लूका 14
14
हेक बन्दे नु बिमारी कनु ठीक करले
1बल्ति ईशु सब्त चे ङिओ फरीसिया चे सरदारा महु काये घरे रोटी खाणे वास्ते गेला, तां वे ओनु पकड़ने चे मौके मां हुते। 2ईशु चे सामणे हेक बन्दे हुते जाये हाथा पग़्ग़ा मां पाणी भरीजणे ची बिमारी हुती। ते ऊं सूज़ती गेलते। 3ईशु ने यहूदी धर्मशास्त्रीया ते फरीसिया कनु पूछले, “सब्त चे ङिओ कानु ठीक करने आच्छे छै जा कोनी?” 4पर वे चोप रेहले, ऐवास्ते ईशु ने ओह बन्दे नु हाथ लाती कर ठीक करले ते ओनु जऊं ङिले।
5 #
मत्ती 12:11
ते ईशु ने वानु केहले, “तम्चे महु इसड़े कूण छै, जाये गाहड़ो जा ङान्द, खुआ मां ढेती पड़ो ते ओ सब्त चे ङिओ ओनु जल्दी ब़हार ना काढ़ो?” 6वे यां बाता चा कोच्छ उत्तर ना ङे सग़ले।
नरमाई लारे मेहमाना ची कद्दर
7जिसे बेले ईशु ने ङेखले कि छेड़ा ङिले आले लौक किवें खास-खास जग़हा चुणती गिही तां हेक मिसाल ङिती कर वानु केहले, 8“जिसे बेले कुई तनु बीहा मां हकारे, तां खास जग़हा मां ना ब़ेसीयो, कङी इसड़े ना हो कि ओणे दुधे कनु वी कुई बङे खास मेहमाना नु छेड़ा ङिला हो। 9ते जेह्णे तनु ते ओनु ङुंहु नु छेड़ा ङिला हो, आती कर तनु किहो, ‘ऐनू जग़हा ङे,’ ते बल्ति तनु शर्मसार हुती सबकनु तड़ली जग़हा मां ब़ेसणे पड़ी। 10पर जिसे बेले तु हकरीला जई, तां सबकनु तड़ली जग़हा मां जती ब़ेस जब ओ जेह्णे तनु छेड़ा ङिला आवी, तां तनु किहो, ‘हे सज़्ज़ण, उग़ते हुती ब़ेस,’ तब दुधे लारे ब़ेसणे आला चे सामणे दुधी बढ़ाई हुवी। 11#मत्ती 23:12; लूक 18:14कांकि जको कुई आपणे आप नु बङे बणावी, ऊं छोटे करले जई, ते जको कुई आपणे आप नु छोटे बणावी,ऊं बङे करले जई।”
12बल्ति ओणे आपणे छेड़ा ङेणे आला नु वी केहले, “जब तु ङिहां चा जा राती चा भोज़ करी, तां आपणे सज़्ज़ण जा भऊ जा कुणम्बा जा अमीर पड़ोसीया नु ना हकार, कहीं इसड़े ना हो कि वे वी तनु छेड़ा ङियो, ते दुधा बदला हुती जाओ। 13पर जब तु भोज़ करी, तां कंगाल, टुन्डे, लंगड़े, ते अन्धा नु हकार। 14तब तु धन्न हुवे, कांकि वांचे कनु वापिस बदले मां ङेणे वास्ते कहीं कोनी हुवी, पर तनु धर्मीया चे लारे जीते हुवणे चा नरीकार तनु ऐचा फल ङिही।”
बङे भोज़ ची मिसाल
(मत्ती 22:1–10)
15ईशु लारे भोज़न करने आला महु हेके ने ये बाता सुणती कर ईशु नु केहले, “धन्न छै ओ जको नरीकारा चे राज़ मां रोटी खई।”
16ईशु ने ओनु केहले, “कुई इन्साना ने बङा भोज़ ङिला ते घणा नु हकारले। 17जब भोज़न तियार हुती गेला तां ओणे आपणे दासा चे हाथु छेड़ा ङिले आले लौका नु केहती भेज़ले, ‘आवा, हमा खाणे तियार छै।’ 18पर वे सारे चे सारे माफी मांगु लाग़ती गेले। पेहले ने ओनु केहले, ‘मैं खेत मोल गेहला, ते जरुरी छै कि ओनु ङेखे, मैं दुधे कनु बिनती करे पला कि मनु माफ करती ङे।’ 19ङुजे ने केहले, ‘मैं पाँच जोड़ी ङान्द मोल गेहले, ते परखु जाये पला, मैं दुधे कनु बिनती करे पला, मनु माफ करती ङे।’ 20हेक नेरे ने केहले, ‘मैं बीहा करवाला, ऐवास्ते मैं ना आ सग़ी।’
