متّی 27
27
یسُوع دی پِیلاطُس دے سامنڑے پیشی
1جِیں ویلے سویل تھئی تاں سارے سردار کاہِناں تے قوم دے بزُرگاں صلاح کر تے یسُوع کُوں قتل کرواوݨ دا فیصلہ کیتا۔ 2بس او اُونکُوں بَدھ تے گِھن گئے تے گورنر پِیلاطُس دے حوالے کر ڈِتا۔
یہُوداہ اِسکریُوتی دی موت
3جِیں ویلے اُوندے پکڑواوݨ آلے یہُوداہ ایہ ڈِٹھا جو یسُوع کُوں سزائے موت ڈیوݨ دا فیصلہ تھیّا ہے تاں پچھتایا تے چاندی دے او ترِیح سِکے سردار کاہِناں تے بزُرگاں دے کولھ واپس گِھن آ تے آکھنڑ لگا، 4”مَیں گُناہ کیتے جو ہِک بے قصُور کُوں قتل کیتے پکڑوائے۔“
او آکھنڑ لگے، ”ساکُوں کیا؟ ایہ تیڈا مسئلہ ہے۔“
5یہُوداہ پیسیاں کُوں ہیکل ءچ سَٹ تے چلیا گِیا تے پھانسی گِھن گِھدی۔
6سردار کاہِناں پیسے چا گِھدے تے آکھنڑ لگے، ”ایہ رقم تاں خون دی قیمت ہے، اِینکُوں ہیکل دے خزانے ءچ ڈیوݨ جائز نئیں۔“ 7وَل صلاح مشورے تُوں بعد اُنہاں اُوں رقم نال کُمہار دا کھیت مُل گِھدا تاں جو اُتھاں پردیسیاں کیتے قبرستان بنڑایا ونجے۔ 8اِیہو وجہ ہے جو او کھیت اَج تئیں خون دا کھیت اکھویندا ہے۔
9اُوں ویلے او گالھ پُوری تھئی جیہڑی یرمیاہ نبی دی معرفت آکھی گئی ہئی جو
”اُنہاں چاندی دے ترِیح سِکے گِھن گِھدے
یعنی او قیمت جیہڑی بنی اِسرائیل اُوندے کیتے مقرر کیتی ہئی
10تے اُنہاں کُوں کُمہار دے کھیت کیتے ڈے ڈِتا،
جِینویں رب العالمین میکُوں حُکم ڈِتا#زکریاہ 11:12،13۔ یرمیاہ 19:1-13 ؛ 32:6-9۔ ۔“
پِیلاطُس یسُوع تُوں تفتیش کریندے
11یسُوع گورنر دے سامنڑے کھڑا ہا، تے گورنر اُونکُوں پُچھنڑ لگا، ”کیا تُوں یہُودیاں دا بادشاہ ہیں؟“
یسُوع جواب ڈِتا، ”ایہ تُوں خود آدھیں۔“ 12پر جِیں ویلے سردار کاہِن تے بزُرگ اُوندے اُتے اِلزام لیندے پئے ہَن تاں اُوں کُجھ جواب نہ ڈِتا۔
13اِیں پارُوں پِیلاطُس اُونکُوں آکھیا، ”کیا تُوں ایہ سارے اِلزام نئیں سُنڑدا جیہڑے ایہ تیڈے اُتے لیندے پئین؟“
14پر یسُوع جواب ءچ ہِک لفظ وی نہ آکھیا، ایہ تئیں جو گورنر بہُوں حیران تھیّا۔
یسُوع کُوں سزائے موت سُنڑائی ویندی ہے
15عید دے موقع تے گورنر دا قانُون ہا جو او ہِک قیدی کُوں جِینکُوں لوک چُنڑدے ہَن چھوڑ ڈیندا ہا۔ 16اُوں ویلے برابّا ناں دا ہِک مشہور قیدی ہا۔ 17جِیں ویلے لوک کٹھے تھئے تاں پِیلاطُس اُنہاں کنُوں پُچھیا، ”تُساں کِیں کُوں چاہندے ہیوے جو مَیں تُہاڈی خاطر چھوڑ ڈیواں؟ برابّا کُوں یا یسُوع کُوں جیہڑا المسیح اکھویندے؟“ 18کیوں جو اُونکُوں پتہ ہا جو اُنہاں اُونکُوں حسد نال پکڑوائے۔
