Rum 11
11
M'ertuduan Isrel apavv'ah v'nen p'asan a Mlin Eia
1 #
Vilipai 3:5. Sena si lera nmiman si laha, ?Atua itsran sera m'ertuan? Ikahei. Sena ti kana ml nv'i m'ertu a Isrel, kav'i a natn a Epraham kalak arna nl nam'elan a P'ensamin. 2Atua iasran m'ertuan la itrndu sarar tituei ha. ?Kaavrndu ti Paivul ivrur a Ilaitsa, nut itu tamat m'ei Atua kamlanr m'ertu a Isrel inap'ei? Ivr ti a, 3#1 Armlin 19:10,14.“U Mlin Eia, atvrpep'n sera ardu na v'nenam katvhlsr sera nev'etetam. Kana uaki namk nlak uam, v'eti avtala a navanel na ti apavrpep'n kana.” 4#1 Armlin 19:18.?V'eti Atua ivrprani inap'i? Ivr ti a, “Kana nuada m'ertuak avv'i tausen isaru (7,000) advlak uam, la ahaviaul kavsisihpu asn aitulan a Pal ha.” 5Arna naran laha inap'i lera. M'ertu kinkin iak uam Atua itv'li sarar arna vtmienan. 6V'eti ipavr ti iv'i sena vtmienan Atua, iav'i sena sei m'ertu avani. Sena ti ipavr ti ipanap'i lera, vtmienan Atua iav'i vtmien dau ml. V'eti ipavr ti Atua iv'li m'ertu sena pariar, iav'i sena vtmienan ml. Sena ti ipavr ti ipanap'i lera, parei iav'i pari dau ml.
7?Hilaha inap'i? M'ertu a Isrel ahavlev' sei avtala ani, v'eti m'ertu Atua itv'li sarar avlav'i, v'eti duanar, nlr ima kahua. 8#TVH 29:4; Aisaia 29:10.Inep'a nut Paivul ivri inap'ei kavr ti a, Atua iani ti avm'atr arna v'ahienar kani ti m'atar ikala sei, drlnar ikarn sei. Avnap'i lera ier dika.
9 #
Npin 69:22,23. A Divt ivri ml kavr ti a, “Ip'as a ti tim'ah avani ipasrr ipanep'a nam'et, kani ti apavrars a ti der ipaiarr ipaviviln anr. 10Ip'as a ti m'atar ipaprs a ti akavla sei. Nrn ti Nakm, Atua, pani ti dur ipahapr dav'a.”
Atua ihup'lten v'anudl avv'ahi m'er m'ertu a Isrel avv'ahi
11Sena si lera, nmiman si laha ml, ?Hir avtitihap'el a ti apavrars? Ikahei. V'eti m'ertu a Isrel avan si stu sena ti Atua ipalev'la v'anudl, a ti nlr m'ertu a Isrel ipaprr. 12Naran m'ertu a Isrel avrars, si p'sp'as istudau ier nadep' udlani. Naran hir avln p'kl p'asan Atua, si p'sp'as istudau ier v'anudl. Laha, naran Atua ipamhmah anr udlani ml, si p'sp'as udlani ipaier nadep' mau.
13Sena ti kana nv'ana m'a kam'i kvv'i v'anudl, sena ti nv'i apuselar v'anudl. Nrn ip'as istudau sena pari lil Atua itu kana a ti p'ani. 14Nrn p'ani ti m'ertu kinkin avlak arna nl nam'elak nlr ipapr v'anudl, laha, p'elev'lar hir kinkin. 15Aau, Atua isran m'ertu a Isrel a ti ipan tamat m'er m'ertu kinkin arna nadep' udlani. V'eti naran ipalev'la m'ertu a Isrel ml, ipanep'a ti avthal ml arna m'ienar.
