Mateo 8
8
O Jesus sastarel iekhe llene katar e lepra
Mk 1.40-45; Lk 5.12-16
1Kana fulisto o Jesus katar o burdo, but sueto llala pala le. 2Ta avilo pasa le iek leproso kai dia changa angla le, ta phenda leke:
Gazda, te mangea, sai sastare man katar mo nasualipe.
3O Jesus dodisarda le pe vastea ta phenda:
Mangav. ¡Sastiv! Ta isto kote achilo chisto katar po nasualipe. 4Ondaka o Jesus phenda leke:#Lv 14.1-32.
Na phen nikake so avilape tuia, lla ta sikado e popoke, ta de kurbano pala cho sastipe sar phenda o Moises te cheren, te sai dikhen e popura kai sastilan.
O Jesus sastarel iekhe esluga katar iek boñiko
Lk 7.1-10; Jn 4.43-54
5Kana o Jesus dia ando Kafarnaum, avilo pasa le iek boñiko kai molilape leke. 6Ta phenela:
Gazda, mo esluga si ande postelia po meripe ando cher ta nasti phirel ta dukhal le but.
7O Jesus phenda leke:
Me ka llau ta ka sastarav le. 8A o boñiko phenda leke:
Gazda, ni sem manus lacho te de ande mo cher, samo phen o alav ta mo esluga ka sastol. 9Soke i pe mande gazdarin ta i me gazdariu, ta si tala mo va boñikura, ta phenav goleke lla, ta vou llal, a ogoleke:
Aide, ta vou avel. A kana me phenav me eslugake cher gaia ezgoda, vou cherel la.
10Kana asunda le o Jesus chudisailo ta phenda e llenenge kai llana pala lete:
Chachimaia phenav tumenge ka ni ando Israel ni maladem gia baro pachape sargo gale lleneko. 11Phenav tumenge kai but llene katar o oriente ta katar o oksidente ka besen e Abraamea, e Isaakea ta i e Jakoboia ande charoina e milosoki,#Lk 13.29. 12a e chave e charoinake ka aven tradine avri ando truniariko, kote ka avel o roipe ta e bari dar.#Mt 22.13; 25.30; Lk 13.28.
13Ondaka o Jesus phenda e boñikoke:
Llatar, ta gia sar pachaian te cherdol chuke.
Ta leko esluga sastilo isto ande gua saiato.
O Jesus sastarel esasui e Pedroki
Mk 1.29-31; Lk 4.38-39
14O Jesus llelo kai o cher e Pedroko, ta dikhla kai leki sasui saia ande postelia ta phabola nasualimatar. 15Ondaka dodisarda lako va ta sastili, voi ustili, ta radila leke.
O Jesus sastarel buten nasualen
Mk 1.32-34; Lk 4.40-41
16Kana peli e riat inllarde lete bute llenen kai sea llavolura ande lende, ta samo e alavea tradia avri e llavolonen ta sastarda sa e nasualen. 17Gia cherdilo so phendaia o profeta o Isaias:#Is 53.4.
Isto vou lia amaro nasualipe ta lia amare dukha.
Gola kai mangena te llan pala o Jesus
Lk 9.57-62
18Kana o Jesus dikhla kai truial letar saia but sueto phenda te nakhen pe o goia rig katar e mora katar e Galilea. 19Ta avilo pasa le iek kovachi e zakonoko ta phenda leke:
Kovachi, ka llau pala tu kaigo tu llaia.
20O Jesus phenda leke:
E lisiche si len kai te gurudon, ta i e chiriklia e milosoke si len kuibura, a o Chavo e Manuseko inai le kai te thovel po soro.
21Aver katar leke disipulura phenda leke:
Gazda muk mai anglal te llau te prajou me dade.
22O Jesus phenda leke:
Aide pala ma muk e llenen kai si mule te prajon pire mulen.
O Jesus achavel e balavia
Mk 4.35-41; Lk 8.22-25
23O Jesus likisto ande llimia ta leke disipulura llele pala le. 24Ta vazdinaili pe mora iek balav gia bari kai e valura ucharena e llimia, a o Jesus sovela. 25Ondaka avile pasa le leke disipulura ta llungade le, ta phenena:
¡Gazda, braduisar amen, ka tasiva!
26Vou phenda lenge:
¿Soke daran manusalen kai si tumen gia cherricha pachape?
Ondaka, ustilo ta dia pe balavia ta i pe mora, ta avilape iek baro esmiro. 27A e manusa chudinape ta phenena:
¿Savo manus si gava kai llik e balavia ta i e mora kandel le?
E bengale katar e Gadara
Mk 5.1-20; Lk 8.26-39
28Kana avilo pe o goia rig katar e mora kai e phuv katar e gadarenura, dui llene kai sea ande lende llavolura, likiste katar e limoria ta avile lete. Von sea gia dive kai niko nasti nakhela katar gua drom. 29Ta urkina ta phenena:
¡So si chuke amenchar, Jesus Chavo e Devleko! ¿Avilan kate te pati amen mai oma katar amaro vreme?
30Kotar dur lendar sea but bale kai jana, 31a e llavolura molisaile leke ta phenena:
Te ikandan amen katar gala llene, muk amen te da ande gola bale.
32Vou phenda lenge:
Llan.
Von likiste katar gola llene ta die ande gola bale, ondaka sa gola bale prastie karing e mora katar iek jar, ta sa mule ando pai.
33E llene kai arakhena e balen nasle, ta kana avile ando foro phende sa so nakhlaia e llenenchar kai saia e llavolura ande lende. 34Ondaka sa o foro llelo kote kai saia o Jesus, ta kana dikhle le molisaile leke te llaltar katar lengi phuv.
Nke Ahọpụtara Ugbu A:
Mateo 8: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.