19جِیں ویلے پِیلاطُس عدالت دے تخت اُتے بیٹھا ہا تاں اُوندی ذال اُونکُوں ایہ پیغام بھیجیا جو ”اِیں نیک بندے دے خلاف کُجھ نہ کرو کیوں جو مَیں اَج خواب ءچ اِیندی وجہ کنُوں بہُوں ڈُکھ چاتے۔“
20پر سردار کاہِناں تے بزُرگاں لوکاں کُوں اُبھاریا جو برابّا کُوں منگ گِھننڑ تے یسُوع کُوں مروا چھوڑن۔ 21گورنر اُنہاں کنُوں پُچھیا، ”تُساں اِنہاں ڈوہائیں ءچوں کِیں کُوں چاہندے ہیوے جو مَیں تُہاڈے کیتے چھوڑ ڈیواں؟“
اُنہاں آکھیا، ”برابّا کُوں۔“
22پِیلاطُس اُنہاں کُوں آکھیا، ”وَل مَیں یسُوع نال جیہڑا المسیح اکھویندے، کیا کراں؟“
سبھ آکھنڑ لگے جو ”اُونکُوں صلیب اُتے چڑھاؤ۔“
23اُوں آکھیا، ”کیوں، اُوں کیہڑی بُرائی کیتی ہے؟“
پر او مزید شور مچا تے آکھنڑ لگے ”اُونکُوں صلیب اُتے چڑھاؤ۔“
24جِیں ویلے پِیلاطُس ڈِٹھا جو کُجھ نئیں بنڑدا بلکہ اُلٹا ہنگامہ تھیوݨ لگ پئے تاں اُوں پانڑی گِھن تے لوکاں دے سامنڑے آپنڑے ہتھ دھوتے، تے آکھیا، ”مَیں اِیں راستباز دے خون کنُوں بےقصُور ہاں۔ تُساں جانڑو۔“
25سارے لوکاں جواب ڈِتا، ”اِیندا خون ساڈے اُتے تے ساڈی نسل اُتے ہووے۔“
26وَل پِیلاطُس اُنہاں کیتے برابّا کُوں چھوڑ ڈِتا تے یسُوع کُوں کوڑے مروا تے صلیب اُتے چڑھاوݨ کیتے سپاہیاں دے حوالے کر ڈِتا۔
سپاہی یسُوع دا مذاق اُڈیندن
27وَل گورنر دے سپاہی یسُوع کُوں قلعہ دے اندر گِھن گئے تے پلٹن دے سپاہیاں اُونکُوں چارے پاسُوں گھیر گِھدا۔ 28اُنہاں اُوندے کپڑے لہا تے اُونکُوں رتّے رنگ دا چوغہ پوایا۔ 29وَل کنڈیاں دا تاج بنڑا تے اُوندے سر اُتے رکھیا تے اُوندے سجے ہتھ ءچ ہِک کانا پکڑوا ڈِتا تے اُوندے سامنڑے گوڈے ٹیک تے اُوندا مذاق بنڑاوݨ لگ پئے جو ”یہُودیاں دے بادشاہ! آداب۔“ 30تے اُوندے اُتے تُھکیا تے اُوہو کانا گِھن تے اُوندے سر اُتے مارݨ لگے۔ 31جِیں ویلے اُوندا مذاق بنڑا گِھدا تاں اُوندے اُتوں چوغہ لہا تے وَل اُوندے آپنڑے کپڑے اُونکُوں پوائے تے اُونکُوں صلیب اُتے چڑھاوݨ کیتے گِھن گئے۔
یسُوع کُوں صلیب اُتے چڑھایا ویندے
32جِیں ویلے سپاہی باہر آئے تاں اُنہاں کُوں کُرین شہر دا ہِک بندہ مِلیا جِیندا ناں شمعون ہا۔ اُنہاں ونگار ءچ اُونکُوں پکڑیا جو او یسُوع دی صلیب چاوے۔ 33وَل او گُلگُتا ناں دی جاہ اُتے پُجے، جیہڑی کھوپڑی دی جاہ اکھویندی ہے۔ 34اُتھاں اُنہاں یسُوع کُوں پِیوݨ کیتے انگُور دا رَس ڈِتا جِیندے ءچ کوئی کوڑی شے رلائی گئی ہئی پر اُوں چکھ تے اُونکُوں پِیوݨ تُوں اِنکار کر ڈِتا۔
