मरकुस 6
6
ईशु नासरत शहरा मां बेइज्जत
(मत्ती 13:53–58; लूका 4:16–30)
1उठु निकलती कर ईशु आपणे शहरा मां आला, ते ओचे चैले वी ओचे भांसु गेले। 2सब्त चे ङिओ ओ प्राथनाघरा मां उपदेश ङिऊं लाग़ला। ते ब़ोहत से लौक सुणती ते अचम्भित हुती कर किहुं लाग़ले, “ऐनू ये बाता किठु आती गेलीया? हा किसा ज्ञान छै जको ओनु ङिला गेला? किसड़े सामर्थ चे काम ऐचे हाथा कनु प्रकट हुवी? 3का हा ओही दरखाण कोनी, जको मरियम चा पूत, ते याकूब, योसेस, यहूदा, ते शमौन चा भऊ छै? का ऐचीया ब़ेहणी अम्चे बीच मां ना रिही?” ऐवास्ते वाणे ओचे बारे मां ठोकर खाली।
4 #
यूह 4:44
ईशु ने वानु केहले, “भविष्यवक्ता चे आपणे देश, ते आपणे कुणम्बे, ते आपणे घरा नु छोड़ती नेरे किठी वी निरादर ना हुवी।”
5ओ ओठे कुई सामर्थ चे काम ना कर सग़ला, सेर्फ थोड़े जा बिमारा उपर हाथ मेहलती कर वानु ठीक करले। 6ते ओनु वांचे अविश्वास चे उपर अचम्भा हुला, ते ओ चारो-तरफ चे गांवा मां उपदेश करता फिरला।
ईशु ने आपणे ब़ारहा प्रेरिता नु भेज़ले
(मत्ती 10:5–15; लूका 9:1–6)
7ईशु ने ब़ारहा नु आपणे गोढु हकारले। ते वानु ङोन ङोन करती कर भेज़ु लाग़ला, ते वानु अशुद्ध आत्मा चे उपर अधिकार ङिला। 8ते ओणे वानु आज्ञा ङिली, “मार्ग़ा चे वास्ते ङांग छोड़ती कर नेरे कहीं ना चवा, ना तां रोटी, ना झोली, ना ब़टुवे मां पैसे। 9पर जुत्तीया घाला ते ङोन-ङोन चोले ना घाला।” 10ते ओणे वानु केहले, “जिठे-किठी तम्ही कुई घरा मां जावा, तां जब तक उठु विदा ना हुवा तब तक ओही घरा मां रुकले रिहा।
11 #
प्रेरि 13:51
#
लूक 10:4–11
“जिसी जग़हा चे लौक तम्हानु ग्रहण ना करो ते तम्ची ना सुणो, उठु निकलते ही आपणे पग़्ग़ा ची धूड़ झाड़ती नाखा, कि वांचे उपर ग़वाही हो।”
12तब वाणे जती कर प्रचार करला कि मन फिरावा। 13#याकू 5:14ते ब़ोहत सारीया दुष्टात्मा नु काढ़ले, ते ब़ोहत सारे बिमारा नु जैतून चे तेल लाती कर ठीक करले।
बपतिस्मा ङेणे आले यूहन्ना ची हत्या
(मत्ती 14:1–12; लूका 9:7–9)
14 #
मत्ती 16:14; मरकु 8:28; लूक 9:19 राजा हेरोदेस ने वी ईशु ची चर्चा सुणली, कांकि ईशु चे नां फैलती गेलते। ते ओणे केहले, यूहन्ना बपतिस्मा ङेणे आला मरला आला महु जीता हुती गेला, ऐवास्ते ओचे कनु सामर्थ चे काम प्रकट हुवी पले।
15नेरे ने केहले कि, “कि एलिय्याह छै।”
पर कोच्छ नेरा ने केहले, “भविष्यवक्ता जा भविष्यवक्ता महु कुई हेके जिसड़ा छै।”
16ईं सुणती कर हेरोदेस ने केहले, “जिसे यूहन्ना चे मैं ठोङ बढवाले हुते, ओही जीता हुती आला।” 17#लूक 3:19,20 हेरोदेस ने आपणे भावा फिलिप्पुस ची घराआली हेरोदियास ची वजह , जाये लारे ओणे बीहा करती गेलता, लौका नु भेज़ती कर यूहन्ना नु पकड़वाती कर कैदखाने मां नाखती ङिलते। 18कांकि यूहन्ना ने हेरोदेस नु केहले हुते कि, “आपणे भावा ची घराआली नु राखणे तनु वाजिब कोनी।” 19ऐवास्ते हेरोदियास ओकनु बैर राखती। ते ईं चाहती कि ओनु मरवाती नाखे, पर इसड़े ना हो सग़ले। 20कांकि हेरोदेस यूहन्ना नु धर्मी ते पवित्र मर्द जाणती कर ओकनु ङरता, ते ओनु बचाली राखता, ते ओचीया बाता सुणती कर ब़ोहत घब़राता, पर खुशी लारे सुणता।
