Susua 2
2
A Susua itep'a dui arru a ti aparp'ep'a nut a Seriku
(Isrel 11:31)
1 #
Isrel 11:31; Sim'is 2:25. Laha, a Susua, a natn a Nun, itep'a dui arru ardan a Sitim a ti aparp'ep'a v'anu a Seriku a ti apavan naur m'er. Ivr anr kavr ti a, “Parv'a, karp'a v'anu atlera, karp'ep'a mamh v'anu a Seriku.” Sarei, arv'el, karier nmaha tav'et na navanel iamk nahan iv'i a Rehap, karlak atlera. 2Naran lera, m'ertu kinkin avvr an a mlin a Seriku kavvr ti a, “Lihat dika, ardu a Isrel kinkin avrama atlaha ti apavp'ep'a v'anuad.”
3Laha, mlin lil a Seriku itep'a v'nen iv'a asn a Rehap, kavr ti a, “Pauirma ardu avrama asnm kavlak eimam, sena ti hir avrama ti apavp'ep'a v'anuad udlani a ti apavan naur m'a nakd.”
4V'eti tav'et lera itlav'r kattutuan sarar. Laha, ivr anr kavr ti a, “Aau. Ardu lera avrama asnk, v'eti kana nardu nut avdan.” 5“Sarei, naran avp'leskar pn liu, naran nut itam't sarei, ardu lera avruh. Kana nardu nut avrav'a. V'eti ipavr ti pavtkr anr ipalahml, paviarr.” 6Ivr si lera, v'eti hin ittutuan sarar eia arna drl nmahan, a nv' nina iamk avan heia natei ani, avr ti iv'i v'lakis, iter eia lera a ti neiel ipanasi nakl. 7Sarei, arm'ertuan a mlin avvrvr kavklau anr kavsiv' pn liu, sarei avp'leskar pn liu. Avtkr anr kavier nut navanel iluvn a nauei a Surtan.
8Naran adarm'atr uam, tav'et lera iv'a asnr a nut artutuah, 9kavr anr kavr ti a, “Kana nrndu ti Atua ittu sera v'anu laha a kam'i m'a m'ertu udlani arna v'anu laha atvdedrn sarei a kami. 10#Avruh 14:21; Nut Kaka 21:21-35.Sena ti nvv'rn ti naran Atua ilev'la kam'i a Itsip, iani ti Nata M'iel itupr hin, kvv'el kavrav'a a tv'eliel. Si uraur ml, nvv'rn ti avvr ti kvrp udlen m'ertu Amur, m'er mlinar nahar arv'i Saihun m'a Uk, la avlak a tv'eliel na nauei a Surtan ha. 11Naran nvrn si lera, nvtah ani istudau, v'ahienam'em' iv'a a nadep' dav'a. Navhua ml, sena ti nvla ti Atuam'i iv'i Mlin Lil arna nut eia m'a nut a nadep'. 12Kana nrn ti pavturan a v'nen hua ipamk arna nahan Atua a ti pavmhmah a nl nam'elak inep'a nut kana nmhmah a kam'i inap'ei. Nrn ti patu si kinkin a kana a ti ipav'iv'en turanien lera, 13a ti a tetiak, m'ei a uniak, m'er a m'ank, m'er tv'alk apavsilv' m'a siar udlani, akavram'a.”
14Hir arvrprani, karvr ti a, “Aau, ipavr ti mkavr si kinkin, kam'em' p'ersilv', kam'i pavsilv'. Naran Atua ipatu v'anu laha a kam'em', p'vmhmah a kam'i, nkavhap'il m'a kam'i. V'eti ipavr ti p'erkapr turanien ntran sarei, ip'as uaki a ti Atua iparp kam'em' p'erm'a.”
15Sarei, arsisi arna nahau a Rehap itaui iendan al uidua, sena ti nmahan iter arna naml hua lil na v'anuar. 16Laha, a Rehap ivr anr, kavr ti a, “Parlahml karier ptha, imahei ti arm'ertuan a mlin apavier asnm'i. Partutuah atlera napn ipatl, ipaier naran m'ertu avtp'ev kam'i apavm'alet ml. Sarei, parsapa navanel karhau.”
17-18Arvrprani karvr ti a, “Ipavr ti naran p'vrama kavan naur m'a kam'i mkatu nahau m'iel ipamk arna uidua la nrdan aranan ha, nkavuada turanien lera ml. V'aha, ipavr ti mkalav'r a tetiam, a uniam, m'er a m'anm, m'a nl nam'elan a tetiam a ti apavrama al nmaham, nkaruada turanien lera ml. 19Ipavr ti kam'i ki ipamk ipama av'aran, p'vrpi, ikav'i pariam'em'. V'eti ipavr ti p'vrpep'n kam'i ki ipamk al nmaham, kam'em' uaki p'vua deran. 20Ipavr ti pavrp'ep'a kam'em', nkavuada turanien nrtau anh.”
21A Rehap ivrpranr, kavr ti a, “Sei krvri iviviln.” Sarei, arv'el. Naran arv'el, itu nahau m'iel lahara arna uiduan.
22Arv'el karier ptha, kartutuah napn itl. M'ertuan a mlin a Seriku avklau anr, ahavlar, sarei avm'alet. 23Sarei, arsasr arna ptha, karluvn a nauei a Surtan, karma asn a Susua, a natn a Nun. Karvrur si udlani itu hin asnr. 24Arvr ani karvr ti a, “Hilaha nvrndu mamh ti Atua ittu sera v'anu lera a nakd. Sena ti ardu a Seriku avdedrn istudau a nakd.”
© 2023 Presbyterian Reformed Church of Australia