Usia 2
2
A Mlin Eia ilap'as anr arm'ertuan, la avruh asnn ha
1Pavr anr tv'alm, kavr ti a, ‘Kam'i kvv'i arm'ertuak.’ Sarei, pavr anr a v'nm, kavr ti a, ‘Atua iparn istu uam.’
A Isrel inep'a sera tav'et iruh asn a naun
2Pav'ana hua m'ei a uniam, aau, pav'ana hua m'ei. !Sena ti hin iav'i a nauk, Kana nav'i a naun! Ipasran sei, la iani naran iv'i tav'et na navanel ha, aau, ikap'ei ml. Ipasran sei iani naran iruh asn a naun, la avrater a p't nut na nunuan ha. 3Imahei ti p'elev'la klusan udlani, aau, ipamalmal kanep'a sera napn iak ser, kani ti ipanep'a sera nut kaka, kani ti ipanep'a sera nadep' la im'am'a ha, kani ti iparn navan dav'a ti ipam'a. 4Kana nkarn istu anr a natn, sena ti avv'i net pari na tav'et na navanel. 5Sena ti a uniar iten sera pari na tav'et na navanel. Hin, la itkar karmanr ha, iten sera sei iviviln a ti apamamih sanan. Sena ti ivr ti a, ‘P'esapar m'ertu avm'atr m'a kana nakl, la avtu tim'ahak a kana, kavtu naui p'rei a kana. Aau, avtu nil sivsivak a kana, kavtu kalik (la iv'i nkak ha), m'a ueil, m'a nauei a kana.’ 6Sena si lera, palei, Kana p'elu nai vtvtv, la lun iak ha, ipatukar navanelam. P'etu naml ipamk asnn, a ti ikarndu ti ipapaslar navanelan nakl. 7Ipatkr anr arm'ertu avm'atr m'ei nakl, v'eti ikaiarr. Aau, ipatala anr, v'eti ikapaslar. Sarei, ipav'ana, kavr ti a, ‘P'ev'el kam'alet asn a nauk itauamu, sena ti naran lera ip'as mau asnk kasiv' hilaha.’
8Sena ti iarndu ti Kana nttu sera uit, m'a naui m'iel m'dah, m'a ueil ani. Aau, iv'i Kana nani ti iak a silva m'a kul--la arm'ertu avandedp' sanan a Pal ha. 9Sena si lera, Kana p'em'alet kalev'la uitak arna naran nen, kalev'la naui m'ielak arna naran na ti apalev'lei arna nahau nen. P'elevm'alet a nil sivsivak, m'a kalikak, la nttu sarei a ti ipatavkar p'akn ha, a ti ikamalmal. 10Hilaha, p'elev'la klusan kav'iv'en si stu iani. Laha, ardu atvm'atr sarei m'ei apavp'ei. M'ertu kinkin ikalev'lei al lm'ak. 11Sarei, p'ani ti hin ikavtma, karn ipap'as ml. P'elev'lar napn na tim'ah lilil hir avani nakl--avv'i tim'ah lilil sena nal m'dah, m'er tim'ah lilil sena Sapat--aau, p'elev'lar tim'ah lilil udlani. 12Sarei, p'utakm anr nahau na krepan, m'er p'alak (la avv'i nkan ha), la ivrurr, kavr ti a, ‘Si laha nakl avv'i uliena pariak, la ardu atvm'atr sarei m'a kana ha atvtu sarei a kana.’ Sena si lera, p'ani ti apavv'i lili uaki, sarei, si dm na lili apavhanr. 13P'erpi sena napn, la ial sida p'as sanan a Pal aranan ha. Itu hapir al drln, katu neiau arna p'akn, sarei kav'el a ti ipapaslar ardu kinkin, a ti ipam'atr m'er nakl. V'eti ivnapn a Kana.” A Mlin Eia iv'ana, kavr si lera.
A Mlin Eia iparn istu anr arm'ertuan
14A Mlin Eia iv'ana, kavr ti a, “Sena si lera, palei, Kana p'erv'i, aau, p'euirv'a arna nut m'ertu ihei, sarei kav'ana p'as m'ei, kamhmah ani. 15#Susua 7:24-26.P'etu ani nahau na krep, la aviak atlera ha. P'etu m'ihual, la iter arna nut Akur ha, ani, ipav'i liu na ti ipalaksrah sei. Ipahai atlera, ipanep'a sera naran iv'i vitar, aau, ipanep'a sera naran iv'el karuh arna v'anu a Itsip.” 16Laha, a Mlin Eia iv'ana, kavr ti a, “Ipatu hin arna napn lera, nakm pav'ara Kana, kavr ti a, ‘A nauk.’ Mkav'ara Kana ml, kavr ti a, ‘Mlinak’. 17Sena ti p'elev'luar nahar atua avv'i Pal dan al pnn. Laha, apavnapn a nahar, akav'ahurr ml. 18Arna napn lera, Kana p'en turanien ipamk sanar, hir m'er si dm arna nadep', m'er m'anh avtetv eia arna p'knaran, m'er sei avharev' arna nadep'. P'ekapaprr tenpaui, m'er tali na naur, akavrater ml arna nadep' ka, a ti si udlani ipam'atr arna nadep' kalak p'as uaki.
19Laha, p'etukarh, pav'i nkak ikahiris naran. Aau, p'etukarh arna navanel viviln, ipasapa v'nen dau. P'elap'as anh, karn istu anh nakl. 20P'etukarh, sena ti Kana p'klk ip'as. Laha, parndu ti Kana nv'i a Mlin Eia.” 21A Mlin Eia iv'ana ml, kavr ti a, “Laha, ipama katu hin arna napn lera, Kana p'evrpran v'nen hapr. Aau, p'evrpran nut eia, sarei, nut eia ipavrpren nadep' ka. 22Laha, nadep' ipavrprani m'a uit, m'a naui m'iel, m'a ueil. Aau, si lera nakl apavrpren a Sesril. 23#Rum 9:25; 1 P'ita 2:10.Sarei, ipanep'a ti Kana p'elu tav'et lera al nadep' sanak. P'ern istu anr m'ertu, la adavpasla ti Atua irndu ti iparn istu anr ha. Naran lera, p'evr anr m'ertu, la adavv'i m'ertuak ha, kavr ti a, ‘!Kvv'i m'ertuak ra!’ Sarei, apavvrpren Kana, kavvr ti a, ‘!Nakm kv'i Atuam'em'!’ ”
© 2023 Presbyterian Reformed Church of Australia