35سپاہیاں یسُوع کُوں صلیب اُتے چڑھایا تے پرچی پا تے اُوندے کپڑے آپس ءچ وَنڈ گِھدے۔ 36وَل اُتھاں بہہ تے اُوندی نِگرانی کرݨ لگے۔ 37یسُوع دے سِر اُتے ہِک تختی لا ڈِتی گئی جِیندے اُتے ایہ اِلزام لِکھیا ہا جو ”ایہ یہُودیاں دا بادشاہ یسُوع ہے۔“ 38اُوں ویلے اُوندے نال ڈُو ڈاکو وی صلیب اُتے چڑھائے گئے، ہِک سجے تے ہِک کھبے پاسُوں۔
39اُتھوں کنُوں لنگھنڑ آلے سر ہِلا ہِلا تے اُونکُوں لعن طعن کریندے تے اکھیندے ہَن، 40”ہیکل کُوں ڈھا تے ترے ڈینہہ ءچ بنڑاوݨ آلے! آپنڑے آپ کُوں بچا۔ جے تُوں خُدا دا پوتر ہیں تاں صلیب تُوں لہہ آ۔“
41اِینویں ای سردار کاہِن وی شریعت دے عالماں تے بزُرگاں نال رَل تے اُوندا مذاق بنڑیندے ہوئے آدھے ہَن، 42”اِیں ڈُوجھیاں کُوں بچایا پر آپنڑے آپ کُوں نئیں بچا سگدا۔ جے ایہ اِسرائیل دا بادشاہ ہے تاں ہُنڑیں صلیب تُوں لہہ آوے۔ وَل اساں اِیندے اُتے اِیمان گِھن آسُوں۔ 43اِیندا بھروسا خُدا اُتے ہے۔ جے او اِینکُوں چاہندے تاں ہُنڑ وی اِینکُوں بچا گِھنے، کیوں جو اِیں آکھیا ہا جو مَیں خُدا دا پوتر ہاں۔“
44اِینویں ای ڈاکو وی جیہڑے اُوندے نال صلیب اُتے چڑھائے گئے ہَن، اُونکُوں لعن طعن کریندے ہَن۔
یسُوع دی موت
45ڈوپہر کنُوں گِھن تے تریجھے پہر تئیں سارے مُلک ءچ اندھارا چھایا ریہا۔ 46تریجھے پہر دے نیڑے یسُوع اُچی اواز ءچ آکھیا، ”ایلی، ایلی، لما شبقتنی#27:46 ڈیکھو زبُور 1:22۔ اِیں زبُور ءچ ڈُکھ چاوݨ آلے تے خُدا اُتے بھروسا رکھنڑ آلے بندے دی دُعا ہے۔؟“ جِیندا مطلب ہے، ”میڈے خُدا! میڈے خُدا! تُوں میکُوں کیوں چھوڑ ڈِتے؟“
47جیہڑے لوک اُتھاں کھڑے ہَن اُنہاں ءچوں کُجھ ایہ سُنڑ تے آکھیا جو ”ایہ تاں ایلیّاہ نبی کُوں سڈیندے۔“ 48اُنہاں ءچوں ہِک بندہ فوراً بھج تے ہِک سپنج کُوں انگُور دے سِرکے ءچ بوڈ تے گِھن آیا تے اُونکُوں ہِک کانے اُتے رکھ تے اُونکُوں چُسایا۔
49پر باقی لوکاں آکھیا، ”کھڑ ونجو۔ ڈیکھوں جو ایلیّاہ اُونکُوں بچاوݨ کیتے آندے یا نئیں۔“
50وَل یسُوع وڈے زور نال چِلا تے جان ڈے ڈِتی۔
