Matiu 14
14
Atrus ptn a Sun paptais
(Mak 6:14-29; Luk 9:7-9)
1Arna naran lera, a Erut la iv'i mlin na nut iv'a ha, irn v'nen ivrur a Iesu, 2Kavr anr arm'ertu na parian kavr ti a, “Aulera iv'i a Sun Paptais, ithal ml arna m'ien. Sena si lera, hin nut huan iak ti ipan pari lilil.” 3#Luk 3:19,20.Sena ti a Erut itlev' sarei a Sun kahudei kataui al p'resin, sanan a Erutias, iv'i a nau tv'aln, nahan iv'i a P'iliv'. 4#Livai 18:16; 20:21.Sena ti a Sun itvr sarei ani, kavr ti a, “Iaviviln a ti pauei ipav'i a naum.” 5Laha, a Erut irn ti iparpep'n a Sun, v'eti idedrn a nelnal, sena ti avv'ah ti iv'i pruvet.
6V'eti arna pnul nen a Erut, a natn tav'et a Erutias ien naval arna nah nelnal kani ti a Erut irn ip'as ani, 7Katuran ani kah lm'an a ti ipatu si udlani ani hin ipamimani.
8Laha, isapa sei a unian itvr sarei ani, kavr ti a, “Patu ptn a Sun Paptais arna p'let ipamk katu kana atlaha.”
9Laha, a mlin irn istu, v'eti itu v'nen a ti apavtu si lera ani, sena ti itturan sarei ani kah lm'an arna nahr udlani avlak m'ei asn tiv'. 10Katep'a m'rnuran iamk ipatrus ptn a Sun al p'resin. 11Laha, auirma ptn a Sun arna p'let iamk katau a tav'et lera, sarei iuirv'a asn a unian. 12Laha, m'ertuan a Sun avrama kavlev' p'akn kavtini kavrav'a kavvrp'ep'ei an a Iesu.
A Iesu imsnen m'ertu avv'i tausen ilm' (5,000)
(Mak 6:30-44; Luk 9:10-17; Sun 6:1-14)
13Naran a Iesu irn v'nen lera, iv'a arna nauak kadav'a arna nut kaka a ti ipalak mamk atlera, v'eti naran nelnal avrni, avln v'anuar kavv'el kavsapei. 14Naran a Iesu ima aut arna nauak, ila nelnal istudau, karn istu anr kamhmah a m'ertu avm'at asnr. 15Knarev' nen arm'ertuan avrama asnn kavvr ti a, “Nut laha iv'i nut kaka, itv'i ti nut ipam't. Patap'er nelnal udlani apavrahau kavrav'a arna v'anu kavul tim'ah nar.”
16V'eti a Iesu ivr anr kavr ti a, “?Apavrahau sena v'ata? Kam'i uaki pavmsnanr.”
17V'eti avvr ani kavvr ti a, “P'ret ilm' m'a tilau iru uaki iter asnd.”
18A Iesu ivr ti a, “Pavuirma asnk.” 19Sarei, itu v'nen anr arm'ertu udlani a ti apavlak arna nina kalev' p'ret la ilm' m'a tilau iru hara, kap'a nut eia, kavr ip'as sanan, kakausi katu p'ret lera anr arm'ertuan, sarei, m'ertuan avtutau a nelnal. 20Hir udlani avhani kavrapd, sarei, avlev' tk p'ret udlani iter uam kavnani al naten inal lman iru. 21Dui udlani avhani avihih tausen ilm' (5,000), v'eti ahavspan tav'et m'er armardel.
A Iesu iv'el arna nauei
(Mak 6:45-52; Sun 6:16-21)
22Iv'amk m'a ti a Iesu iani ti arm'ertuan avrav'a al nauak ki iamk a ti apavtauamu ani kavrav'a a tv'eliel dav'a ti Hin ipatep'a m'ertu udlani apavrahau. 23Naran ittep'a sera m'ertu udlani atvrahau, Hin iamamk uaki kadav'a eia arna ptha iamk a ti ipatu tamat, dav'a nut ima kadam't, v'eti Hin uaki iamk ilak atlera. 24V'eti hilaha nauak lahara itier sarei al p't naui lil, nahu nen ildani istudau, sena ti avnka nalen.
25V'eti naran nut itv'i ti iparen, a Iesu iv'el arna naui lil kadav'a asnr. 26Naran arm'ertuan avla ti iv'el arna naui lil, avdedrn kavvr ti a, “Iv'i nm m'ertu kinkin”, kavv'ara eia kavdedrn istudau.
27V'eti iv'amk m'a ti a Iesu iv'ana m'er kavr ti a, “Pavrn ipap'as, iv'i Kana uaki. Mavdedrn.” 28Laha, a P'ita ivrprani, kavr ti a, “Mlin, ipavr ti iv'ih, pavr a kana a ti p'ama asnm arna nauei.”
29Laha, ivr ti a, “Pama.” Laha, a P'ita isasr arna nauak, kav'el arna nauei a ti ipav'a asn a Iesu. 30V'eti naran ila ti nalen itvtv ihuadau, idedrn, laha, kadav'adinei a nadep', kav'ara eia kavr ti a, “Mlin, palev'la kana.”
31Iv'amk m'a ti a Iesu iah lm'an kauadei kavr ani, kavr ti a, “U, nakm, v'ahienam isusupadau. ?Inap'i hin nlm ivrdedrn?” 32Laha, naran arma al nauak, nalen iulni.
33Laha, hir udlani avlak al nauak avrama kaviaul asnn kavpatei, kavvr ti a, “Nvvrndaui, Nakm kv'i a Natn Atua.”
M'ertu inelnal aviari kavrv'i
(Mak 6:53-56)
34Avier tv'eliel kavrama arna v'anu iamk, iv'i Kenesaret. 35Naran dui arna nut lera avledaui, avtep'a v'nen iv'a arna v'anu udlani italu a nut lera, laha, avuirma m'ertu udlani avm'at asnn. 36Kavmiman ani ihua a ti apavier kaka klusan uaki, laha, hir udlani aviari, avrama kavp'as udlani.
© 2023 Presbyterian Reformed Church of Australia