यूहन्ना 1
1
वचन जीवन छै
1आदि मां वचन हुता, ते वचन नरीकारा चे लारे हुता, ते वचन नरीकार हुता। 2हाओ आदि मां नरीकारा चे लारे हुता। 3सब कोच्छ ओचे ही जरिये पैदा हुले, ते जको कोच्छ पैदा हुले, ओचे मां कुई वी चीज ओचे बिना पैदा कोनी हुली। 4ओचे मां जीवन हुता, ते हा जीवन बन्दा ची ज्योति हुती। 5सोज़ले अन्धारे मां चमके, ते अन्धारे ओनु ना ढक सग़ले।
6 #
मत्ती 3:1; मरकु 1:4; लूक 3:1,2 हेक बन्दे नरीकारा ची तरफु आले जाये नां यूहन्ना हुता। 7ओ ग़वाही ङिऊं आला कि ज्योति ची ग़वाही ङियो, ताकि सारे ओचे जरिये विश्वास आणो। 8ओ आप तां ज्योति कोनी हुता, पर वे ज्योति ची ग़वाही ङेणे चे वास्ते आलता। 9सच्ची ज्योति जको हर हेक बन्दे नु सोज़ले ङिये, संसारा मां आवे पलती।
10सच्ची ज्योति संसारा मां हुती, ते संसार ओचे जरिये पैदा हुला, ते संसारा ने ओनु कोनी पिछाणले। 11ओ आपणे घरे आला, ते ओचे आपणा ने ओनु ग्रहण कोनी करले। 12पर जितना ने ओनु ग्रहण करले, ओणे वानु नरीकारा ची ऊलाद्ध हुवणे चा अधिकार ङिला, यानिकि वानु जको ओचे नांवा उपर विश्वास राखी। 13ओ ना तां लुहींया लारे, ना शरीरा ची इच्छा लारे, ना बन्दा ची इच्छा लारे पैदा हुला, पर नरीकारा कनु पैदा हुला।
14ते वचन देहधारी हुला, ते अनुग्रह ते सच्चाई लारे भरीती कर अम्चे बीच मां डेरा करला, अम्ही ओची इसड़ी महिमा ङेखली, जिसड़ी ब़ा चे हिकड़ाते ची महिमा।
15यूहन्ना ने ओचे बारे मां ग़वाही ङिली, ते साङ मारती कर केहले, “हा ओही छै, जाया मैं खुलासा करला कि जको माये बाद आवे पला, ओ माये कनु बधती कर छै कांकि ओ माये कनु पेहले हुता। ”
16कांकि ओची दया ची भरपूरी महु अम्ही किरपा हांसिल करली यानिकि अनुग्रह उपर अनुग्रह। 17ऐवास्ते व्यवस्था तां मूसा चे जरिये ङिली गेली, पर अनुग्रह ते सच्चाई ईशु मसीह चे जरिये पुज़ली। 18नरीकारा नु कङी वी किह्णी कोनी ङेखले, पर हिकड़ाते पूत जको ब़ा ची गोङी मां छै, ते खौद्द नरीकार छै, ओणे नरीकारा नु प्रकट करले।
यूहन्ना बपतिस्मा ङेणे आले चा सनेसा
(मत्ती 3:1–12; मरकुस 1:1–8; लूका 3:1–18)
19यूहन्ना ची ग़वाही हा हुती कि जिसे बेले यहूदी नेता ने जको यरुशलेम मां हुते याजका ते लेवीया नु ओचे कनु ईं पूछणे चे वास्ते भेज़ले, “कि तु कूण छी?” 20ते यूहन्ना ने साफ-साफ केहती ङिले कि, “मैं मसीह कोनी।”
21बल्ति वाणे ओकनु पूछले, “तां बल्ति तु कूण छी? का तु एलिय्याह छी?” यूहन्ना ने केहले, “मैं कोनी छै।”
बल्ति वाणे पूछले, “का तु भविष्यवक्ता छी?”
ओणे उत्तर ङिला, “कोनी।”
22बल्ति वाणे ओकनु पूछले, “बल्ति तु कूण छी? कि अम्ही आपणे भेज़णे आला नु उत्तर ङिऊं। तु आपणे बारे मां का किही?”
23यूहन्ना ने केहले, “जिंवे यशायाह भविष्यवक्ता ने केहले, ‘मैं बरब्याना मां हेक हकारने आले चा शब्द छै कि तम्ही प्रभु चा मार्ग़ सिधा करा।’ ”
24जको भेज़ले गेलते वे फरीसी हुते। 25वाणे ओकनु हा सवाल पूछला, “अगर तु मसीह कोनी, ते ना एलिय्याह, ते ना भविष्यवक्ता छी, तां बल्ति लौका नु बपतिस्मा कां ङी?”
