Rut 2
2
1Al vamlian a naun a Naumi, dui lil iamk iak, sian istudau, nahan iv'i a Puas. 2#Livai 19:9,10; TVH 24:19.Laha, a Rut iv'i tav'et a Muap, ivr an a Naumi kavr ti a, “Pam'ahu a ti p'av'a a nut alu uit, katktak a nava uit. Nsarei m'ertu ipamk ipamhmah a kana.” Laha, ivr ani, kavr ti a, “V'liak, pav'a.”
3Laha, iv'el kasapar arm'ertu avtr uit katktak a nki iv'ral arna nut alu uit. Laha, iendan kadav'a asn nut alu uit iv'i nkan a Puas, iv'i dui arna vamlian a Elimelek.
4Laha, a Puas idan a P'etliem, kavr anr arm'ertu avtr uit, kavr ti a, “A Mlin Eia ipalak m'a kam'i.” Avvrprani, kavr ti a, “A Mlin Eia ipamhmah anh.”
5Laha, a Puas ivr a dui ip'aur parian, kavr ti a, “?Vitar lera iv'i tav'etan a hin ak?”
6Laha, dui ip'aur parian ivrprani, kavr ti a, “Hin iv'i tavet a Muap lahara isapei a Naumi naran iendan a Muap. 7Hin ivr a kam'em', kavr ti a, ‘Pavm'ahu a ti kana p'esapar arm'ertu avtr uit kavmlspiani, katktak a ki avlni.’ Hin ima m'etav'aran kan parei ier hilaha, sarei karnrn hin al nmah isusupa.”
8Laha, a Puas ivr an a Rut, kavr ti a, “Nakm pav'rn, natk tav'et, ipavr ti pam'ahu ani. Mahv'a katktak a sei al pitvet uraur. Maruh atlaha, v'eti palak asnr vitar na m'akarienak. 9Pap'a nut hir avan parei inap'ei kasapar. Ntvr sarei anr ardu a ti amaviarh. Naran parn navam, pav'a a nut atu nauei kam'n nauei la ardu atvev' sarei ha.”
10Laha, ihapr kasisihpu asnn, kavr ti a, “?Nakm kap'a kana krn ip'as a kana, kamhmah a kana sena v'ata, sena ti kana nv'i v'anudl?”
11Laha, a Puas ivrprani, kavr ti a, “M'ertu avr a kana, kavr ti nakm kan si p'as an a rinam naran a naum im'a dav'a kaier hilaha. Nakm kln a tetiam m'ei a uniam, kaln nut nakm kiak, kadama kalak asnr m'ertu kaarduar itauamu. 12A Mlin Eia ipatu ulienam anh. A Mlin Atua a Isrel ipatu ulienam ipaviviln a pariam, sena ti nakm kma kalak asnn a ti Hin apauavkarh al nil heian.”
13Laha, ivr ti a, “Kana nrn ip'as sena ti kmhmah a kana, mlinak, sena ti nakm kani v'ahienak ip'as. Kana nav'i vitar na m'akarienduam, v'eti nakm kvr si p'as a kana, inep'a ti nv'i vitar na m'akarienam.”
14Naran a ti apahatat, a Puas ivr ani, kavr ti a, “Nakm pama atlaha kahan p'ret kinkin kahs p'ret al nauei hau.” Sarei, ilak asnr m'ertu avtr uit. A Puas ittu p'ret ani, ihani dav'a kadapd, katu mamh duanan. 15Naran ip'tir a ti ipatktak ani ml, a Puas ivr anr arm'ertu na m'akarienan, kavr ti a, “Pavm'ahu a ti ipatktak a ki a p't nut na nhap't, mavv'ana hua m'ei. 16Sarei, pavkasesr ki ipav'ral a nadep' a ti hin ipatktak ani, v'eti mavv'ana hua m'ei.”
17Laha, itktak ani ier knarev', sarei ip'sepapr sei ittktak sarei ani, ihih ti iv'i lita inelru. 18Laha, irmanlei kadahau al v'anu lil. Laha, a rinan ila sei ittktak ani. Naran ithatat sarei kdapd, iuirma duanan asn a rinan.
19Laha, a rinan ivr ani, kavr ti a, “?Ktktak a si lera ip'i dika? ?Kv'a asr a hir ak? Dui imhmah anh dika, Atua irn ip'as ani.” Laha, ivrp'ep'ei an a rinan nut im'akar, kavr ti a, “Dui nm'akar m'ei, nahan iv'i a Puas.”
20 #
Livai 25:25. Laha, a Naumi ivr an a v'lian, kavr ti a, “A Mlin Eia iparn ip'as a m'ertu iaruh a ti ipan si p'as a m'ertu isilv' uam v'aha m'ertu itam'a sarei.” Laha, a Naumi ivr ani, kavr ti a, “Nakd nvspani, iv'i duanad.”
21A Rut, tav'et a Muap, ivr ani, kavr ti a, “Hin ivr sei uraur a kana, ivr ti, ‘Nakm pasapar arm'ertu na m'akarienak dav'a ti apavtr udlen uit a utak.’ ”
22Laha, a Naumi ivr an a Rut iv'i a v'lian kavr ti a, “V'liak, ip'as a ti pasapar arvitar na m'akarienan. Iaviviln a ti m'ertu apavpaslah al nut alu uit uraur.” 23Laha, ihihr arvitar na m'akarienan a Puas, katktak a sei ier naran avtr udlen uit. Sarei, ilak m'ei a rinan uam.
© 2023 Presbyterian Reformed Church of Australia