Matiu 17
17
1Napn ilm'sei iv'siau, a Iesu ilev' a P'ita, a Sim'is m'a tv'aln iv'i a Sun, avududl avrav'a eia arna ptha lil iamk. 2Laha, p'akn ima kuraur. Nahn ier inep'a neiel, klusan itva kanep'a nut ren. 3Laha, pavrni, avla ti a Musis m'ei a Ilaitsa arv'ana m'ei. 4Laha, a P'ita ivr an a Iesu kavr ti a, “Tisa, ip'as sena ti nvlak atlaha. Ipavr ti krni, p'vhl nmah tvtv ipatl, nkam ipamk, nkan a Musis ipamk m'a nkan a Ilaitsa ipamk.”
5 #
Ap'u 22:2; Npin 2:7; Aisaia 42:1; Mat 3:17; 12:18; Mak 1:11; Luk 3:22;
TVH 18:15. #
2 P'ita 1:17,18. Naran idv'ana uam, pavrni, p'knaran iamk ier istudau ima kauakarr. Laha, pavrni, nadl iamk iendan al p'knaran lera, ivr ti a, “Aulaha iv'i a Natk nlap'as ani, nrn ip'as ani istudau. Kam'i pavv'rn ani.” 6Naran m'ertuan avrn si lera, avsisihpu kavrars arna nahr kavdedrn istudau. 7Laha, a Iesu ima kaiarr kavr ti a, “Pavthal, mavdedrn.” 8Naran avilenla nahr ahavla m'ertu kinkin ml, v'eti a Iesu uaki.
9Laha, naran avsasr arna ptha, a Iesu itu v'nen anr kavr ti a, “Mavvrp'ep'a sei kvlei a m'ertu kinkin ipaier ti Kana, nv'i Net M'ertu, p'ethal ml arna m'ien.”
10 #
Mal 4:5. Arm'ertuan avmiman ani kavvr ti a, “?Ipavr ti ipanap'i lera, inap'i hin artisa na v'nen hua avvr ti a Ilaitsa ipama pr ipatauamu?”
11Laha, a Iesu ivrpranr kavr ti a, “Aau, a Ilaitsa ikama iktauamu pr, kamhmah a si udlani. 12#Mat 11:14.V'eti Kana nvr a kam'i ti a Ilaitsa itama sarei, v'eti ahavrndaui, kavan si udlani avrni uaki ani. Apavutakm a Kana, nv'i Net M'ertu, ipanap'i lera.” 13Laha, m'ertuan avrndu ti ivrur a Sun Paptais.
A Iesu imhmah dui pa m'im'iln stu iuei
(Mak 9:14-29; Luk 9:37-43)
14Naran avier asnr nelnal ml, dui iamk ima kasisihpu asnn, kavr ti a, 15“Mlin, parn istu an a natk dui, sena ti im'em'a nakl karn istu sanan istudau. Sena ti iv'ev'anal irs al nep'v'en v'aha al nauei. 16Ntuirma sarei asnr arm'ertuam, v'eti ahavmhmah ani.”
17A Iesu ivrprani, kavr ti a, “U, kam'i kvsilv' hilaha, kaavv'ah Atua, v'ahienam'i iaviviln. ?Kana p'elak asnm'i dav'a ipaier v'aran? ?P'ern istu a kam'i ipaier v'aran? Pavuirma asnk.” 18Sarei, a Iesu iv'ana hua m'a m'im'iln stu, laha iruh a nln. Laha, mardel ima kap'as ml arna naran nen.
19Sarei, arm'ertuan avrama asn a Iesu naran iamamk, kavvr ti a, “?Kam'em' navrndu ti p'vsrani sena v'ata?”
20 #
Mat 21:21; Mak 11:23; 1 Kurin 13:2. A Iesu ivr anr kavr ti a, “Sena ti v'ahien p'asam'i isusupadau. Nvrdaui nvr a kam'i, ipavr ti v'ahien p'asam'i ipasusupa kanep'a m'et na m'adak varavar uaki, kam'i pavvr a ptha laha, kavvr ti a, ‘Paruh a m'lnam kadav'a atlera.’ Laha, ptha lera iparuh. Si kinkin ihei ipahua asnm'i. 21V'eti m'im'iln stu inap'i lera ikaruh ipavr ti ahatu tamat kaln tim'ah sanan.”
A Iesu ivri ml a ti ipam'a kathal ml
(Mak 9:30-32; Luk 9:34,35)
22Dav'a naran avlak a Kalili a Iesu ivr anr kavr ti a, “Apatu Kana nv'i Net M'ertu al lm'a m'ertu. 23Dav'a, apavrpep'n Kana, v'eti Atua ipani ti p'ethal ml arna nitla napn.” Laha, avrn istu ani istudau.
A P'ita m'ei a Mlinan arul takis
24 #
Avruh 30:13; 38:26. Naran avier a Kapaniam, m'ertu avlev' takis na nmah tamat avrama asn a P'ita kavvr ani kavvr ti a, “?Tisam iul takis nakl?”
25Ivr ti a, “Aau.” Naran ima al nmah, a Iesu ivr ani itauamu, kavr ti a, “?Saimun, nakm kv'ah ti mlin lil arna nadep' avlev' takis v'aha nav'et asnr m'ertuar v'aha asnr v'anudl?”
26A P'ita ivrprani, kavr ti a, “Asnr v'anudl.” A Iesu ivr ani, kavr ti a, “Inap'i lera, arm'ertuar ahavuli. 27V'eti navrn ti p'vani apavrars arna v'ahienar. Sena si lera nakm pav'a al naui lil kasran uk. Laha, tilau pasri ipatauamu, paiela pnn kapasla nav'et ipamk. Palav'i katau anr sena nakd nrru.”
© 2023 Presbyterian Reformed Church of Australia