21“ओ दासा ने आती कर आपणे मालका नु ये बाता केहती सुणालीया। बल्ति घरा चे मालका नु गुस्सा आला ते आपणे दासा नु केहले, ‘शहरा चे बजारा ते गलीया मां तुरन्त जती कर कंगाल, टुन्डे, लंगड़े, ते अन्धा नु इठे गेहती आवा।’
22“दासा ने बल्ति केहले, ‘हे मालिक, जिंवे तु केहले हुते, यूंही करले गेले, ते बल्ति वी जग़ह छै।’
23“मालिका ने दासा नु केहले, ‘सड़का उपर ते बाड़ा ची तरफ जा ते लौका नु मजबूर करती गेहती आ कि माये घर भरीती जाओ। 24कांकि मैं तम्हानु किहे पला कि छेड़ा ङिले लौका महु कुई माये भोज़ नु नी चाखी।’ ”
चैला बणने चा मोल
(मत्ती 10:37,38)
25जिसे बेले बङी भीड़ ईशु चे लारे जाये पलती, तां ओणे भांसु घूमती कर लौका नु केहले, 26#मत्ती 10:37“अगर कुई माये गोढु आवे, ते आपणे आई-ब़ा ते घराआली ते ब़ाले ते भावां ते ब़ेहणीया बल्कि आपणी जान कनु वी ज्यादा मनु प्रेम करे, तां ही ओ माया चैला हो सग़े। 27#मत्ती 10:38; 16:24; मरकु 8:34; लूक 9:23ते जको कुई आपणा क्रूस ना चवी, ते माये भांसु ना आओ, ओ वी माया चैला ना हो सग़ी।
28“तम्हा महु कूण छै जको किला बणावणे चाहते हो, ते पेहले ब़ेसती कर खर्चा ना जोड़ो कि पुरे करने ची ताकत माये कनु छै के कोनी? 29कङी इसड़े ना हो कि जिसे बेले ओ नीम भरती गिहो पर तियार ना कर सग़ो, तां सारे ङेखणे आले ईं केहती कर ओनु मजाकी मां उङारु लाग़ो। 30ते किहे, ‘ईं बन्दे बणाऊ लाग़ले, पर तियार ना कर सग़ले।’
31“जा कूण इसड़ा राजा छै जको ङुजे राजे लारे योद्ध करु जता हो, ओ पेहले ब़ेसती कर विचार ना करती गिहो कि जको बीस हजार योद्धे गेहती कर माये उपर चढ़ाई करली आवे, का मैं ङस हजार योद्धे गेहती कर ओचा सामना कर सग़े जा कोनी? 32ना तां ओ राजे कनु दूर रेहती ही ओ दूता नु भेज़ती कर मेल-मिलाप ची शर्त चे बारे मां पूछी। 33यूं करती तम्चे महु जको कुई आपणे सारे कोच्छ छोड़ती ना ङियो, तां ओह माया चैला ना हो सग़ी।
बे स्वाद लूण
(मत्ती 5:13; मरकुस 9:50)
34“लूण आच्छे छै, पर अगर लूणा चा स्वाद बिगड़ती जाये, तां बल्ति किसी चीजे लारे नमकीन करले जई? 35ऊं ना तां भोंये चे ते ना खाद चे वास्ते कामा मां आवे, ओनु तां लौक ब़ाहर भुकाती नाखी। जाये सुणने चे कान हो ऊं सुणती गिहो।”
Nke Ahọpụtara Ugbu A:
लूका 14: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0