Mateo 14
14
O meripe e Juaneko
Mk 6.14-29; Lk 9.7-9
1Ande gua vreme o Erodes gua kai gazdarila ande Galilea, asunda kai dena orba katar o Jesus, 2ta phenda pe eslugenge: Gava si o Juan gua kai kristila kai ustilo katar o meripe, goleke vou sai cherel gala bare ezgode.
3O Erodes phanglaia e lanchonenchar e Juane ta thodaia le ande rubie cheres e Erodias kai saia pala o Felipe e Erodeseko phlal, 4soke o Juan phendaia e Erodeseke: Tu nasti le la te avel chi rromi.#Lv 18.16; 20.21; Lk 3.19-20. 5A o Erodes mangela te mundarel e Juane, a darala katar o foro, soke o foro mislilape kai o Juan saia profeta. 6A kana dena pachiu pala iek burs ios katar o Erodes, e chei e Erodiaski chelda maskar sa e llene ta avila gia drago e Erodeseke, 7kai vou jala lake sovel te del la sogo voi mangela letar. 8Voi, sar sikadaia la laki dei, phenda:
De man kate ande tepsia o soro katar o Juan kai kristil.
9Ondaka o Erodes tristosailo, a pala po alav kai diaia la ta i pala e llene kai sea lea pe sinia, phenda te den la so mangel. 10Ta phenda te llan te chinen e Juaneko soro ande rubie. 11Ande leko o soro ande iek tepsia ta diele e cheake, ta e chei diale kai pi dei.
12Ondaka avile e disipulura e Juaneke, inllarde leki esnaga, prajosarde le ta llele te phenen e Jesuseke so nakhlaia.
O Jesus pravarel panch milie llenen
Mk 6.30-44; Lk 9.10-17; Jn 6.1-14
13Kana o Jesus asunda gala ezgode, llelotar kotar vou korkorre ande iek llimia pe iek rig, dur katar o sueto. Kana o sueto llangla, llele pala le peske katar e forura. 14Kana o Jesus fulisto katar e llimia, dikhla e sueto, ta avila leke zao lendar ta sastarda golen kai sea nasuale. 15Kana perela e riat, avile pasa le leke disipulura ta phende leke:
Gava than kai sam si pusto ta lel te perel e riat. Phen e llenenge te llantar ande forichura te chinen fiso te jan.
16O Jesus phenda lenge:
Inai soke te llantar, den len tumen te jan.
17Von phende:
Sa so si amen kate si panch marrne ta dui mache.
18Vou phenda lenge:
Anen len kate.
19Ondaka phenda e suetoke te inzon pe char, ta lia e panch marrne ta e dui mache, vazdia pe akha po miloso, ta molisailo. Phagla e marrne ta dialen kai pe disipulura, ta e disipulura dielen kai o sueto. 20Saurre jale ta chalile, ta katar e kotora kai achile, pherde lenchar desudui kotariche. 21Ta gola kai jale sea preko panch milie llene, bi te llindol e diskinien ta e minonen.
O Jesus phirel upral pe mora
Mk 6.45-52; Jn 6.16-21
22Mapalal, o Jesus cherda te liken leke disipulura ande llimia te nakhen e mora mai oma neko vou ta te resen pe o goia rig, a vou achilo e llenenchar kai llanatar. 23Ta kana lleletar e llene o Jesus likisto pe iek burdo, te sai molilpe korkorre, ta kana peli e riat, vou saia kote korkorre. 24A e llimia saia po maskaral katar e mora, ta e valura chalavena la soke e balav chalavela lenge anglal. 25A kana lena te pharron e zore o Jesus llelo lende phirindo upral pe mora. 26E disipulura kana dikhle kai phirela upral pe mora, daraile ta phenena:
¡Avilpe! ta urkina daratar.
27A o Jesus phenda lenge:
¡Cheren tumenge zor! ¡Me sem: na daran!
28Ondaka o Pedro phenda:
Gazda, te san tu phen i me te llau tute upral pe mora.
29A vou phenda:
Aide.
Ta kana fulisto o Pedro katar e llimia phirda upral pe mora ta llala karing o Jesus. 30A kana dikhla e bari balav, avila leke dar ta thoda te tasol. Ondaka urkisarda:
¡Gazda braduisar man!
31Isto kote o Jesus, inzarda po va, ta istardale ta phenda leke:
¡Manus bi pachamako! ¿Soke darailan?
32Kana von likiste ande llimia e balav achili. 33Ondaka e llene kai sea ande llimia die changa angla o Jesus ta phenena:
¡Chachimaia tu san o chavo e Devleko!
O Jesus sastarel e nasualen katar o Jenesaret
Mk 6.53-56
34Nakhle pe o goia rig katar e mora, ta avile kai e phuv katar o Jenesaret. 35Kana e llene katar gua foro llangle ko saia o Jesus, inllarde e viasta truial katar sa goia phuv ta ande lete sa e nasualen, 36ta molinape leke te mukel len samo te dodin iek rig katar leko gertachi, ta sa gola kai dodina le, sastona.
Nke Ahọpụtara Ugbu A:
Mateo 14: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.