मत्ती 21
21
यरुशलेम मां जय चे लारे जाणे
(मरकुस 11:1–11; लूका 19:28–40; यूहन्ना 12:12–19)
1जिसे बेले वे यरुशलेम चे गोढु पुज़ले ते जैतून पहाड़ा उपर बैतफगे चे लारे आले, तां ईशु ने ङुंहु चैला नु ईं केहती कर भेज़ले, 2“सामणे चे गांवा मां जावा। ओठे पुज़ते ही हेक गाहड़ो ब़झली आली, ते विचे लारे ब़च्चे तम्हानु मिली। ओनु खोलती कर माये गोढु गेहती आवा। 3अगर तम्हानु कुई कहीं किहे, तां केहजा, प्रभु नु ऐची जरुरत छै। तब ओ तुरन्त ओनु भेज़ती ङी।”
4ईं ऐवास्ते हुले कि जको वचन भविष्यवक्ता चे जरिये केहला गेलता, ओ पूरा हो।
5“सिय्योन ची धूवे नु किहा,
‘ङेख, दुधा राजा दुधे गोढु आवे पला,
ओ नर्म छै, ते गाहड़े उपर ब़ेहला,
यानिकि लादू चे ब़च्चे उपर।’ ”
6चैला ने जती कर, जिसड़े ईशु ने वानु केहले हुते, उसड़े ही करले। 7ते गाहड़ी नु ते ब़च्चे नु आणती कर, ओचे उपर आपणी ओढ़णी नाखली, ते ईशु ओचे उपर ब़ेसती रेहला। 8ते ब़ोहत लौका ने आपणी ओढ़णी मार्ग़ा मां बिछाली, ते नेरे लौका ने पेड़ा कनु लड़ीया बाढती कर मार्ग़ा मां बिछालीया। 9जको भीड़ ओचे आग़ु-आग़ु जती ते भांसु-भांसु आती हुली, ऊंची अवाजी मां किहे पलती,
“दाऊद ची ऊलाद्धी ची होशना!”
“धन्न छै ओ जको प्रभु चे नांवा लारे आवे पला!”
“आसमाना मां होशना!”
10जिसे बेले ओ यरुशलेम शहरा मां पुज़ती आला, तां सारे शहरा मां हलचल मचती गेली, ते लौक किहुं लाग़ले, “ईं कूण छै?”
11लौका ने केहले, “हा गलील चे नासरत शहरा चा भविष्यवक्ता ईशु छै।”
ईशु मन्दरा मां
(मरकुस 11:15–19; लूका 19:45–48; यूहन्ना 2:13–22)
12ईशु नरीकारा चे मन्दरा मां गेला ते जको मन्दरा मां लेन-देन करी पलते, वानु काढ़ती छोड़ले, ते सराफा चे तखत, ते कबूतर बेचणे आला चा चौकीया पलटती नाखलीया। 13ते ओणे केहले, “लिखले आले छै, ‘माये घर प्राथना चे घर किहवावी,’ पर तम्ही ओनु ङाकुवा ची घौर बणाती नाखली।”
14अन्धे ते लंगड़े, मन्दरा मां ओचे गोढु आणले गेले, ते वानु ईशु ने ठीक करले। 15पर जिसे बेले प्रधान याजका ते यहूदी धर्मशास्त्रीया ने जा अचम्भे चे कामा नु जको ईशु ने करले हुते, ते ब़ाला नु मन्दरा मां “दाऊद ची ऊलाद्ध ची होशना” केहते ङेखले ते गुस्से मां ओनु किहुं लाग़ले,
16“का तु सुणी पला कि ये का किही पले?”
ईशु ने ओनु केहले, “हव्वे, का तम्ही पवित्रशास्त्र मां ईं कङी वी कोनी पढ़ले,
“ ‘ब़ाला कनु, तु ङूध पीते ब़ाला चे मुँहा कनु,
महिमा ते स्तुति कराली’?”
