Matiu 21
21
Nelnal avpatei a Iesu naran iv'a arna v'anu a Serusalem arna tuki
(Mak 11:1-11; Luk 19:28-40; Sun 12:12-19)
1Naran avihih nut a Serusalem kavier asn nut a Petvas, iter asn ptha iamk, nahan iv'i Ptha na Nai iv'i Uliv, a Iesu itep'a m'ertuan arru, kavr anr kavr ti a, 2“Parv'a arna v'anu lahatu la krlei ha. Naran parv'a atlera, iv'amk m'a ti parpasla tuki ipamk atlida sarei m'ei a natn ilak asnn. Parululr karuirma asnk. 3Ipavr ti m'ertu kinkin ipavr sei a kam'i, parvr ti a, ‘A Mlin irnr.’ Iv'amk m'a ti hin ipatap'er aparru.”
4Si udlani lera itu hin a ti sei pruvet itvr sarei tituei ipama katu hin, ivr ti a, 5#Sek 9:9.“Pavvr an a natn tav'et a Saiun, kavvr ti a, ‘Palei, a Mlinam ima asnm, iv'len, kav'el arna net tuki iamk, iv'i pua na tuki iua sei nakl.’ ”
6Laha, arm'ertuan a Iesu arv'el karani inep'a nut a Iesu itvr sarei anr inap'ei. 7Karuirma tuki m'ei a natn, kartu klusar arna dur, kani ti a Iesu ilak aranan. 8Sarei, nelnal avstudau avv'lien klusar arna navanel, m'ertu uraur ml avtr ru nai kinkin kavv'liani arna navanel. 9#Npin 118:25,26.Laha, nelnal avv'el kavtauamu ani m'er nki avtauatah avv'ara eia, kavvr ti a, “!P'vpatei a Natn a Divt, Atua ipamhmah ani! ‘!P'vpata M'ertu la ima arna nahan a Mlin Eia ha, nelnal avlak eia avpatei!’ ”
10Naran ier a Serusalem, nelnal udlani arna v'anu avtah ani istudau, kavvr ti a, “Hin ak la hin ra?”
11Laha, nelnal avvr ti a, “Aulera iv'i a Iesu kav'i Pruvet idan a Nasaret iter a Kalili.”
A Iesu itp'ev' m'ertu stu al nmah tamat
(Mak 11:15-19; Luk 19:45-48; Sun 2:13-22)
12Laha, a Iesu iv'a al nmah tamatan Atua, kasran m'ertu udlani avulul a sei kavul sei a nl naml na nmah tamat, katp'sesr udlen tiv'ar m'ertu avvav nav'et nakl, m'a sia iv'i nkar m'ertu udlani avulul a navimar, kavr anr kavr ti a, 13#Aisaia 56:7; Seremaia 7:11.“Paivul ivr ti a, ‘Apavr ti nmahak iv'i nmah na tamat’, v'eti kam'i kvani ti ima kav'i ‘navapar dui na v'nv'nahien.’ ”
14Dav'a m'etapis m'er m'ertu ahavv'eldau avrama asnn al nmah tamat, laha Hin imhmah anr. 15V'eti naran arpris lil m'er tisa na v'nen hua avla pari lilil udlani iani, kavrn ti mardel avv'ara eia al nmah tamat kavvr ti a, “!P'vpatei a Natn a Divt!” nlr irer ani istudau. 16#Npin 8:2.Kavvr ani kavvr ti a, “?Nakm krn sei avvri?”
A Iesu ivrpranr kavr ti a, “Aau, nsarei kam'i kaavv'ana arna Paivul naran kinkin arna nut ivr ti a, ‘Nakm kiela nl navar mardel papa m'er nki advnunu uam a ti apavpata naham.’ ”
17Laha, ilnr karuh arna v'anu lil kadav'a a P'etani kalak atlera.
P'alak iamk ima kam'aran
(Mak 11:12-14; 11:20-24)
18M'ih nen im'alet ml arna v'anu lil karn nam'er. 19Kala p'alak iamk a p'ak navanel, kav'el kadav'a asnn, v'eti iala navan kinkin aranan, raun uaki iududl. Laha, ivr ani, kavr ti a, “Mkahvan ml naran kinkin.” Iv'amk m'a ti nav'ah lahara ima kam'aran.
A Iesu iv'iv'en sei arna p'alak im'aran
20Naran m'ertuan avla si lera avtah ani istudau, kavvr ti a, “?Inap'i hin p'alak lera im'aran ilahml sarei?”
21 #
Mat 17:20; 1 Kurin 13:2. A Iesu ivrpranr kavr ti a, “Nvrdaui nvr a kam'i, ipavr ti kvv'ah Atua ihua a ti v'ahien p'asam'i ikahrs, kam'i pavrndu ti pavan sei nani a p'alak lera. Iav'i si lera uaki, v'eti ipavr ti pavvr a ptha laha, kavvr ti a, ‘Paruh atlaha kasranh al nata’, ipatu hin ipanap'i lera. 22Si udlani pavmimani arna tamat, kavv'ah ti ipatu hin, kam'i pavlav'i.”
?Nut huan a Iesu idan ip'i?
(Mak 11:27-33; Luk 20:1-8)
23Laha, naran ier nmah tamat, arpris lil m'er eltar m'ertu a Isrel avrama asnn, naran iv'iv'en sei, kavvr ti a, “?Nakm nut huam idan ip'i a ti pan pari lera? ?Ak im'ahu anh a ti pan si lera?”
