रोमियां 13
13
अधिकारीया ची आज्ञा मना
1हर-हेक इन्सान अधिकारीया चे अधीन रिहो, कांकि कुई अधिकार इसड़े कोनी, जको नरीकारा ची ओर कनु ना हो, ते जको अधिकार छी, वे नरीकारा चे ठहराले आले छी। 2ऐवास्ते जको कुई अधिकारा चा विरोध करे, ओ नरीकारा ची आज्ञा चा विरोध करे, ते विरोध करने आले ङण्ड भोग़े। 3कांकि हाकिम आच्छे कामा चे कोनी, पर बुरे कामा वास्ते ङरा ची वजह छी, अगर तु हाकिमा कनु बेखौफ रेहणे चाहवी, ते आच्छे काम कर ते ओची ओर कनु दुधी प्रशंसा हुवी।
4कांकि ओ दुधी भलाई वास्ते नरीकारा चा सेवक छै। पर अगर तु बुराई करी, तां ङर राख, कांकि ओ तलवार बेकार मां कोनी चली फिरे ते नरीकारा चा सेवक छै, कि ओचे गुस्से चे अनुसार गन्दे काम करने आला नु ङण्ड ङियो। 5ऐवास्ते ओचे अधीन रेहणे जरुरी छै, ते ना सेर्फ ओचे क्रोध ची वजह कनु पर तम्चे आपणे विवेक ची वजह कनु वी।
6 #
मत्ती 22:21; मरकु 12:17; लूक 20:25 ऐवास्ते लगान वी ङिया, कांकि शासन करने आले नरीकारा चे सेवक छी, ते सदा ऐह कामा मां लाग़ले रिही। 7ऐवास्ते जाई कोच्छ उधार छै ओनु चुकाती ङे, जानु लगान चाही छै, ओनु लगान ङिया, जानु चुंगी ङेणी चाही छै, ओनु चुंगी ङिया, जाये कनु ङरणे चाही छै, ओचे कनु ङरा, जाया आदर करना चाही छै, ओचा आदर करा।
प्रेम ही व्यवस्था छै
8आपसी प्रेम चे अलावा ते नेरी कुई बाते मां काया वी कर्जदार ना हुवा, कांकि जको ङुजा लारे प्रेम राखे, ओणे ही व्यवस्था नु पुरे करले। 9मैं ईं ऐवास्ते किहे पला कि, “व्यभिचार ना करजा, हत्या ना करजा, चोरी ना करजा, लालच ना करजा,” ते याहनु छोड़ती कर नेरी कुई वी आज्ञा हो तां सारा चा निचोड़ ये बाते मां लाभला जाये कि, “आपणे पड़ोसीया लारे आपणे जिसड़ा प्रेम राख।” 10प्रेम पड़ोसी ची कुई बुराई ना करी, ऐवास्ते प्रेम राखणे व्यवस्था नु पुरे करने छै।
11ते समय नु पिछाणती कर इसड़े ही करा, ऐवास्ते कि हमा तम्चे वास्ते नीङे कनु सुज़ाक हुवणे ची घड़ी आती पुज़ली, कांकि जिसे बेले अम्ही विश्वास करला हुता, ओ समय चे हिसाबा लारे अम्चा उद्धार गोढु छै। 12रात घणी बीतती चुकली, ते ङिओ निकलणे उपर छै, ऐवास्ते अम्ही अन्धकार चे कामा नु छोड़ती कर ज्योति चे हथियार कसती गिहा। 13जिंवे ङिहां मां अम्ही रिहुं वी, यूंही अम्हानु सिधी चाल चलणी चाही छै, ना कि लीलाक्रीड़ा, ते पियक्कड़पन, ना व्यभिचार, ते लोचपण मां, ते ना ही झग़ड़े ते ईर्ष्या मां लाग़ले रिहा। 14बल्कि ईशु मसीह चे सुभाव नु धारण करती गिहा, ते शरीरा चीया इच्छा नु पुरीया करने मां ही ना लाग़ले रिहा।
Nke Ahọpụtara Ugbu A:
रोमियां 13: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0