26यूहन्ना ने वानु उत्तर ङिला, “मैं तां तम्हानु पाणीया लारे बपतिस्मा ङिये, पर तम्चे बीच मां हेक इन्सान भिले छै जानु तम्ही ना जाणा। 27यानि माये बाद मां आणे आला छै, जाये ब़ूटा चा तणिया मैं खोलणे चे लायक कोनी।” 28ये बाता यरदन नदी चे पार बैतनिय्याह शहर मां हुलीया, जिठे यूहन्ना बपतिस्मा ङिये पलता।
ईशु नरीकारा चे मेमणे छै
29ङुजे ङिओ यूहन्ना ने ईशु नु आपणी तरफ आते ङेखती कर केहले, “ङेखा, ईं नरीकारा चे मेमणे छै, जको संसारा चे पापा नु चती चाह्ले जाये। 30हा ओही छै, जाये बारे मां मैं केहले हुते, ‘हेक मर्द माये बाद आवे पला जको माये कनु उत्तम छै, कांकि ओ माये कनु पेहले हुता।’ 31ते मैं तां ओनु पिछाणता वी ना, पर ऐवास्ते मैं पाणीया लारे बपतिस्मा ङिता हुला आला, कि ओ इस्राएल उपर प्रकट हुती जाओ।”
32ते यूहन्ना ने हा ग़वाही ङिली, “मैं पवित्र आत्मा नु कबूतरा चे समान आसमाना कनु उतरते ङेखले, ते ओ ओचे उपर रुकती गेली। 33मैं तां ओनु पिछाणले कोनी हुते, पर जेह्णे मनु पाणीया लारे बपतिस्मा ङेणे वास्ते भेज़ले, ओणे मनु केहले, ‘जाये उपर तु आत्मा नु उतरते ते रुकते ङेखे, ओही पवित्र आत्मा लारे बपतिस्मा ङेणे आला छै।’ 34मैं ङेखले, ते हा ग़वाही ङिये पला कि हाओ ही नरीकारा चा पूत छै।”
ईशु चे पेहले चैले
35ङुजे ङिओ यूहन्ना आपणे ङुंहु चैला लारे ओठे भीलता ला। 36ते ओणे ईशु उपर जको जाये पलता ङेखती कर केहले, “ङेखा, ईं नरीकारा चे मेमणे छै।”
37बल्ति यूहन्ना चे वे ङोन चैला ने ओनु ईं केहते सुणती कर, वे ईशु चे भांसु टुरती पले। 38ईशु ने मुड़ती कर वानु भांसु आते ङेखले ते वानु केहले, “तम्ही कानु सोते फिरा?” वाणे ओनु केहले, “हे रब्बी,” (मतलब हे गुरु), “तु किठे रिही वी?”
39ईशु ने वानु केहले, “आवा, ते तम्ही ङेखा।” बल्ति वाणे जती कर ओची रेहणे ची जग़हा ङेखली, ते वे ओ ङिओ ओचे लारे रेहले। हा पैशी चा समय हुता।
40वा ङोन महु, जको यूहन्ना ची बात सुणती कर ईशु चे भांसु टुरती पलते, हेक शमौन पतरस चा भऊ अन्द्रियास हुता। 41ओणे पेहले आपणे सक्के भऊ शमौन लारे मिलती कर ओनु केहले, “अम्हानु मसीह मिलती गेला”। (मसीह मतलब नरीकारा चा चुणला आला)। 42बल्ति अन्द्रियास शमौन नु ईशु चे गोढु गेहती आला।
ईशु ने शमौन नु ङेखती कर केहले, “तु यूहन्ना चा पूत शमौन छी, तु कैफा किहवावे।” (कैफा जानु पतरस वी किही यांचा मतलब चट्टान हुवे)।
ईशु ने फिलिप्पुस ते नतनएल नु हकारले
43ङुजे ङिओ ईशु गलील नु जाणे चाहवे ला। ओ फिलिप्पुस नु मिड़ला ते केहले, “माये भांसु हुती पड़।” 44फिलिप्पुस, तां अन्द्रियास ते पतरस चे बैतसैदा शहरा चा रेहणे आला हुता। 45फिलिप्पुस नतनएल लारे मिड़ला ते ओनु केहले, “जाया जिक्र मूसा ने व्यवस्था मां करला हुता ते भविष्यवक्ता ने लिखले, ओ अम्हानु मिलती गेला। ओ यूसुफ चा पूत, ईशु नासरी छै।”
46बल्ति नतनएल ने ओनु केहले, “का कुई आच्छी चीज वी नासरत कनु निकल सग़े?”
फिलिप्पुस ने ओनु केहले, “चालती कर ङेखती गे।”
47ईशु ने नतनएल नु आपणे गोढु आते ङेखती कर ओचे बारे मां केहले, “ङेखा, हा सच्चमां इस्राएली छै। ऐचे मां कप्पट कोनी।”
48नतनएल ने ईशु कनु पूछले, “तु मनु किवें जाणी?”
ईशु ने ओनु उत्तर ङिला, “ऐचे कनु पेहले फिलिप्पुस ने तनु हकारले, जिसे बेले तु अंजीरा चे पेड़ा तले हुता, ओ बेले मैं तनु ङेखले हुते।”
49नतनएल ने ओनु उत्तर ङिला, “हे रब्बी, तु नरीकारा चा पूत छी, तु इस्राएल चा महाराजा छी।”
50ईशु ने ओनु उत्तर ङिला, “मैं जको तनु केहले कि मैं तनु अंजीरा चे पेड़ा तले ङेखले, का तु ऐवास्ते विश्वास करी?। तु ऐकनु वी बङे-बङे काम ङेखे।” 51बल्ति ओनु केहले, “मैं तम्हानु सच्च-सच्च किहे पला कि तम्ही स्वर्ग़ा नु खुड़ले आले ङेखा, ते नरीकारा चे स्वर्ग़दूता नु मैं इन्साना चे पूता चे गोढु उतरते ते उपर जते ङेखा।”
Nke Ahọpụtara Ugbu A:
यूहन्ना 1: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0