17बल्ति ईशु वानु उठी छोड़ती कर, यरुशलेम शहरा चे ब़ाहरु बैतनिय्याह सनु चाह्ला गेला, ते ओठे ओणे रात बिताली।
ईशु चा अंजीर चे ब़ूटे नु श्राप
(मरकुस 11:12–14,20–24)
18सवेले जब ओ यरुशलेम शहरा सनु पुठा आवे पलता, तां ईशु नु भोक्क लाग़ली। 19ओ सड़के चे किनारे अंजीरा चे दरख्त ङेखती कर गोढु गेला, ते पाना नु छोड़ती ओचे मां नेरे कहीं ना ङेखती कर ओनु केहले, “हमा कनु दुधे मां बल्ति कङी फल ना लाग़ो।” ते अंजीरा चे दरख्त तुरन्त सूखती गेले।
20ईं ङेखती कर चैला नु अचम्भा हुला ते वाणे केहले, “ईं अंजीरा चे दरख्त तुरन्त किवें सूखती गेले?”
21 #
मत्ती 17:20; 1 कुरि 13:2 ईशु ने वानु उत्तर ङिला, “मैं तम्हानु सच्च किहे पला, अगर तम्ही विश्वास राखा ते शक्क ना करा, तां ना सेर्फ ईं करा जको ऐ अंजीरा चे दरख्ता लारे करले गेले, पर अगर ऐ पहाड़ा नु वी किहा, ‘उखड़ती जा, ते समुन्दरा मां जती पड़,’ तां ईं हुती जई। 22ते जको कोच्छ तम्ही प्राथना मां विश्वास लारे मांगा, ऊं सब तम्हानु मिली।”
ईशु चे अधिकार उपर शक्क
(मरकुस 11:27–33; लूका 20:1–8)
23ओ मन्दरा मां जती कर उपदेश करे पलता, तां प्रधान याजका ते लौका चे बङका ने ओचे गोढु आती कर पूछले, “तु ईं काम काये अधिकारा लारे करी ? ते हा अधिकार तनु केहणे ङिला?”
24ईशु ने वानु उत्तर ङिला, “मैं वी तम्हा कनु हेक बात पूछे पला। अगर वा तम्ही मनु बावड़ा, तां मैं वी तम्हानु बावड़ी कि ईं काम किसे अधिकारा लारे करे। 25यूहन्ना चा बपतिस्मा किठु हुता ? स्वर्ग़ा ची ओर कनु जा इन्साना ची ओर कनु ?”
तब वे आपस मां तर्क करु लाग़ले, “अगर अम्ही किहुं, ‘स्वर्ग़ा ची ओर कनु ,’ तां ओ अम्हानु किही, ‘बल्ति तम्ही ओचा विश्वास कां कोनी करला?’ 26ते अगर किहुं, ‘इन्साना ची ओर कनु,’ तां अम्हानु भीड़ चा ङर छै, कांकि वे सारे मनी कि यूहन्ना भविष्यवक्ता छै।” 27तां वाणे ईशु नु उत्तर ङिला, “अम्ही ना जाणु।”
ओणे वी वानु केहले, “तां मैं वी तम्हानु ना बावड़ी कि ईं काम किसे अधिकारा लारे करे।
ङोन पूता ची मिसाल
28“तम्ही का सोचा? कुई बन्दे चे ङोन पूत हुते। ओणे पेहले पूता चे गोढु जती कर केहले, ‘ओ पूत, आज़ अंगूरा ची बाड़ी मां जती कर काम कर।’ 29ते ओणे उत्तर ङिला, ‘मैं ना जई,’ पर बादा मां पछताती कर चाह्ला गेला। 30बल्ति ब़ा ने ङुजे पूता गोढु जती कर यूंही केहले, ओणे उत्तर ङिला, ‘जी हा जाये पला,’ पर कोनी गेला। 31यां ङुंहु महु किसे ने ब़ा ची इच्छा पुरी करली?” वाणे केहले, “पेहले ने।”
