यूहन्ना 21
21
तिबिरियास झील चे किनारे चैला चे सामणे प्रकट हुवणे
1यां बाता चे बाद ईशु ने आपणे आप नु तिबिरियास झील चे किनारे चैला चे सामणे प्रकट हुला। ते ये रीत लारे प्रकट हुला। 2शमौन पतरस, ते थोमा जको दिदुमुस किहवावे, ते गलील चे काना शहरा चा नतनएल, ते जबदी चे पूत, ते ओचे चैला महु ङोन नेरे जणे भेले हुते। 3#लूक 5:5शमौन पतरस ने वानु केहले, “मैं माछलीया पकड़ु जाये पला।”
वाणे ओनु केहले, “अम्ही वी दुधे लारे चालु पले” तां वे निकलती कर ब़ेड़ी उपर चढ़ले, पर वे राती नु कहीं ना पकड़ले।
4पुरा फुटते ही ईशु किनारे उपर आती भिला रेहला, तां वी चैला ने ना पिछाणले कि हा ईशु छै। 5तब ईशु ने वानु केहले, “हे माये मित्र, तम्चे कनु कोच्छ माछलीया छी का?”
वाणे उत्तर ङिला कि, “कोनी।”
6 #
लूक 5:6
ओणे वानु केहले, “ब़ेड़ी चे सज़्ज़े पासु जाल नाखा तां मिलती जाये।” तब वाणे जाल नाखला, ते हमा माछलीया ची बढोतरी कनु ओनु छेक ना सग़ले।
7ऐवास्ते ओ चैला जको लाङका किहवाता पतरस नु केहले, “हा तां प्रभु छै!”
ईं सुणते ही कर पतरस उघाड़ा हुता उब़ाहली कनु चादर बलेठती कर ओनु मिलणे वास्ते पाणीया मां टप्पा मारती ङिला। 8पर नेरे चैले ब़ेड़ी उपर माछलीया लारे भरला आला जाल छिकते हुले आले, कांकि वे किनारे कनु ज्यादा दूर कोनी, कुई ङोन साओ हाथा उपर हुते। 9जिसे बेले किनारे उपर उतरले, तां वाणे कौले चे जाखते उपर माछली मेहली हुली, ते रोटी ङेखली।
10ईशु ने वानु केहले, “जको माछलीया तम्ही हमा पकड़लीया, वांचे महु कहीं आणा।”
11शमौन पतरस ने ब़ेड़ी उपर चढ़ती कर हेक साओ तरेपन बङीया माछलीया लारे भरला आला जाल किनारे उपर छिकला, ते इतनीया माछलीया हुवणे उपर वी जाल कोनी फड़ीला। 12ईशु ने वानु केहले, “कि आवा खाणे खावा।” ते चैला महु कानु वी हिम्मत ना हुली कि ओकनु पूछु कि, “तु कूण छी?” कांकि वे जाणती गेलते कि ओ प्रभु ही छै। 13ईशु आला, ते रोटी चती कर वानु ङिली, ते यूं माछली वी।
14हा तीजी वारी छै कि ईशु मरले आला महु जीते हुवणे चे बाद चैला नु दर्शन ङिले।
ईशु ते पतरस
15खाणा खाणे बाद, ईशु ने शमौन पतरस नु केहले, “हे शमौन यूहन्ना चा पूत, का तु यांचे कनु बधती कर माये लारे प्रेम राखी?”
ओणे ओनु केहले, “हव्वे प्रभु, तु तां जाणी कि मैं दुधे लारे प्रीत राखे।”
ईशु ने ओनु केहले, “माये मेमणा नु चर्रा।”
16ओणे बल्ति ङुजी वारी ओनु केहले, “हे शमौन यूहन्ना चा पूत, का तु माये लारे प्रेम राखी?”
ओणे ओनु केहले, “हव्वे प्रभु, तु जाणी कि मैं दुधे लारे प्रीत राखे।”
ईशु ने ओनु केहले, “माये भेङा ची रखवाली कर।”
17ओणे तीजी वारी ओनु केहले, “हे शमौन यूहन्ना चा पूत, का तु माये लारे प्रीत राखी?”
पतरस उदास हुला कि ओणे तीजी वारी इसड़े केहले कि, “का तु माये लारे प्रीत राखी?” तां पतरस ने केहले, “हे प्रभु, तु तां सब कोच्छ जाणी, तु ईं जाणी कि मैं दुधे लारे प्रीत राखे।”
ईशु ने ओनु केहले, “माया भेङा नु चर्रा। 18मैं तनु सच्च-सच्च किहे पला, जब तु जवान हुता तां आपणी कमर कसती जिठे चाहता उठे फिरता रेहता, पर जब तु ब़ुढा हुवे तां आपणे हाथ पसारे, ते ङुजे तनु ब़ांहती कर जिठे तु नी चाहवे ओठे तनु गेहती जई।” 19ओणे यां बाता लारे बावड़ती ङिले कि पतरस किसड़ी मौत लारे नरीकारा ची महिमा करी। बल्ति ओनु केहले, “माये भांसु आ!”
ईशु ते लाङका किहवावणे आला चैला
20 #
यूह 13:25
पतरस ने मुड़ती कर ओ चैले नु भांसु आते ङेखले, जको लाङका किहवाता, ते जेह्णे खाणे चे बेले ओची छात्ती ची तरफ झुकती कर पूछले हुते, “हे प्रभु, तनु पकड़ावणे आला कूण छै?” 21ओनु ङेखती कर पतरस ने ईशु नु केहले, “हे प्रभु, ऐचा का हाल हुवी?”
22ईशु ने ओनु केहले, “अगर मैं चाहवें कि ओ माये आणे तक रुकला रिहो, तां तनु का? तु माये भांसु हुती पड़।”
23ऐवास्ते भावां मां हा बात खिंडती गेली कि ओ चैला नी मरी। ईशु ने ओनु ईं कोनी केहले कि हा नी मरी, पर ईं कि, “अगर मैं चाहवें कि ओ माये आणे तक रुकला रिहो, तां तनु का?”
निचोड़
24हा ओही चैला छै, जको यां बाता ची ग़वाही ङिये ते यां बाता नु लिखलीया। अम्ही सब जाणु, कि ओची ग़वाही सच्ची छै।
25नेरे वी ब़ोहत सारे काम छै जको ईशु ने करले। अगर वे हेक-हेक करती लिखले जईया, तां मैं समझे कि किताबा जको लिखलीया जईया वे संसारा मां वी ना समावीया।
Nke Ahọpụtara Ugbu A:
यूहन्ना 21: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0