मरकुस 11
11
यरुशलेम मां जीत चा प्रवेश
(मत्ती 21:1–11; लूका 19:28–40; यूहन्ना 12:12–19)
1जब वे यरुशलेम चे गोढु, जैतून पहाड़ा उपर बैतफगे ते बैतनिय्याह चे लारे आले तां ईशु ने आपणे चैला महु ङुंहु नु ईं केहती कर भेज़ले, 2“सामणे चे गांवा मां जावा, ते ओचे मां पुज़ते ही हेक गाहड़ी चे ब़च्चे, जाये उपर कङी कुई कोनी चढ़ले, ब़झले आले तम्हानु मिली। ओनु खोलती कर गेहती आवा। 3ते अगर कुई तम्हा कनु पूछे, ‘ईं कां करा पले?’ तां केहजा, ‘प्रभु नु ऐची जरुरत छै,’ ते ओ तुरन्त ओनु इठे भेज़ती ङी।”
4वाणे जती कर ओ ब़च्चे नु ब़हार दरवाजे चे गोढु चौका मां ब़झले आले ङेखले, ते खोलु लाग़ले। 5वांचे महु जको ओठे भिले हुते, कुई-कुई किहुं लाग़ले, “ईं का करा पले, गाहड़ो चे ब़च्चे नु कां खोला पले?”
6जिंवे ईशु ने केहले हुते, यूंही वाणे वानु केहती ङिले, तब लौका ने वानु जऊं ङिले। 7वाणे ब़च्चे नु ओचे गोढु आणती कर ते ओचे उपर आपणी ओढ़णी नाखली ते ईशु ओचे उपर ब़ेसती रेहला। 8ते ब़ोहत लौका ने आपणी ओढ़णी मार्ग़ा मां बिछाली ते नेरे लौका ने खेता महु लड़ीया बाढती-बाढती कर बिछाती ङिलीया 9जको भीड़ ओचे आग़ु-आग़ु जती ते भांसु-भांसु आती हुली, ऊंची अवाजी मां किहे पलती, “होशना! धन्न छै ओ जको प्रभु चे नांवा लारे आवे पला। 10अम्चे ब़ा दाऊद चा राज़ जको आवे पला,धन्न छै! आसमाना मां होशना।”
11ओ यरुशलेम शहरा मां पुज़ती कर ते मन्दरा मां आला, ते ओणे चारो-तरफ सब चीजा नु ङेखती कर ब़ारहा चैला चे लारे बैतनिय्याह गेला, कांकि आथण हुती गेलती।
ईशु चा अंजीर चे पेड़ा नु श्राप
(मत्ती 21:18,19)
12ङुजे ङिओ जब वे बैतनिय्याह कनु निकड़ले तां ईशु नु भोक्क लाग़ली। 13ओ दूरी कनु सावे अंजीरा चे दरख्त ङेखती कर गोढु गेला कि का पता ओचे मां कोच्छ मिलो, पर पाना नु छोड़ती कोच्छ कोनी मिड़ले, कांकि फला चा समय कोनी हुता। 14ऐचे उपर ओणे ओनु केहले, “हमा कनु कुई दुधा फल कङी नी खई!”