21ठीक मौका आला जब हेरोदेस ने आपणे जनम ङिओ मां आपणे प्रधाना, ते सैनापतिया, ते गलील चे बङे लौका वास्ते बङा भोज़ करला। 22तां हेरोदियास ची धूउ भीतर आली, ते नचती कर हेरोदेस नु ते ओचे लारे ब़ेसणे आला नु खौश करले। बल्ति राजे ने छुवेरी नु केहले, “तु जको चाहवी माये कनु मांग मैं तनु ङिही।” 23ते ओणे कसम खाली, “मैं आपणे आधे राज़ तक जको कोच्छ तु माये कनु मांगे, मैं तनु ङी।”
24विणे ब़ाहर जती कर आपणी आई कनु पूछले, “मैं का मांगे?” वा ब़ोली, “यूहन्ना बपतिस्मा ङेणे आले चे ठोङ।”
25वा तुरन्त राजे चे गोढु भीतर आली ते ओकनु विनती करली, “मैं चाहवे कि तु हमा ही यूहन्ना बपतिस्मा ङेणे आले चे ठोङ हेके थाला मां मनु मंगवाती ङे।”
26बल्ति राजा ब़ोहत उदास हुला, पर आपणी कसम ची वजह ते लारे ब़ेसणे आला ची वजह ओनु टालणे ना चाह्ले। 27तां राजे ने तुरन्त हेके सिपाहीया नु आज्ञा ङिती कर भेज़ले कि यूहन्ना चे ठोङ बढवाती आणा। 28ओणे कैदखाने मां जती कर ओचे ठोङ बाढले, ते हेके थाला मां मेहलती कर आणले ते छुवेरी नु ङिले, ते ओनु विणे आपणी आई नु ङिले। 29ईं सुणती कर यूहन्ना चे चैले आले, ते ओची लाशे नु चती गेले ते कब्री मां मेहले।
ईशु ने पाँच हजार लौका नु रोटी खुलाली
(मत्ती 14:13–21; लूका 9:10–17; यूहन्ना 6:1–14)
30प्रेरितां ने ईशु चे गोढु भेले हुती कर, जको कोच्छ वाणे करले ते सिखाले हुते, सब ओनु बावड़ले। 31बल्ति ईशु ने वानु केहले, “आवा माये लारे कुई हेकली जग़हा मां चाह्ला ते थोड़ा जा आराम करा।” कांकि ओठे घणा बन्दा चे आणे-जाणे लाग़ले भिलते ले ते वानु रोटी खाणे चा वी मौका ना मिलता। 32ऐवास्ते वे ब़ेड़ी उपर चढ़ती कर, बरब्यान जग़हा मां अलग़ चाह्ले गेले।
33ब़ोहत से लौका ने वानु जते ङेखती कर पिछाणती गेले, ते सब शहरा महु भेले हुती कर ओठे पैदल द्रोड़ले ते वाकनु पेहले जती पुज़ले 34#मत्ती 9:36 ईशु ब़ेड़ी कनु उतरती कर बङी भीड़ ङेखली। तां वांचे उपर तरस खाला कांकि वे वां भेङा आलीकर हुते, जाया कुई आजड़ी ना हो, तां ओ वानु ब़ोहत सारीया बाता सिखाऊं लाग़ला। 35जिसे बेले ङिओ ब़ोहत ढलती गेला। तां ओचे चैले ओचे गोढु आती कर किहुं लाग़ले, “हा बरब्यान जग़हा छै, ते ङिओ ब़ोहत ढलती गेला। 36वानु विदा कर कि वे आस-पास चे गांवा ते बस्तीया मां जती कर, आपणे वास्ते कोच्छ खाणे मोल गिहो।”
37ओणे उत्तर ङिला, “तम्ही ही वानु खाणे वास्ते ङिया।”
वाणे ओनु केहले, “का अम्ही साऔ चान्दी चे सिक्का चा रोटीया मोल गिहुं,ते वानु खुलाऊं?”
