मरकुस 8
8
चार हजार लौका नु खुलावणे
(मत्ती 15:32–39)
1वा ङिहां मां जब बल्ति बङी भीड़ भेली हुली। ते वांचे कनु कोच्छ खाणे वास्ते कोनी हुते, तां ईशु ने आपणे चैला नु गोढु हकारती कर वानु केहले, 2“मनु ये भीड़ी उपर तरस आवे पला, कांकि ये तीन ङिहां कनु लगातार माये लारे छी, वांचे कनु कोच्छ वी खाणे वास्ते कोनी। 3अगर मैं याहनु घरे भुक्के भेज़ती ङिये तां मार्ग़ा मां थाकती कर रेहती जाये, कांकि यांचे महु कुई-कुई दूर कनु आले।”
4ओचे चैला ने ओनु उत्तर ङिला , “ऐ बरब्यान जग़हा मां इतनीया रोटीया किठु आणु कि ये रज़ो?”
5ईशु ने वाकनु पूछले, “तम्चे कनु कितनीया रोटीया छी?”
वाणे केहले, “सात।”
6बल्ति ईशु ने लौका नु भोंये उपर ब़ेसणे ची आज्ञा ङिली, ते वे सात रोटीया चलीया ते नरीकारा चा धन्यवाद करती कर भांलीया, ते आपणे चैला नु ङिता गेला कि वांचे आग़ु मेहलो,ते वाणे लौका चे आग़ु परोसती ङिले। 7वांचे कनु थोड़ीया जा छोटीया माछलीया वी हुतीया, ईशु ने नरीकारा चा धन्यवाद करती कर वानु लौका चे आग़ु मेहलणे ची आज्ञा ङिली। 8वे खाती कर रज़ती गेले ते चैला ने बाकि रोटीया चे सात टोकरे भरले आले चले। 9ते लौक चार हजार चे लगभग हुते, बल्ति ईशु ने वानु विदा करले। 10ते वे तुरन्त आपणे चैला लारे ब़ेड़ी उपर चढ़ती कर दलमनूता प्रदेस नु चाह्ला गेला।
फरीसिया ने ईशु कनु स्वर्ग़ा चा निशान मांगला
(मत्ती 16:1–4)
11 #
मत्ती 12:38; लूक 11:16 बल्ति फरीसी आती कर ईशु लारे विवाद करु लाग़ले, ते ओनु परखणे वास्ते ओकनु कुई स्वर्ग़ा चा चैन्ह मांगला। 12#मत्ती 12:39; लूक 11:29ईशु ने आपणी आत्मा मां आंह भरती कर केहले, “ऐ समय चे लौक कां चैन्ह सोधी? मैं तम्हानु सच्च किहे पला कि ऐ समय चे लौका नु कुई नेरा चैन्ह नी ङिला जई।”
13बल्ति ओ वानु छोड़ती कर चैला लारे ब़ेड़ी मां ब़ेसती ते झील चे पेले किनारे चाह्ला गेला।
फरीसी ते हेरोदेस चा खमीर
(मत्ती 16:5–12)
14ईशु चे चैले रोटी आणने भूलती गेलते, ते ब़ेड़ी मां वांचे कनु हेक ही रोटी हुती। 15#लूक 12:1ईशु ने वानु चिताले, “ङेखा, फरीसिया चे खमीर ते हेरोदेस चे खमीर कनु चौकस रिहा!”
16वे आपस मां विचार करु लाग़ले, “अम्चे कनु रोटी कोनी।”
17ईं जाणती कर ईशु ने वानु केहले, “तम्ही कां आपस मां हा विचार करा पले कि अम्चे कनु रोटी कोनी? का हमा तक ना जाणा ते ना समझा? का तम्चे मन कठोर हुती गेले? 18#मरकु 4:12का आंखीया राखते हुले वी ना ङेखा, ते कान राखते हुले वी ना सुणा? ते का तम्हानु याद कोनी, 19कि जब मैं पाँचा हजारा चे वास्ते पाँच रोटीया भांलीया हुतीया तां तम्ही बचलीया आलीया रोटीया चे कितने टोकरे भरती कर चले?”
वाणे ओनु केहले, “ब़ारहा टोकरे।”
20“ते जब चार हजारा चे वास्ते सात रोटीया हुतीया तां तम्ही रोटीया चे कितने टोकरे भरती कर चले हुते?”
वाणे ओनु केहले, “सात टोकरे।”
21ओणे वानु केहले, “का तम्ही हमा तक कोनी समझले?”
