यूहन्ना 7
7
ईशु चे भावां चा अविश्वास
1यां बाता चे बाद, ईशु गलील मां फिरता रेहला। कांकि यहूदी नेते ओनु मारती नाखणे चा चारा लाली भिलते, ऐवास्ते ओ यहूदिया मां फिरना ना चाहता। 2यहूदिया चा झूपड़ीया चा तेंहवार गोढु हुता, 3ऐवास्ते ओचे भावां ने ओनु केहले, “गलील नु छोड़ती कर यहूदिया नु जा, कि जको काम तु करी वानु दुधे चैले उठे वी ङेखो। 4कांकि इसड़े कुई नी हुवी जको प्रसिद्ध हुवणा चाहवे ते लुकती कर काम करो। अगर तु ईं काम करी तां, आपणे आप नु संसारा उपर प्रकट कर।” 5कांकि ओचे खौद्द चे भऊ वी ओचे उपर विश्वास ना करते।
6तब ईशु ने वानु केहले, “माया समय हालि तक कोनी आला, पर तम्चे वास्ते हर समय ठीक छै। 7संसार तम्चे लारे बैर ना राख सग़ी, पर ओ माये लारे बैर राखे कांकि मैं वांचे विरोध मां हा ग़वाही ङिये कि वांचे काम बुरे छै। 8तम्ही तेंहवार मां चाह्ले जावा। मैं हमा ऐ तेंहवार मां ना जई, कांकि हमा तक माया समय पूरा कोनी हुला।” 9ईशु वानु ये बाता केहती कर गलील मां ही रेहती गेला।
10पर जिसे बेले ओचे भऊ तेंहवार मां चाह्ले गेले, तां ओ खौद्द वी, चोप-चाप तेंहवार मां चाह्ला गेला। 11यहूदी तेंहवारा मां ईशु नु ईं केहती कर सोधु लाग़ले, “ओ किठे छै?” 12ते लौका मैं ओचे बारे मां चोप-चोप करती ब़ोहत सारीया बाता हुलीया। कई किही पलते, “ओ भले मानस छै।” ते कहीं किही पलते, “ना, ओ लौका नु भरमावे।” 13तां वी यहूदी नेता चे ङरा कनु कुई बन्दे ओचे बारे खुलती कर कोनी ब़ोले पलते।
तेंहवार मां ईशु चा उपदेश
14जिसे बेले तेंहवार ची आधी ङिहें बीतती गेली, तां ईशु मन्दरा मां जती कर उपदेश ङिऊं लाग़ला। 15तब यहूदी बन्दा ने हैरान हुती कर केहले, “ऐनू बिना पढ़ले विधिया किवें आती गेली?”
16ईशु ने वानु उत्तर ङिला, “माया उपदेश माया कोनी। पर माये भेज़णे आले चा छै। 17अगर कुई ओची इच्छा उपर चलणे चाहवे तां ओ माया उपदेशा चे बारे मां जाणती जई कि ईं नरीकारा चे तरफु छै जा मैं आपणे तरफु किहे पला। 18जको आपणे तरफु कहीं किहे ओ आपणी ही बढ़ाई चाहवे, पर जको आपणे भेज़णे आले ची बढ़ाई चाहवे ओही सच्चा छै, ते ओचे मां कुई खोट कोनी। 19का मूसा ने तम्हानु व्यवस्था कोनी ङिली हुती? तां वी तम्चे महु कुई वी व्यवस्था उपर ना चली। तम्ही कां मनु मारती नाखणे चाहवा?” 20लौका ने उत्तर ङिला, “दुधे मां दुष्टात्मा छै। कूण तनु मारती नाखणे चाहवे?” 21ईशु ने वानु उत्तर ङिला, “मैं हेक अचम्भे चे काम करले, ते तम्ही सारे हैरान हुती गेले। 22कांकि मूसा ने तम्हानु खतने ची आज्ञा ङिली, ऐवास्ते तम्ही सब्त चे ङिओ बन्दा चा खतना करा। पर ईं कोनी कि वा मूसा चे तरफु छै पर ङाङा-ब़ा कनु चढ़ली आवे। 23#यूह 5:9जिसे बेले सब्त चे ङिओ बन्दे चा खतना करला जाये ताकि मूसा ची व्यवस्था ची आज्ञा टलती ना जाओ, तां तम्ही कां क्रोध करा कि मैं सब्त चे ङिओ हेक बन्दे नु पुरी रीति लारे ठीक करले? 24मुँह ङेखती कर न्यां ना करा, पर ठीक-ठीक न्यां करा।”
का ईशु मसीह छै?