38ईशु ने वानु केहले, “जती कर ङेखा तम्हा कनु कितनीया रोटीया छी?” वाणे पता करती कर केहले, “पाँच रोटीया ते ङोन माछलीया वी।”
39बल्ति ओणे वानु आज्ञा ङिली कि सब नु सावे खड़ा उपर पंगती मां ब़िसाणती ङिया। 40वे साऔ-साऔ ते पंजहा-पंजहा करती कर पंगती मां ब़ेसती रेहले। 41ते ओणे वे पाँच रोटीया ङोन माछलीया नु चले ते स्वर्ग़ा सनु ङेखती कर नरीकारा चा धन्यवाद करला, रोटीया भान्ती-भान्ती कर चैला नु ङिता गेला कि वे लौका नु खाणे वास्ते ङियो, ते वे ङोन माछलीया वी वां सब मां बांटती ङिलीया। 42सब खाती कर रज़ती गेले 43ते चैला ने रोटीया लारे ब़ारहा टोकरे भरती कर चले, ते कोच्छ माछलीया कनु वी। 44जेह्णे रोटीया खालीया, वे पाँच हजार मर्द हुते।
ईशु चे पाणीया उपर चलणे
(मत्ती 14:22–33; यूहन्ना 6:15–21)
45तब ईशु ने तुरन्त आपणे चैला नु ब़ेड़ी उपर चढ़ावणे वास्ते मजबूर करले कि वे ओकनु पेहले झील चे पार बैतसैदा नु चाह्ले जाओ, जब तक कि ओ लौका नु विदा करो 46वानु विदा करती कर ओ पहाड़ा उपर प्राथना करने वास्ते गेला 47ते जिसे बेले ङिओ थोला, तां ब़ेड़ी झील चे बीच मां हुती, ओ हेकला भोंये उपर हुता 48जब ओणे ङेखले कि वे ब़ेड़ी चलाते-चलाते घब़राती गेले। कांकि हवा वांचे सामणे ची हुती। तां राती चे चौथे पाहरा चे गोढु ओ झीली उपर टुरते हुले वांचे गोढु आला, ते वांचे आग़ु निकलती जाणा चाहवे ला। 49पर वाणे ओनु झीली चे उपर टुरते ङेखती कर समझले कि भूत छै, ते धाड़-धाड़ करु लाग़ले 50कांकि सब ओनु ङेखती कर घब़राती गेलते।
पर ईशु ने तुरन्त वांचे लारे बाता करलीया ते केहले, “हिम्मत राखा! मैं छै! ङरा ना!” 51बल्ति ओ वांचे गोढु ब़ेड़ी उपर आला, ते हवा रुकती गेली। ते वे ब़ोहत ही अचम्भा करु लाग़ले। 52कांकि वांचे मन कठोर हुती गेलते, ऐवास्ते वे रोटीया चे आश्चर्य कर्म चे बारे मां कोनी समझले हुते।
ईशु ने गन्नेसरत मां चंगाई ङिली
(मत्ती 14:34–36)
53वे झील पार करती कर गन्नेसरत प्रदेस मां पुज़ले, ते ब़ेड़ी घाट चे उपर लाली। 54जिसे बेले वे ब़ेड़ी चे उपरु उतरले, तां लौका ने तुरन्त ओनु पिछाणती कर 55आस-पास चे सारे देशा मां द्रोड़ले, ते बिमारा नु खाटा उपर नाखती कर, जिठे-जिठे समाचार सुणला कि ईशु छै। ओठे-ओठे गेहली फिरले। 56ते जिठे-किठी ओ गांवा, शहरा मां जा बस्तीया मां जता, लौक बिमारा नु बजारा मां मेहलती कर ओकनु बिनती करते कि ओ वानु आपणे ओढ़णा चे पांदा नु हाथ लाऊं ङियो। ते जितना ने ओनु हाथ लाला, वे सारे ठीक हुती गेले।
Nke Ahọpụtara Ugbu A:
मरकुस 6: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0