ईशु ने वानु केहले, “मैं तम्हानु सच्च किहे पला कि चुंगी गेहणे आले, ते वेश्या तम्चे कनु पेहले नरीकारा चे राज़ मां जाये। 32#लूक 3:12; 7:29,30कांकि यूहन्ना बपतिस्मा ङेणे आला धर्म चा मार्ग़ ङिखाणता हुला तम्चे गोढु आला, ते तम्ही ओचा विश्वास कोनी करला। पर चुंगी गेहणे आला ने ते वेश्या ने ओचा विश्वास करला। ते तम्ही ईं ङेखती कर बादा मां वी नी पछताले, ते ना ओचा विश्वास करला।”
मालिक ते ठेकेदारा ची मिसाल
(मरकुस 12:1–12; लूका 20:9–19)
33“हेक नेरी मिसाल सुणा, हेक घरा चा मालिक हुता, जेह्णे अंगूरा ची बाड़ी लाली, विचे चारो-तरफ बाढ़ लाली, विचे मां रस चा कुण्डा खोदला ते मन्हा बणाला ते जमींदारा नु विचा ठेका ङिती कर प्रदेस चाह्ला गेला। 34जिसे बेले फला चा समय गोढु आला, तां ओणे आपणे दासा नु ओचा फल गेहणे वास्ते जमींदारा चे गोढु भेज़ले। 35पर जमींदारा ने ओचे दासा नु पकड़ती कर, कानु तां कोटले, ते कानु मारती नाखले, ते काये उपर पत्थराव करला। 36बल्ति ओणे पेहला कनु ज्यादा नेरा दासा नु भेज़ले, ते वाणे वांचे लारे वी उसड़े ही करले। 37अन्त मां ओणे आपणे पूता नु वांचे गोढु ईं सोचती कर भेज़ले कि वे माये प्यारे पूता चा कद्दर करे। 38पर जमींदारा ने पूता नु ङेखले तां आपस मां केहले, ‘हा तां वारिस छै। आवा, अम्ही ऐनू मारती नाखु, ते ऐची विरासत गेहती गिहुं।’ 39तां वाणे ओनु पकड़ती ते अंगूरा ची बाड़ी कनु ब़ाहर काढ़ती कर मारती नाखले।
40“ऐवास्ते अंगूरा ची बाड़ी चा मालिक आवी, तां वां जमींदारा लारे का करी?”
41वाणे ईशु नु केहले, “ओ वां बुरे लौका नु बुरी तरावें नाश करी, ते अंगूरा ची बाड़ी चा ठेका ङुजे जमींदारा नु ङिही जती, जको समय उपर ओनु फल ङिले करे।”
42ईशु ने वानु केहले, “का तम्ही कङी पवित्रशास्त्र मां हा कोनी पढ़ले,
“ ‘जिसे पत्थरा नु राजमिस्त्रीया ने निक्कमे ठहराले हुते,
ओही कूणे चा सिरे चा पत्थर हुती गेला,
ईं प्रभु ची ओर कनु हुले ते अम्ची नजरी मां अदभोत छै’?
43“ऐवास्ते मैं तम्हानु किहे पला कि नरीकारा चा राज़ तम्चे बीच महु ही गेहला जई, ते इसड़ी जाति नु जको ओचा फल आणे, ङिला जई। 44जको ऐ पत्थरा उपर ढी, ऊं चकनाचूर हुती जई, ते जाये उपर ओ पत्थर ढी, ओनु पीसती नाखी।”
45ते प्रधान याजका ने ते फरीसिया ने मिसाला सुणती कर समझती गेलते कि ओ अम्चे बारे मां किहे पला। 46ते वाणे ओनु पकड़ने चाह्ले, पर वे लौका कनु ङरले, कांकि लौक ओनु भविष्यवक्ता मनते।
Nke Ahọpụtara Ugbu A:
मत्ती 21: ODR
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0