16Naran atu pna vlaua an Atua itauamu, p'ret udlani ani a pnen iv'i nkan Atua. V'aha ipavr ti uar nai iv'i nkan Atua, ranan udlani iv'i nkan. 17Inep'a ti Atua itrus rana nai kinkin iv'i uliv, laha kalev' kam'i kvv'i ki na lili uaki kahup'lten kam'i m'a nki al pitvetan. Laha, kam'i kvlev' si udlani idan arna plen imsnen kam'i m'a ranan udlani. 18Sena si lera, kam'i mavukl kam'i kavmlen m'ertu a Isrel la avnep'a rana nai lahara Atua ittrus sarei hara, sena ti kam'i kaavp'aur uar nai, v'eti uar nai ip'aur kam'i.
19Nsarei nakm pavr ti a, “Hin itrus ranan a ti ipahup'lten kana”. 20Aau, itrus ranan lera sena ti ahavv'ahi, v'eti kam'i kvp'tir arna v'ahien p'as. Kam'i mavukl kam'i v'eti pavdedrn. 21Sena ti ipavr ti Atua iam'ahu a ranan dau a ti ipater, pavv'ahuri, imahei ti ikam'ahu anh. 22Sena si lera, kam'i pavla nut Atua ip'as inap'ei kavla nut Atua ihua inap'ei. Hin ihua aranar m'ertu atvrars sarei, v'eti ip'as arna kam'i, ipavr ti kam'i pavlak dav'a arna p'kl p'asan. Ipavr ti ikahei, hin ipatrus kam'i m'er. 23V'eti ipavr ti hir apavln p'kl stuar a ti ahavv'ah Atua, Atua ipahup'ltanr ml. 24Atua itrus kam'i kvv'i rana uliv al lili kahup'lten kam'i arna terp'as nen arna navanel iav'i p'kl nai. Sena si lera, iahua asnn a ti ipahup'lten m'ertu a Isrel ml avv'i rana nai dau al pitvetan.
25Tv'alk, narn ti kam'i mkavrndu v'nen tutuah laha. Imahei ti pavukl kam'i arna v'ahienam'i. Iv'i ti pna m'ertu a Isrel avrama kavhua, ipaier naran v'anudl udlani apavrama asn Atua. 26#Aisaia 59:20,21.Laha, Atua ipalev'la m'ertu a Isrel udlani, inep'a nut Paivul ivri inap'ei kavr ti a, “M'ertu iamk la ipalev'la m'ertu ha ipadan a Saiun, kalev'la si stu udlani arna nl nam'elan a Sikup. 27#Aisaia 27:9.Sena ti ki lera iv'i turanienak asnr, naran p'elev'la si stuar udlani.”
28Atua imlanr m'ertu a Isrel sena ti ahavrn v'nen p'as, a ti ipamhmah a kam'i, kvv'i v'anudl. V'eti ilap'as anr uam, sena ti itv'li sarar, sena turanienan ittu sarei anr a tetiar tituei. 29Sena ti Atua iavav v'ahienan, naran ittu sera sei anr m'ertu, katv'ara sarei anr. 30Tituei, kam'i kvluvn a v'nenan Atua, v'eti hilaha Atua imhmah a kam'i, sena ti m'ertu a Isrel avluvn a v'nenan. 31Inap'i lera, hilaha hir avluvn a v'nenan Atua, sena ti Atua itmhmah sarei a kam'i, a ti ipamhmah anr ml. 32Sena ti Atua iani ti m'ertu udlani inep'a ti avp'resin kavluvn a v'nenan dav'a ti ipamhmah anr udlani.
33 #
Aisaia 55:8. U, v'ahienan Atua m'a sei irndaui ilil istudau. ?Hin ak iparndu pla v'ahienan Atua arna sei iani? ?Hin ak ipapasla navanelan? M'ertu nen ihei. 34#Aisaia 40:13.Inep'a nut Paivul ivri inap'ei kavr ti a, “?Hin ak irndu v'ahienan a Mlin Eia? ?V'aha hin ak iv'iv'en sei ani? 35#Sup 41:11.?V'aha hin ak itu si kinkin ani a ti ipatu m'lnen ml asnn?”
36 #
1 Kurin 8:6. Sena ti si udlani idan asnn, kap'tir arna nut huan, kan sei Hin uaki irni. Nakd p'vani nahan ipav'a eia dav'a ikahiris naran, Amen.
© 2023 Presbyterian Reformed Church of Australia