिलती कर लौ लाली रिहा। 31प्राथना करा कि मैं यहूदिया प्रदेस चे अविश्वासी लौका कनु बचला रिहे, ते माई वा सेवा जको यरुशलेम वास्ते छै, उठले नरीकारा चे लौका नु भाओ, 32तां मैं नरीकारा ची इच्छा लारे तम्चे गोढु खुशी लारे आती कर तम्चे लारे आराम कर सग़े। 33शान्ति चा नरीकार तम्चे सारा चे लारे रिहो। आमीन।
Nke Ahọpụtara Ugbu A:
रोमियां 15: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0