1 Korent 5
5
Árikutoor an éehine u naane bufuruka bu
1Irijamajam tánotan fe kaanuku abajeebaj t'aruun bufurukato b'árimeyie kaanuku humuum hite kéeyilenut ku kánijaariit iyu: kaane ake t'aruun aŋ'aŋot n'anaare ite faafo#5.1 Anaare ondu abukuto, bare ti faafo t'aseñee fu. Abe Eluwa yite Esuwif i eteñekateñeko bondu, ni yite i yooŋ bakate ku *Rom fe. A̱juk Esaraha i 18.8; Buluwa bu 23.1.! 2Abe aruun bokondu yooŋ ti biyitooro! Eeman ariwarawar yéeni kátaañian dómbokun, abe n'arinuutan t'aruun an u aa áhin ii bondu? 3Íñje ikambuunkamb, bare ehelam yendu t'aruun. Iheeka iijoonan an éehine u bondu ni kite íñj'eemo t'aruun. 4Af'aribin arikuukanooro tu huruwu hite Anahaan ite úne Yesu, abe sembe soone ni síyemi t'etutuun, ehelam n'eŋ'éyemi yooŋ n'aruun. 5Kóŋkeyin, árisik ániine ondu arisaan Setani#5.5 Aamo fu kawiis ániine ondu t'ejaŋgu i, kaanuku atum'aŋk'akuukanooro t'afeeneŋ ni *kéeyilene ku. A̱juk 1 Timote 1.20. man enio n'ébujo, búwejeto béeyini kafaku hunak h'Anahaan u ábatikein hu te ho.
6Biyitooro boonuun bondu bijakut! Árimeyiit kereŋ naane báhamin bonde bije i: «*Élefir yeefamut ef'ékundufuloolan éfariŋ yeefame#5.6 Hirim honde heesokee hee diye, ho hifeeneŋ hu ne heeemo hu ti Galasi 5.9, aamo fu naane úene: «Asaan afeeneŋ af'ábuj bihek.»»? 7Náami arinuutan t'etutuun kaahoofoor kondu keeemo ku naane élefir yéewuute man n'áriyemi bakan *keekuure but. N'aŋ'áriyemi naane éfariŋ éyeni yeebajut élefir. Abe ariheekaheek áriiyemi bakan keekuure, ábuki *Kiris aketaket bija t'aruun. O aamo fu ametek *eesarahee u *t'efeet ite Kánuutina ku Esipt#5.7 A̱juk yooŋ Kafakan ku 12.3,5,21.. 8Náami úhin efeet i, káanukiiit nu kumburu keebaje élefir yéewuute yite kaahoofoor ku ni bánafut bu, bare úfeet yo nu kumburu keebajut élefir, kite kakuuru ku, ni kite múniyo mu#5.8 A̱juk yooŋ Kafakan ku 13.7..
9Isokuunsok t'eleetar y'ibine i íkiñjinuun eenuun atum'arikol ni bakan kiŋki kafurukato. 10Ímaŋiit bare kágiilool toko bakate ku t'etaam ye kiŋki kafurukato, ni kiŋki kamero buroon bite bakaaku, ni kákuwat, man yooŋ n'iŋi kawaasen. Kaanuku ariiteyiin kareyi fe, aamo fu kame ariwarawar kanuutu t'etaam ye! 11B'ímaŋiuun bu yéeni kasoku beemo fu an af'aane akina Akarjen, abe bare akina yooŋ efuruka, ameraa buroon bite bakaaku, awaasena, asoka ti bakan, áwusana, man yooŋ ákuw, atum'arikol ne o. An naane ondu, áritumbut ariwar buñoofo ne o t'afeeneŋ.
12-13Íñje fíya iware fu kajoonan keenooto ku tu butoŋ bite Atambatun? Aaa, Atambatun aja fu kajoonaniin. Aruun bare, ariwarawar kajoonan k'ariemo ku ti bítim bifeeneŋ, naane *Míkiñjin mu musoke i. Meenaan: «Árikutoor t'aruun an éenafute#5.12-13 Buluwa bu 17.7..»
Nke Ahọpụtara Ugbu A:
1 Korent 5: cwt
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 1999, Wycliffe Bible Translators, Inc. All rights reserved.