मत्ती 28
28
यीसु जी उठे हबै
(मरकुस 16:1-10; लूका 24:1-12; यूहन्ना 20:1-10)
1सुस्ताय कर रोज कर बाद हप्ता के पहिलेन रोज अइतवार के सुबेन्नेन रथै, मरियम मगदलीनी अउ दूसर मरियम मरघटी के देखै आथै। 2काखे स्वरग लग परभु कर अक्ठी स्वरगदूत उहां उतरथै, अउ ऊ टेम बोहत भुंइडोल हुइस, स्वरगदूत उहां आयके पथरा के टरकाय के ओहमा बइठ गइस। 3ओखर रूप बादर के बिजली के जसना चमकथै, अउ ओखर बन्डी बरफ के मेर रथै। 4स्वरगदूत के देखके चवकीदार थरथराय लागथै अउ डेराय गइन।
5तब स्वरगदूत डउकिन लग कथै, “झइ डेराबा, काखे मोके पता हबै, जउन यीसु के क्रूस हे चढाय रथै, ओही तुम ढूंढथा। 6ऊ इछो नेहको हबै, पय ऊ कहे हर बचन के जसना जी उठे हबै, स्वरगदूत कथै, आबा ऊ जिघा देखा जछो ओखर देह धररे रथै। 7अब हरबी जाय के ओखर चेलन के गुठेबा, कि यीसु मरे हर मसे जिन्दा हुइ गय हबै, अउ ऊ तुम्हर लग पहिले गलील छो पहुंचही, तुम उहै ओही पइहा, जउन मै तुम्हर लग कहे हव उके सुरता रखिहा।”
8उन डउकी हरबी मरघटी लग कढ गइन अउ उन डेरात अउ मगन लग भर जथै, अउ यीसु के चेलन के संदेस देय के निता दउरत गइन।
9यीसु अचनकै गली हे उन डउकिन लग मिलथै अउ कथै, “खुस रहा” उन यीसु के लिघ्घो आइन ओखर परनाम करके भजन करिन। 10तब यीसु उनखर लग कथै, “झइ डेराबा, जा अउ मोर भाई के हइ संदेस देया, कि ऊ गलील परदेस छो जाय उहैं मोके पइहिन।”
चवकीदारन के खबर
11जब उन डउकी गलिन हे रथै, ता जउन कुछु घटना घटे रथै, चवकीदार सहर हे आयके उन परधान पुजारिन के सगलू कुछ बात गुठे देथै। 12जब उन सियानन के संग अकजुट हुइके बात चीत करथै, अउ चवकीदारन के बोहत पइसा दइके कथै, 13मनसेन लग हइ कइहा कि रात हे जब हम सोउत रहन, ता ओखर चेला आयके ओखर लोथ के चोराय लइ गइन। 14पय हइ बात बडे साहब राज्यपाल के लिघ्घो पहुंचही, ता हम उके समझाय लेयब अउ तुम्हर निता कउनो चिन्ता के बात नेहको होही।
15उन चवकीदार पइसा लइके ओसनेन करथै, जसना उनखर लग कहे रथै, हइ किस्सा फइल गइस अउ हइ बात आज तक यहूदी मनसे जानथै।
यीसु अपन चेलन के दिखथै
(मरकुस 16:14-18; लूका 24:36-49; यूहन्ना 20:19-23; प्रेरितो 1:6-8)
16तब ग्यारठे चेला गलील परदेस के ऊ डोंगर हे कढ गइन, जिहां यीसु चेलन के जाय के आदेस दय रथै। 17उन यीसु के देखके ओखर गोड तरी गिरके परनाम करथै, पय कुछ चेलन के सक होथै। 18यीसु उनखर लिघ्घो आयके कथै, “मोके स्वरग हे अउ भुंइ हे सगलू हक दय गय हबै। 19इहैनिता जाय के सगलू देसन के मनसेन के चेला बनाबा अउ उनही बाफ, टोरवा अउ पवितर आतमा के नाम लग पानी हे बतिस्मा देया। 20जउन बात मै तुमही आदेस दय हबो, उनके मानय के सिखाबा अउ देखा, हइ दुनिया कर आखरी तक हरमेसा तुम्हर संग हबो।”
Nke Ahọpụtara Ugbu A:
मत्ती 28: BTP25
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The Bhumiya Bible © The Word for the World International and © 2025 Bhumiya Bhasha Samiti, Madhya Pradesh