अन्धे नु ङेखणे ची सामर्थ ङिली
22बल्ति वे बैतसैदा आले, कई लौक हेक अन्धे नु ईशु कनु आणले ते बिनती करली कि ऐनू हाथ ला। 23ओणे अन्धे बन्दे चा हाथ पकड़ला ते ओनु गांवा चे ब़ाहरु गेहती गेला। ओणे ओची आंखीया उपर थूकले ते आपणा ओचे उपर हाथ मेहले, बल्ति ओनु केहले, “का तनु कहीं ङिसे पले?”
24ङेखती कर ओणे केहले, “मनु लौक ङिसे पले वे आस-पास टुरते पेड़ा जिसड़े लाग़ी पले।”
25बल्ति ईशु ने दुबारा ओचीया आंखीया उपर जिंवे हाथ मेहला, अन्धे ने गौरा लारे ङेखले। ते ओनु सोज़ले मिलती गेले। ओ सारे कोच्छ साफ-साफ ङेखु लाग़ती गेला। 26बल्ति ईशु ने ओनु केहले, “तु ये गांवा मां पग़्ग़ ही ना मेहलीयो” ते घरे भेज़ती ङिले।
पतरस ने ईशु नु केहले तु मसीह छी
(मत्ती 16:13–20; लूका 9:18–21)
27ईशु ते ओचे चैले कैसरिया फिलिप्पी चे गांवा मां चाह्ले गेले। मार्ग़ा मां ओणे आपणे चैला कनु पूछले, “लौक मनु का किही ?”
28 #
मरकु 6:14,15; लूक 9:7,8 वाणे उत्तर ङिला, “यूहन्ना बपतिस्मा ङेणे आला,पर कुई एलिय्याह ते कुई-कुई भविष्यवक्ता महु हेक किही।”
29 #
यूह 6:68,69 ईशु ने वांचे कनु पूछले, “पर तम्ही मनु का किहा ?” पतरस ने ओनु उत्तर ङिला, “तु मसीह छी।”
30तब ओणे वानु चिताती कर केहले कि माये बारे मां ईं कानु ना केहजा।
ईशु ने आपणे ङोख ते मौत चे बारे मां बावड़ले
(मत्ती 16:21–28; लूका 9:22–27)
31बल्ति ओ वानु सिखाऊं लाग़ला कि, “मैं इन्साना चे पूता चे वास्ते जरुरी छै कि ओ ब़ोहत ङोख चाओ, ते बङके ते प्रधान याजक, ते शास्त्री ओनु, तोच्छ समझती कर मारती नाखो, ते ओ तीजे ङिओ जीता हुती जाओ।” 32ओणे हा बात वानु साफ-साफ केहती ङिली। ऐचे उपर पतरस ओनु अलग़ गेहती कर झिड़कु लाग़ला, 33पर ईशु ने मुड़ती कर आपणे चैला ची तरफ ङेखले, ते पतरस नु झिड़कती कर केहले, “हे शैतान, माये सामणे कनु दूर हो, कांकि तु नरीकारा चीया बाता उपर ना, पर इन्साना चीया बाता उपर मन लावी।”
34 #
मत्ती 10:38; लूक 14:27 ओणे भीड़ नु आपणे चैला समेत गोढु हकारती कर वानु केहले, “जको कुई माये भांसु आणा चाहवे, ऊं आपणे आप कनु इन्कार करो ते आपणा क्रूस चती कर माये भांसु हुती पड़ो। 35#मत्ती 10:39; लूक 17:33; यूह 12:25कांकि जको कुई आपणी जीन्दगी बचावणा चाहवे ओ विनु गुंती ब़ेसी, पर जको कुई माये ते सुसमाचारा चे वास्ते आपणी जीन्दगी गुंवी, ओ विनु बचावी। 36अगर इन्सान सारे संसारा नु हांसिल करे ते आपणी जीन्दगी चे नुकसान चवे, तां ओनु का फायदा? 37इन्सान आपणी जीन्दगी चे बदले का ङी। 38जको कुई ये व्यभिचार ते पापी जाति चे बीच माये कनु ते माया बाता कनु लज़ावी, मैं इन्साना चा पूत वी जिसे बेले पवित्र स्वर्ग़दूता चे लारे आपणे ब़ा नरीकारा ची महिमा लारे आवी, तब ओकनु वी लज़ावी।”
Nke Ahọpụtara Ugbu A:
मरकुस 8: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0