51اِیندے تے ہیکل دا پڑدہ اُتوں کنُوں تلے تئیں پھٹ تے ڈُو ٹوٹے تھی گِیا تے زمین کمب گئی تے چٹاناں تِڑک گئیاں۔ 52قبراں کُھل گئیاں تے بہُوں سارے پاک لوک جیہڑے مر گئے ہَن، زندہ تھی گئے۔ 53یسُوع دے زندہ تھیوݨ تُوں بعد او قبراں ءچوں نِکل تے مُقدّس شہر ءچ گئے تے بہُوں سارے لوکاں کُوں ڈِکھالی ڈِتے۔
54جِیں ویلے صوبیدار تے اُوندے ساتھیاں جیہڑے یسُوع دی نِگرانی کریندے پئے ہَن، زلزلہ تے سارا واقعہ ڈِٹھا تاں بہُوں ای ڈر تے آکھنڑ لگے جو ”سچ مُچ ایہ خُدا دا پوتر ہا۔“
55اُتھاں بہُوں ساریاں تریمتاں جیہڑیاں گلیل کنُوں یسُوع دی خدمت کریندیاں ہوئیاں اُوندے پِچُھوں پِچُھوں آئیاں ہَن، پرے کنُوں ڈیدھیاں پئیاں ہَن۔ 56اُنہاں ءچ مریم مگدلینی، یعقُوب تے یوسیس دی ماء مریم تے زبدی دے پوتراں دی ماء ہئی۔
یسُوع دی تدفین
57جِیں ویلے شام تھئی تاں ارِمَتِیاہ شہر دا راہوݨ آلا یُوسف ناں دا ہِک امیر بندہ آیا جیہڑا خود وی یسُوع دا شاگرد ہا۔ 58اُوں پِیلاطُس دے کولھ وَنج تے یسُوع دی لاش منگی تے پِیلاطُس لاش اُوندے حوالے کر ڈیوݨ دا حُکم ڈِتا۔ 59یُوسف لاش کُوں گِھن تے ہِک صاف لینن دی چادر ءچ ولھیٹیا۔ 60تے اُونکُوں آپنڑی نوِیں قبر ءچ جیہڑی اُوں چٹان ءچ کُھدوائی ہئی رکھ ڈِتا۔ وَل او ہِک وڈا پتھر قبر دے مُنہ اُتے ریڑھ تے چلیا گِیا۔ 61مریم مگدلینی تے ڈُوجھی مریم اُتھاں قبر دے سامنڑے بیٹھیاں ہَن۔
قبر اُتے پہرا
62اگلے ڈینہہ جیہڑا سبت#27:62 سبت تُوں پہلے آلے ڈینہہ کُوں تیاری دا ڈینہہ آدھے ہَن۔ متن ءچ تیاری دے بعد آلا ڈینہہ لِکھیا ہے۔ دا ڈینہہ ہا، سردار کاہِناں تے فریسیاں رَل تے پِیلاطُس دے کولھ وَنج تے آکھیا، 63”سائیں! ساکُوں یاد ہے جو اُوں دوکھے باز آپنڑے زندہ ہوندے آکھیا ہا جو مَیں ترے ڈینہہ بعد زندہ تھی ویساں۔ 64اِیں واسطے حُکم ڈیؤ جو تریجھے ڈینہہ تئیں قبر دی نِگرانی کیتی ونجے۔ کِتھائیں اِینویں نہ تھیوے جو اُوندے شاگرد آ تے لاش کُوں چوری کر تے گِھن ونجنڑ تے لوکاں کُوں آکھ ڈیوݨ جو او مُردیاں ءچوں زندہ تھی گِیا ہے، تے ایہ بعد دا دوکھا پہلے آلے دوکھے کنُوں وی بُرا ہووے۔“
65پِیلاطُس جواب ڈِتا، ”تُہاڈے کولھ پہرے دار تاں ہِن، اُنہاں کُوں گِھن ونجو تے جِتھاں تئیں تھی سگے قبر دی نِگرانی کرو۔“
66بس او پہرے داراں کُوں نال گِھن تے گئے تے پتھر اُتے مُہر لا تے قبر دی نِگرانی کیتی۔
Nke Ahọpụtara Ugbu A:
متّی 27: SKRV
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Modern Central Saraiki Bible © 2024 Strategic Resource Group