Esta 7
7
Avsrp'n a Haman arna nai
1Laha, a mlin m'ei a Haman arv'a a ti apavhatat m'ei a Esta, la iv'i a hau lil ha. 2Laha, arna tv'el napn, naran avlak kavm'n naui m'iel, a mlin iv'ana m'ei a Esta ml, kavr ti a, “?Esta, kv'i a hau lil, nakm krn ti pamiman v'ata? Sei pamimani, kana p'etau anh pr. ?Krn ti pamiman pna si udlani arna v'anuak? Ipavr ti ipanap'i lera, p'etau anh uaki.”
3Sarei, a Esta, iv'i a hau lil, ivr ti a, “U, mlin, ipavr ti nakm parn ipap'as a kana, ipavr ti a mlin iparn ipap'as a ti ipam'ahu a sei p'evri, pam'ahu a ti p'esilv' naran p'emimani, kam'ahu a ti arm'ertuak apavsilv' naran p'emimani. 4Sena ti m'ertu iamk itulul sarei a kana m'er arm'ertuak, a ti arm'ertu apavutakm a kam'em', kavrpep'n kam'em', kavani ti m'ertu ipamk ikasilv' ml. Imvr ti atvulul a kam'em' a ti p'vv'i ardu na parei m'er tav'et na parei, kana nkavr si kinkin, v'eti m'ertu imlen kana ikatum'alet a sei ilev'lei asn a mlin.”
5Sarei, a mlin Ahasueras ivrpren a Esta, kavr ti a, “?Dui lera iv'i hin ak? ?Dui lera ilak ip'i? ?Hin ak iak a v'ahien inap'i lera, a ti ipan sei ipanap'i lera?”
6Laha, a Esta ivr ti a, “!Dui imlen kana, kalep'la kana, iv'i dui stu laha, iv'i a Haman!” Sarei, a Haman ilak asnr a mlin m'ei a hau lil, kadedrn istudau.
7Laha, avlak arna tim'ah lil (naran avm'n naui m'iel), v'eti a mlin ilaph, sena ti nln irer istudau. Sarei, iv'a al pitvet pa, la iter mima asn nmah p'asan a mlin ha. V'eti a Haman ip'tir arna nahn a Esta, iv'i a hau lil, kamimani ihua ti ipasilv', sena ti ila ti a mlin itv'ahur sarei ti iputakm ani ipastudau. 8Laha, naran a mlin im'alet dan al pitvet pa, la imima asn nmah p'asan a mlin ha, sarei kadav'a arna nut avan tim'ah lil kavm'n naui m'iel, ila ti a Haman itars sarei arna napl p'as, la a Esta ilak aranan ha, inep'a ti im'atr aranan. Sarei, a mlin ivr ti a, “?Iviviln a ti dui laha iputakm a hau lil naran kana nlak eim al nmah, v'aha inap'i?” Naran a mlin idahiris a ti ipavr si lera, avtavkar ptn a Haman m'a kalik iamk. 9Laha, a Harpuna, iv'i tamav iamk, ivr an a mlin, kavr ti a, “!Palei! A Haman ithl sera nai p'arei iamk asn nmahan, a ti ipasrp'n a Mutekai aranan, nut eia ier a nadep' iv'i mita inelru pln ilm' (25 m). V'eti a Mutekai lera iv'i dui ivrp'ep'a v'nen p'as lahara, aau, imhmah an a mlin.” Laha, a mlin ivr ti a, “!Pavsrp'ni aranan!” 10Laha, avsrp'n a Haman arna nai hin ithl sarei sanan a Mutekai. Sarei, nl reran a mlin iv'a a nadep'.
© 2023 Presbyterian Reformed Church of Australia