Memaŋa 7
7
Nɔn-doŋo de ka-bworo taane
1Amo bu, sɛ se n jwoŋi a bera yam. Kwei nia yalo a na pɛ‑m to n ke n yuu ne. 2Ta‑n ke n tɔge a nia yam, se n wó na momwɛ-dɛɛre. Ta‑n ni a bera yam nenɛɛne ya ye n tete yi-chele-bu mo to. 3Ta‑n guli ya gula maŋa maama. Pa ya taa tigi n boboŋa ne wuu, ne n na popone-ya n tiŋi kandwa-pelɛ yera ne tei to. 4Sɛ se swa chekke taa nye de n nakɔ mo, se yi-poro de taa ye n badwoŋ-swono. 5Banto ná wo n tei ne, ko wó che‑m de ka-bworo kom. Nmo ma‑n wó lu ka-tola kalo na mae ni-som o soge nɔɔna to jeŋa ne.
6Amo yɔɔre a zege a sɔŋɔ takworo ni ne mo, ye a leesi a nii 7a na nɔn-donno na vei chwoŋa ne tei to. Nayeiri-nyem maa wo ba wone, ye a maane we o tiini o ga boboŋa. 8O maa tɔge chwoŋa kalo na vei ka-tola sɔŋɔ kom seeni to, ye o vo o yi ko jeiga kam. 9Ko déem ye wɛ-zwora maŋa mo, ye je-gwonnu ba nii te nae. 10Kaane wom de maa yɔɔre o pi o nwoŋi se o jeeri‑o. O yɔɔre o zo ka-bworo gwaaro mo ye o laam jege o boboŋa o seiga. 11Kaane wom tiini o pepera mo ye o ba kɔre nɔɔno yi. O nam ware jeiga dedoa se o jeini da. 12O yɔɔre o kare teo kom chwei sem ni ne, de ko yaga kam ni ne mo o seigi o nii o na wó yi wolo to. 13O laam ma yɔɔre o vaŋe nɔn-doŋo konto o kukwori‑o ye o mu o ni, o daare o ta o bere‑o de baare we: 14“Yazura pɛɛre nɔna ta daare a sɔŋɔ kom ne mo. A zem nam ke a su a ni-gwonim dem mo. 15Konto ŋwaane mo a nwoŋi se a jeeri‑m. A ya yɔɔre a beeri nmo jei mo, wɛ-ywom nam nii‑m da! 16Amo kwei gare-laaro mo a ma a lware a kwoli a gadwogo kom maama. Te maa ye gare-fefale selo na nwoŋi Ejipti teo ne ye se nyenyero ye dwi dwi to. 17A ta ma kwei talwoŋ-ywoŋa dwi dwi a zezage a yage ko maama ne, se na ye Mura, de Alwo, de Kinamon to mo 18Laam nam ba se dé zo dé lare dé yi dé tete se tega laam ba ka poore. Dé yɔɔre dé lage dé di dé swono kom ywoni mo. 19Amo baro beeri o kɛ yiga yiga mo. O tera sɔŋɔ ne. 20O nam kwei sabu na daga mo o ke o yera ne o ja o kɛ. Chana kam wó peere ka ti mo se o laam jwoori sɔŋɔ.”
21Ka-tola kam tɔge chwoŋa kam konto mo o ja nɔn-doŋo kom o ywori. O nam yɔɔre o kwei ni-som mo o soge‑o o wane. 22Bedwe baŋa ne mo o pɛ o kwaga o pu, ne na-bala mo ba jege ba vei se ba go to. O ta nye de woŋa kalo kalanchogo na jaane 23ye ko laam daare se che-tɛɛre moore o bochɔŋɔ ne to mo. Ne zuŋa kalo na zo kalanchogo wone to, o nam yeiri we o seene o to cham wone se o ga o ŋwea.
24Konto ŋwaane amo bia bam, nam cheigi-na a taane dem. Ke-na á zwa keo se á ke a bera yam á boboŋa ne. 25Yé pa-na kaane wom konto dwoŋi chwoŋa se o soge abam o wane. Nam yé sɛ-na se o ja abam o ywori á chwoŋa kam ne. 26O pɛ baara dedɛ mo to tega ne, pa se nɔn-kɔgɔ dole ba ŋwea ba yage. 27Balo na zo o sɔŋɔ kom ne to laam to chwo-fara kalo na vei churu to ne. Chwoŋa kam konto wó ba ka guri de toone mo.
© 2020, Ghana Institute of Linguistics, Literacy and Bible Translation (GILLBT)