24A Iesu ivrpranr kavr ti a, “Kana nrn p'emiman si ipamk a kam'i ml. Ipavr ti pavvrpren Kana, Kana p'evr a kam'i ml ak im'ahu a ti p'en pari laha. 25?Paptais la a Sun iani ha, idan ip'i? ?Idan eia v'aha iendan asn m'ertu uaki?”
Laha, hir avvrvr a hir kavvr ti a, “Ipavr ti p'vvr ti idan a nut eia, hin ipavr a nakd kavr ti a, ‘?Inap'i hin kaavv'ahi?’ 26V'eti ipavr ti p'vvr ti a, ‘Si lera idan asn m'ertu,’ nvdedrn sena nelnal, sena ti hir udlani avvr ti a Sun iv'i pruvet.” 27Sarei, avvrpren a Iesu kavvr ti a, “Kam'em' navrndaui.”
A Iesu ivr anr kavr ti a, “Sena si lera, Kana nkavr a kam'i hin ak im'ahu a ti p'en pari lera udlani.
A Iesu isran v'nen kavrur dui a natn iru
28?V'eti kam'i kvv'ahi inap'i? Dui iamk a natn dui arru. Hin ima asn titiamu kavr ti a, ‘Natk, pav'a dika kam'akarak al pitvet na nahau na krep.’ 29Ivrprani, kavr ti a, ‘Kana narni.’ V'eti itauatah irn istu ani kadav'a. 30Sarei, iv'a asn titiatah kavr si lera ml ani. Laha, ivrprani, kavr ti a, ‘Kana p'av'a, tatei.’ V'eti hin iahv'a. 31?Kam'i kvv'ah ti hin ak ien sei a tetian irni?”
Avvr ani kavvr ti a, “Titiamu.”
A Iesu ivr anr kavr ti a, “Nvrdaui nvr a kam'i, ti dui avlev' takis m'er tav'et na navanel apavrav'a arna v'anuan Atua ipatauamu a kam'i. 32#Luk 3:12; 7:29,30.Sena ti a Sun ima asnm'i kav'iv'en navanel p'as a kam'i, v'eti kaavv'ahi, v'eti ardu avlev' takis m'er tav'et na navanel avv'ahi. V'eti itauatah a ti kvla si lera, kaavvav v'ahienam'i a ti pavv'ahi.
A Iesu isran v'nen kavrur m'ertu stu avm'akar al pitvet na krep
(Mak 12:1-12; Luk 20:9-19)
33 #
Aisaia 5:1,2. Hilaha pavrn v'nen uraur ml p'esrani. Dui iamk nadep'an iak, ien pitvet na nahau na krep iamk, kan naml imldenkari kahl tah a nln, iv'i nut apas nava nahau a ti ipama kav'i naui m'iel, kahl nmah p'arei a ti apavp'aus nut, kataui al lm'ar dui kinkin a ti apavp'auri kavuli sanan. Sarei, hin iv'el kadav'a arna v'anu iamk iv'iv'a. 34Dav'a ier naran nava nahau itv'i ti ipam'am'd, laha, itep'a dui na m'akarienan kinkin asnr dui avp'aur pitvet a ti apavlev' nava nahau iv'i nkan. 35Laha, dui avp'aur pitvet avuada dui na m'akarienan lahara, kavrp tv'aln im'aththal kavrpep'n tv'aln kavmhr ki uraur ml. 36Sarei, itep'a dui na m'akarienan uraur ml avnelnal isiv' nki avtauamu, v'eti avani inap'i lera ml anr. 37Itauatah dau, itap'ei a natn dui, kavr ti a, Hir apavv'ah a natk. 38V'eti naran dui avp'aur pitvet avlei a natn, avvrvr a hir kavvr ti a, ‘Aulera iv'i a natn dui, si udlanian a tetian ipav'i nkan. Pavrama, p'vrpep'ni kavua sian udlani.’ 39Sarei, avuadei kavsrani iv'a aut asn pitvet na nahau na krep kavrpep'ni.
40?Sena si lera, naran mlin na pitvet na nahau na krep lahara ipama, kvv'ah ti ipan v'ata anr dui avp'aur pitvet lahara?”
41Avvr ani kavvr ti a, “Hin iputakm a dui stu lera udlani, katu pitvet na nahau na krep al lm'ar dui uraur la apavtu nava nahau ani nakl arna naran nen ha.”
42 #
Npin 118:22,23. A Iesu ivr anr kavr ti a, “?Kam'i kaavv'ana arna Paivul naran kinkin arna nut ivr ti a, ‘?Nakal la dui avhl nmah avsrani ha, ima kav'i nakalamu na nmah. A Mlin Eia ien si lera, nvla ti ip'as istudau’?
43Sena si lera, Kana nvr a kam'i, Atua ipalev'la v'anuan asnm'i kataui al lm'ar m'ertu uraur la nava pariar ipav'iv'en v'anuan Atua ha. 44M'ertu ipars arna nakal lera, p'akn ipamaur udlani, v'eti m'ertu nakal lera ipars aranan, ipani ti p'akn ipamrmaur kanep'a neiev'.”
45Naran arpris lil m'er arvarisi avrn v'nen israni, avrndu ti ivrurr. 46Laha, hir avtala a navanel a ti apavuadei, v'eti avdedrn a nelnal, sena ti nelnal avv'ah ti Hin iv'i pruvet.
© 2023 Presbyterian Reformed Church of Australia