25बल्ति कई यरुशलेम वासी किहुं लाग़ले, “का हा ओही कोनी, जानु मारणे ची कोशिस करली जाये पली? 26पर ङेखा, हा तां सारा बन्दा चे बीच मां ब़ोले पला, ते वे बन्दी कहीं वी ना किही पली। का ईं ना हो सग़ी कि यहूदी सरदार वास्तव मां जाणती गेले कि हाओ ही मसीह छै? 27ऐनू तां अम्ही जाणु हा किठला छै, पर मसीह जिसे बेले आवी, कानु पता नी लाग़ी कि ओह किठला छै।”
28बल्ति ईशु ने मन्दरा मां उपदेश ङिते बेले ऊंची अवाजी मां केहले, “तम्ही किहा कि मनु जाणा, ते ईं वी कि मैं किठला छै। पर मैं तां आपणे आप कोनी आला, मनु भेज़णे आला सच्चा छै। ओनु तम्ही ना जाणा। 29मैं ओनु जाणे कांकि मैं ओची तरफु आला छै ते ओणे मनु भेज़ले।” 30ईशु नु वे पकड़ने ची कोशिस मां हुते, पर ओचे उपर किह्णी हाथ कोनी नाखला, कांकि ओचा समय कोनी आला हुता। 31बल्ति वी भीड़ महु घणे सारा ने ओचे उपर विश्वास करला। ते बन्दी किहुं लाग़ले, “मसीह जिसे बेले आवी, का ऐकनु ज्यादा अचम्भे चे चैन्ह ङिखाणी जको ऐणे ङिखाणले?”
ईशु नु पकड़ने ची कोशिस
32फरीसिया ने लौका नु ईशु चे बारे मां चोप-चोप बाता करते सुणले। ते प्रधान याजका ते फरीसिया ने ईशु नु पकड़ने वास्ते पाहरेदार भेज़ले। 33ईशु ने केहले, “मैं थोड़ी देरी वास्ते तम्चे लारे छै, बल्ति आपणे भेज़णे आले गोढु चाह्ला जई। 34तम्ही मनु सोधा, पर मैं नी लाभी ते जिठे मैं छै, ओठे तम्ही ना आ सग़ा।”
35यहूदिया ने आपस मां केहले, “हा किठे जई कि अम्ही ऐनू नी सोध सग़ु? का ओ वाकनु जई जको अम्चे लौक यूनानिया मां खिंडती-पुंडती कर रिही पले, ते यूनानिया नु वी उपदेश ङिही? 36हा का बात छै जको ओणे केहली कि ‘तम्ही मनु सोधा, पर मैं नी लाभी, ते जिठे मैं छै, ओठे तम्ही ना आ सग़ा?’ ”
जीवन जल ची नदी
37तेंहवारा चे आखरी ङिओ जको खास ङिओ छै, ईशु भिला रेहती ते ऊंची अवाजी मां केहले, “अगर कुई तरसेले छै तां माये कनु आती कर पीयो। 38जको माये उपर विश्वास करी, जिंवे पवित्रशास्त्र मां लिखले आले, ओचे दिला महु जीन्दगी ची पाणीया ची नदीया बिहुं लाग़े।” 39ओणे हा वचन पवित्र आत्मा चे बारे मां केहला, जको ईशु उपर विश्वास करने आला नु मिलणे आला हुता। कांकि आत्मा हालि तक कोनी उतरला हुता, कांकि ईशु हालि तक आपणी महिमा मां कोनी पुज़ला हुता। 40बल्ति भीड़ महु किह्णी ये बाता सुणती कर केहले, “सच्चमां हाओ ही भविष्यवक्ता छै।” 41ङुजा ने केहले, “हा मसीह छै।” पर घणे सारीया ने केहले, “का मसीह गलील कनु आवी? 42का पवित्रशास्त्र मां ईं कोनी लिखले कि मसीह दाऊद राजे चे वंश कनु बैतलहम गांवा कनु आवी, जिठे दाऊद रेहता?” 43ईशु ची वजह कनु लौका मां फूट पड़ली। 44वांचे महु घणे सारे ओनु पकड़ने चाहवे ले, पर केहणे वी ओचे उपर हाथ कोनी नाखला।
यहूदी अग़ुवे अविश्वास
45बल्ति पाहरेदार प्रधान याजका ते फरीसिया चे गोढु आले, वाणे वानु केहले, “तम्ही ओनु कां कोनी आणले?” 46पाहरेदारा ने केहले, “कुई वी बन्दे ने आज़ तक इसड़ीया बाता कोनी केहलीया जको ऐणे केहलीया।” 47फरीसिया ने वानु केहले, “का तम्ही वी भरमाले गेले? 48का अम्चे नेता जा फरीसिया महु किह्णी वी ओचे उपर विश्वास करला? 49पर ये बन्दी जको व्यवस्था ना जाणी श्रापित छी।” 50#यूह 3:1,2निकुदेमुस, जको सारा कनु पेहले ईशु चे गोढु आला ते फरीसिया महु हेक हुता, वानु केहले, 51“का अम्ची व्यवस्था कुई वी बन्दे नु जब तक पेहले ओची सुणती कर जाणती ना गिहो कि ओ का करे पला, दोषी ठहरावे?” 52वाणे केहले, “का तु वी गलील चा छी? पवित्रशास्त्रा मां पढ़ती कर सोधा ते तम्ही ङेखा कि गलील कनु कुई भविष्यवक्ता प्रकट ना हुवी।” 53बल्ति सारे आपणे आपणे घरे चाह्ले गेले।
Nke Ahọpụtara Ugbu A:
यूहन्ना 7: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0