ते ओचे चैले सुणी भिलते।
ईशु चे मन्दरा मां जाणे
(मत्ती 21:12–17; लूका 19:45–48; यूहन्ना 2:13–22)
15बल्ति वे यरुशलेम आले, ते ओ मन्दरा मां गेला, ते जको लेन-देन करी पलते वानु ब़ाहर काढ़ु लाग़ला, ते सराफा चे तखत ते कबूतर बेचणे आला चा चौकीया पलटती नाखलीया। 16ते ओणे मन्दरा ची चार दिवारी महु हुती कर कानु वी समान कोनी ढोऊं ङिला, 17उपदेश करती कर वानु केहले, “का ईं कोनी लिखले आले छै माये घर सारीया जातिया वास्ते प्राथना चे घर किहवावी? पर तम्ही ओनु ङाकुवा ची घौर बणाती नाखली।”
18ईं सुणती कर प्रधान याजक ते शास्त्री ओनु खत्तम करने चा मौका सोधी पलते, कांकि वे ओचे कनु ङरते, ऐवास्ते कि सारे लौक ओचे उपदेश कनु अचम्भे मां हुती जते।
19बल्ति आथण हुवणे आले हुते, वे शहरा कनु ब़ाहरु निकलती गेले।
सूखले आले अंजीरा चे पेड़ा ची मिसाल
(मत्ती 21:20–22)
20आग़ले ङिओ सवेले जिसे बेले ईशु आपणे चैला लारे जाये पलता ते वाणे ओ अंजीर चे पेड़ा नु ज़हड़े तक सूखले आले ङेखले। 21पतरस नु हा बात याद आली, ते ओणे ओनु केहले, “हे रब्बी, ङेख! ईं अंजीरा चे दरख्त जानु तु श्राप ङिला हुता, सूखती गेले।”
22ईशु ने ओनु उत्तर ङिला, “नरीकारा उपर, विश्वास राखा। 23#मत्ती 17:20; 1 कुरि 13:2मैं तम्हानु सच्च किहे पला कि जको कुई ऐ पहाड़ा नु किहे, ‘तु उखड़ती जा, ते समुन्दरा मां जती पड़,’ ते आपणे मना मां शक्क ना करा, बल्कि विश्वास करा कि जको किहे पला ऊं हुती जई, तां ओचे वास्ते ऊंही हुवी। 24ऐवास्ते मैं तम्हानु किहे पला कि जको कोच्छ तम्ही प्राथना करती मांगा, तां विश्वास करती गिहा कि तम्हानु मिलती गेले, ते तम्चे वास्ते हुती जई। 25#मत्ती 6:14,15ते जिसे बेले तम्ही प्राथना करने वास्ते खड़े हुवा, तां अगर तम्चे मना मां काये दारक कोच्छ विरोध हो, तां माफ करा, ऐवास्ते कि तम्चा स्वर्ग़ीय ब़ा वी तम्चे अपराधा नु माफ करो। 26ते अगर तम्ही माफ ना करा तां तम्चा ब़ा वी जको स्वर्ग़ा मां छै, तम्चे अपराधा नु माफ नी करी।”#11:26 कोच्छ हस्तलेखा मां हा वाक्य ना मिली
ईशु चे अधिकारा उपर यहूदी नेता चा शक्क
(मत्ती 21:23–27; लूका 20:1–8)
27वे बल्ति यरुशलेम मां आले ते जब ओ मन्दरा मां घूमता फिरेला, तां प्रधान याजक ते शास्त्री ते बङका ने ओचे गोढु आती कर पूछले, 28“तु ईं काम काये अधिकारा लारे करी ? ते हा अधिकार तनु केहणे ङिला कि तु ईं काम करी?”
29ईशु ने वानु केहले, “मैं वी तम्हा कनु हेक बात पूछे पला, मनु उत्तर ङिया तां मैं तम्हानु बावड़ी कि ईं काम किसे अधिकारा लारे करे। 30यूहन्ना चा बपतिस्मा स्वर्ग़ा ची ओर कनु हुता जा इन्साना ची ओर हुता। मनु उत्तर ङिया।”
31वे आपस मां तर्क करु लाग़ले, “अगर अम्ही किहुं, ‘स्वर्ग़ा ची ओर कनु,’ तां ओ किही, ‘बल्ति तम्ही ओचा विश्वास कां कोनी करला?’ 32ते अगर अम्ही किहुं, ‘इन्साना ची ओर कनु,’ ” लौका चा ङर छै, कांकि वे सच्चमां जाणी कि यूहन्ना भविष्यवक्ता हुता। 33तां वाणे ईशु नु उत्तर ङिला, “अम्ही ना जाणु।”
ईशु ने वानु केहले, “मैं वी तम्हानु ना बावड़ी कि ईं काम किसे अधिकारा लारे करे।”
Nke Ahọpụtara Ugbu A:
मरकुस 11: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0