लूका 5
5
शुरुआती चैला चे चुणले जाणे
(मत्ती 4:18–22; मरकुस 1:16–20)
1 #
मत्ती 13:1,2; मरकु 3:9,10; 4:1 हेक ङिओ इसड़े हुले कि जब भीड़ ईशु उपर ढिये पलती ते नरीकारा चा वचना नु सुणती, ते ईशु गन्नेसरत ची झील चे किनारे उपर भीलता, ते इसड़े हुले 2कि ईशु ने झील चे किनारे ङोन ब़ेड़ीया ङेखलीया ते मछुवारे वांचे कनु उतरती कर आपणे-आपणे जाल धोवी पलते। 3ईशु जको शमौन ची ब़ेड़ी हुती विचे उपर चढ़ती ओणे ओकनु बिनती करली, “कि किनारे कनु थोड़ा हटाती गेहती चाल” तब ओह ब़ेड़ी उपर ब़ेसती कर लौका नु उपदेश ङिऊं लाग़ला।
4जिसे बेले ईशु बाता करती चुकला तां ओणे शमौन नु केहले, “घणे पाणीया मां ब़ेड़ी नु गेहती चाल, ते माछलीया वास्ते आपणा जाल नाख।”
5 #
यूह 21:3
शमौन ने ओनु उत्तर ङिला, “हे स्वामी, अम्ही सारी रात मेहनत करली ते कोच्छ कोनी पकड़ले, तां वी दुधे केहले उपर जाल नाखी।” 6#यूह 21:6जब वाणे जाल नाखला, ते जाला मां घणीया माछलीया आलीया ते वांचे जाल फड़ीजु लाग़ले। 7ऐचे उपर वाणे आपणे साथीया नु जको नेरी ब़ेड़ी उपर हुते इशारा करला, “आती कर अम्ची सहायता करा” ते वाणे आती कर ङोनी ब़ेड़ीया इठे तक भरती गेलीया कि वे ब़ुङु लाग़लीया। 8ईं ङेखती कर शमौन पतरस ईशु चे पग़्ग़ा मां ढेती कर केहले, “हे प्रभु, माये कनु जा, मैं पापी बन्दे छै।”
9कांकि इतनीया माछलीया पकड़लीया जाणे लारे ओनु ते ओचे साथीया नु बङा अचम्भा हुला। 10ते यूंही जबदी चे पूत याकूब ते यूहन्ना नु वी, जको शमौन चे भईवाल हुते, अचम्भा हुला।
बल्ति ईशु ने शमौन नु केहले, “ना ङर, हमा तु इन्साना नु जीता पकड़ले करे ते नरीकार चे गोढु आणले करे।” 11बल्ति वे ब़ेड़ीया किनारे उपर गेहती आले ते सब कोच्छ छोड़ती कर ओचे भांसु टुरती पले।
ईशु ने हेक बन्दे नु शोद्ध करले
(मत्ती 8:1–4; मरकुस 1:40–45)
12जिसे बेले ओ कुई शहरा मां हुता, तां उठे हेक कोहड़ी आला, ते ओ ईशु नु ङेखती कर मुँहा भराणे ढेला ते बिनती करली, “हे प्रभु, अगर तु चाहवी तां मनु शोद्ध कर सग़ी।”
13ईशु ने आपणा हाथ बढ़ाती कर ओनु छूले ते केहले, “मैं चाहवे, तु शोद्ध हुती जा।” ते ओचा कोहड़ तुरन्त जता रेहला। 14तब ईशु ने ओनु चिताती कर केहले, “कानु कहीं ना किहो, पर जती कर आपणे आप नु याजक नु ङिखाण, ते आपणे शोद्ध हुवणे चे बारे मां जको मूसा भविष्यवक्ता ने ठहराला छै ओ भेंट चढ़ा कि लौका चे वास्ते ग़वाही हो।”
15पर ईशु ची चर्चा होर फैलती गेली, ते बङी भीड़ ओची सुणने वास्ते ते आपणी बिमारीया कनु ठीक हुवणे वास्ते भेली हुली। 16पर ओह बरब्याना मां हेकला जती कर प्राथना करता।
लकवे चे रोग़ीया नु ठीक करले
(मत्ती 9:1–8; मरकुस 2:1–12)
17हेक ङिओ हुले का ईशु उपदेश ङिये पलता फरीसी ते शास्त्री उठे ब़ेहले हुते, जको गलील ते यहूदिया चे हर हेक गांवा, ते यरुशलेम कनु आलते, ते चंगा करने आली प्रभु ची सामर्थ ओचे लारे हुती 18ओ समय कई लौक हेक बन्दे नु जको लकवे चा बिमार हुता, खाटे उपर आणले, ते वे ओनु भीतर गेहती जाणे ते ईशु चे सामणे मेहलणे चा उपा सोधी पलते। 19पर जब भीड़ ची वजह कनु ओनु भीतर ना गेहती जा सग़ेले तां वाणे छत्ते उपर चढ़ती कर ते खपरेल हटाती कर, ओनु खाटे समेत आधे मां ईशु चे सामणे उतारती ङिले। 20ईशु ने वांचा विश्वास ङेखती कर ओनु केहले, “हे इन्सान, दुधे पाप माफ हुले।”
21तब शास्त्री ते फरीसी विवाद करु लाग़ले, “हा कूण छै, जको नरीकारा ची निन्दा करे पला? नरीकारा नु छोड़ती कर नेरे कूण पाप माफ कर सग़े?”
