Memaŋa 26
26
1Ne doa na ba nena, ye nyɔnɔ de ba toe te-pwoŋa ne tei to,
konto mo nɔn-jworo de wo maŋe se n zuli‑o.
2Ne kawɛbidwoori na ba jege tega jeiŋa tei to,
mo sensɔla kalo na wo tɔge chwoŋa to na ye tei.
Ka bá jeini n yuu ne.
3Fere sisein-nɔɔno de fena,
se n de ŋona bonaga ba ne n vaŋe-ka.
Ko nam ná ye nɔn-jworo,
mage‑o se ko yi.
4Nɔn-jworo ná tage taane pa n leiri-de,
nmo ded‑o ba gare daane.
5Leiri nɔn-jworo de o jworim dem.
Ko ná dae konto,
o wó boŋe we o yɔɔre o yei mo.
6Nmo ná kwei kwora n ke nɔn-jworo jeŋa ne se o vo o pa nɔɔna,
nye de n na zage n tete naga n gwoni,
naa n na beeri cham n pa tete tei to mo.
7Ne gɔrɔ nɛ na ware se vo tei to,
konto mo nɔn-jworo de ware o lɔre dende kuri.
8Nmo ná vɔge kandwɛ napana wone
se n vuvugi n yage,
nye de n na kwaane se n zuli Agɛboŋa tei to.
9Ne sa-nyɔro na yeiri sabara jaanem tei to,
konto mo nɔn-jworo de yeiri dende kuri.
10N ná kwei totoŋe n ke Agɛboŋa jeŋa ne,
n mage bwogo mo.
11Ne kukura na jwoori ka di ka tetwanno tei to,
nɔn-jworo de kare o toŋe jworim konto mo.
12Nɔn-jworo jege teena se o lɔre,
se ko dwoi wolo na pa o yei to.
13Jawɔre-nyem tigi mo ye o we,
“Nywoŋo kare pwooni ne ko beera!”
14Ne diga ni bworo na pore
ye ko pe tei to,
konto mo yezona tu
de kare o pipiri o sara ne.
15Nɔɔna badaara jawɔrɔ ye ko yera.
Ba ná tore jeŋa zoŋa ne ba fɔ gole,
ba ware ba lu dwoa
se ba ja-de ba vo ba ni.
16Jawɔre-nyem pa o yei o dwoi yi-pore-nyena barepɛ na yeini ba leiri taane de swa tei to mo.
17Nɔɔno ná jwoŋi o dwoŋi jara o ja,
kotu wó na na-gare chene mo.
18Ne chichwoo na tae chena yɔɔ yɔɔ tei to,
19mo wolo de na gane o dwoŋi ye o we,
“A ke a kwɛɛra mo” de na ye tei.
20Dɛ ná ti, mini wó dwei mo.
Bebara ná tera, ni-kantɔgɔ jei mo.
21Min-chala nyeeri mini mo,
nankɔ-nyem de maa nyeeri jara.
22Bebare nyem ni taane nye de wodi-ywoŋo na duri solololo ko tu nabiinu kana ne to mo.
23Wolo ná tage taane
ye o wo ba tɔge o taane dem,
kotu nye de ba na kwei lu-nyenno
ba taare dɔgɔ kamɔgɔ tei to mo.
24Pipiri-nyem kwei ni-som mo
o seigi o boboŋa.
O laam maa tɔge dáane
o chɔge nɔɔna.
25O taane dem ná ywomma tei maama de,
yé sɛ-de, se o boboŋa yɔɔre ya su de lwarem mo.
26O ná seigi o boboŋ-lwanno tem tei maama de,
te wó nwoŋi pwooni
se nɔɔna na-te jaja.
27N ná chege kalanchogo,
ko wó ja n tete.
N nam ná bibili kandwɛ-zane
n ja n di peo yuu n yage-de,
de wó bibili de to de pane‑m mo.
28Vwa-nyem chuli o dona mo.
Ni-som nyem maa jaane chɔgem o tui.
© 2020, Ghana Institute of Linguistics, Literacy and Bible Translation (GILLBT)