22ईशु ने वांचे मना चीया बाता जाणती कर, वानु केहले, “तम्ही आपणे मना मां कां विवाद करा पले? 23आसान का छै? का ईं केहणे कि, ‘दुधे पाप माफ हुले,’ जा ईं केहणे कि, ‘ऊठ ते टोर-फेर’? 24पर ऐवास्ते कि तम्ही जाणती गिहा, मैं इन्साना चे पूता नु धरती उपर पाप माफ करने चा अधिकार छै।” तब ओणे लकवे चे मरीजा नु केहले, “मैं तनु किहे पला, ऊठ, आपणी खाट चा ते आपणे घरे चाह्ला जा।”
25ओ तुरन्त वांचे सामणे ऊठला, ते जाये उपर ओ पला हुता विनु चती कर, नरीकारा ची बढ़ाई करता हुला आपणे घरे चाह्ला गेला। 26तब सारा ने अचम्भा करला ते नरीकारा ची बढ़ाई करु लाग़ले ते ब़ोहत ङरती कर किहुं लाग़ले, “आज़ अम्ही अजीब बात ङेखली।”
लेवी नु हकारले
(मत्ती 9:9–13; मरकुस 2:13–17)
27ऐचे बाद ईशु ब़ाहर गेला ते लेवी नांवा चा हेक चुंगी गेहणे आले नु चुंगी ची चौकी उपर ब़ेहले ङेखले, ते ओनु केहले, “माये भांसु आती जा।” 28तब ओह सब कोच्छ छोड़ती ऊठला, ते ओचे भांसु टुरती पला।
29तब लेवी ने आपणे घरा मां ओचे वास्ते हेक बङी मेहमानी करली, ते चुंगी गेहणे आला ची ते नेरा लौका ची जको ओचे लारे खाणा खऊं ब़ेहले हुते, हेक बङी भीड़ हुती। 30#लूक 15:1,2ऐचे उपर फरीसी ते वांचे शास्त्री ओचे चैला लारे ईं केहती कर बुड़कु लाग़ले, “तम्ही चुंगी गेहणे आला लारे ते पापीया चे लारे कां खई पीया?”
31ईशु ने वानु उत्तर ङिला, “वैद भले चंगा वास्ते कोनी, पर बिमारा चे वास्ते जरुरी छै। 32मैं धर्मीया नु ना, पर पापीया नु मन बदलने चे वास्ते हकारु आला।”
उपवास चे बारे मां
(मत्ती 9:14–17; मरकुस 2:18–22)
33वाणे ईशु नु केहले, “यूहन्ना चे चैले तां लगातार उपवास राखी ते प्राथना करते रिही, ते यूंही फरीसिया चे चैले वी, पर दुधे चैले तां खाते-पीते रिही।”
34ईशु ने वानु केहले, “जब तक बीन्द बरातीया लारे रिहे,का तम्ही वाकनु उपवास रखवा सग़ा? 35पर वे ङिहें आवे, जाये मां बीन्द वाकनु अलग़ करला जई, बल्ति वे वां ङिहां मां उपवास राखे।”
36ओणे हेक नेरी मिसाल वी वानु केहली, “कुई बन्दे नवें ओढ़णा महु फाड़ती कर पुराणे ओढ़णा मां टाकी ना लावी, ना तां नवां फड़ीती जई ते वा टाकी पुराणे मां मेल वी नी खई। 37ते कुई नवां अंगूरा चा रस पुराणीया मशका मां ना भरी, ना तां नवां अंगूरा चा रस मशका नु फाड़ती कर बेहती जई, ते मशका वी नाश हुती जई। 38पर नवां अंगूरा चा रस नवींया मशका मां भरना चाही छै। 39कुई बन्दे पुराणा अंगूरा चा रस पीती कर नवां ना चाहवी, कांकि ओह किहे कि, ‘पुराणा ही आच्छा छै।’ ”
Nke Ahọpụtara Ugbu A:
लूका 5: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0