2Makabeowo 9
9
Aƒetɔ la he to na Antioxo
1Ɣe ma ɣi me lɔƒo la, eva eme be Antioxo gbugbɔ ɖe megbe ɖoɖomanɔmetɔe tso Persia-nutome. 2Ege ɖe du si woyɔna be Persepolis la me, eye wòte kpɔ be yeada adzo nuwo le woƒe gbedoxɔwo me eye yeaxɔ dua. Esia ta dua me tɔwo ƒu du afɔtsɔtsɔe kple aʋawɔnuwo be yewoaxɔ na dua, eye woɖu Antioxo kple eƒe aʋakɔ la dzi. Ale dua me tɔwo nyà Antioxo ɖe nu wòtrɔ dzo kple ŋukpe. 3Esime wònɔ Ekbatana la, wogblɔ nya si dzɔ ɖe Nikanor kple Timoteo ƒe aʋawɔlawo dzi la nɛ. 4Dzi kui eye wòɖoe be yeaɖo nu vevi si ame siwo na wòtrɔ dzo la, wɔe la, teƒe na Yudatɔwo. Ale wòna eƒe tasiaɖamkula kui matɔmatɔe va se ɖe esime mɔzɔzɔ la wu enu. Gake dziƒo ƒe ʋɔnudɔdrɔ̃ kplɔe ɖo, elabe egblɔ dàdatɔe be: “Ne meɖo afi ma la, mawɔ Yerusalem wòazu ameɖiƒe na Yudatɔwo.”
5Gake Aƒetɔ, nuwo katã kpɔla, Israel ƒe Mawu la, ƒoe kple dɔléle aɖe si womate ŋu akpɔ alo ada o la. Kasia wòaɖe nu le nya si gblɔm wòle la me la, dɔmeɖui sesẽ aɖe, si womekpɔ atike aɖeke na o la, tsoe. Nua ɖu dɔme nɛ vevie. 6Esia dze nɛ, elabe eya hã wɔ funyafunya ame bubuwo ƒe dɔmenuwo vevie kple nu vevi wɔame manyatalenu geɖe. 7Ke esia mena wòdzudzɔ movinu siawo o, ke boŋ dàda yɔ eyama fũu wòganɔ ŋɔdzi dom na Yudatɔwo, eye wòɖe gbe na tasiaɖamkula la be woagakui sesĩe wu. Ale wòva eme be ege le eƒe tasiaɖam la me esime wònɔ du ƒum sesĩe. Ege dze anyi vevie ale be eƒe abɔ kple atawo gli. 8Ale eya ame si, le ɣeyiɣi kpui aɖe si va yi me, do eɖokui ɖe dzi hebu be ame tɔxɛ aɖe yenye, yeate ŋu aɖe gbe na ƒutsotsoewo, eye yeate ŋu ada to kɔkɔwo le nudanu me la, wotsɔe xlã ɖe anyi eye wokɔe ɖe vidzĩkɔnu me. Esia ɖe Mawu ƒe ŋusẽ fia amewo katã. 9Ale ame mavɔ̃mawu sia ƒe ŋutilã dze nyé, eye esime wògale agbe le veve sem, le fu kpem la, eƒe ŋutilã ƒaƒã, nɔ kàkam. Le eƒe ʋeʋẽ kũu ta la, aʋakɔ blibo la gbe nu le egbɔ. 10Ame aɖeke mate ŋu atɔ te ɖe ʋeʋẽ la nu o. Ame aɖeke mete ŋu kɔ eya ame si bu, eteƒe medidi o, be yeate ŋu aka asi ɣletiviwo ŋu le dziƒo o. 11Azɔ esi nu té eƒe gbɔgbɔ ŋu la, eƒe dàda gbogbo la nu de asi tsotso me. Egbugbɔ va eɖokui me vie le Mawu ƒe ƒoƒo la ta, elabe enɔ veve sem aɖabaƒoƒo sia aɖabaƒoƒo. 12Esi megate ŋu nɔ te ɖe eya ŋutɔ ƒe ʋeʋẽ la nu o la, ekɔ nu le nya siawo dzi be: “Ele eteƒe be woabɔbɔ ɖe Mawu te. Mele be amegbetɔ nabu be yesɔ kple Mawu o.”
Antioxo do ŋugbe na Mawu
13Tete busume sia ɖe adzɔgbe na Aƒetɔ la, ame si magate ŋu akpɔ nublanui nɛ o. Ebe 14du kɔkɔe ma si dzi yenɔ gogom ɖo be yeaɖagbã aƒu anyi, awɔ wòazu ameɖibɔ la, yele gbeƒã ɖem azɔ be, ekpɔ ablɔɖe. 15Nenema ke Yudatɔ siwo yebu be womedze gɔ̃ hã be woaɖi o, ke boŋ yeɖo be yeatsɔ wo kple wo viwo ana gbemelãwo kple dziƒoxewo woaɖu la, yeana wo katã woasɔ kple Atene vidzidziawo. 16Mawusubɔƒe kɔkɔe si yeha tsã la, yeatsɔ nunana nyuitɔwo aɖo atsyɔ̃ nɛ, eye yeatrɔ vɔsakpluawo katã aɖo wo teƒe zigbɔzi nane. Nu siwo woagblẽ ɖe vɔsanuawo ta la, yeaxe woƒe fe tso ye ŋutɔ yeƒe nukpɔkpɔwo me. 17Hekpe ɖe esiawo katã ŋuti la, ye hã yeatrɔ zu Yudatɔ eye yeatsa ade afi sia afi si amewo le la, aɖaɖe gbeƒã Mawu ƒe ŋusẽ. 18Gake esi eƒe veveseseawo dzimeɖe kpɔtɔ le mɔ aɖeke nu o, elabe Mawu ƒe ʋɔnudɔdrɔ̃ dzɔdzɔe va edzi la, ebu mɔkpɔkpɔ be yeagahaya. Ale wòŋlɔ kokoƒogbalẽ si gbɔna la na Yudatɔwo. Emenyae nye esi:
Antioxo ƒe agbalẽ na Yudatɔwo
19“Na nɔvi Yudatɔ bubutɔwo, mixɔ gbedoname tso dzime ke. Minɔ anyi nyuie le lãmesẽ me. Nu nadze edzi na mi. Agbalẽ sia tso fia Antioxo, aʋakplɔlagã la gbɔ. 20Ne mia kple mia viwo mieli nyuie eye miaƒe dɔwo le edzi yim abe ale si miedi ene la, enye dzidzɔ nam. Esi meda nye mɔkpɔkpɔ ɖe dziƒo dzi ta la, 21meɖo ŋku miaƒe bubuteƒe kple didi nyui si mieɖo nam la dzi lɔlɔ̃tɔe. Esi metrɔ tso Persia-nutome gbɔna la, dɔléle vɔ̃ɖi aɖe dze dzinye. Eya ta mebui be ehiã be matsi dzi ɖe amewo katã ƒe dedienɔnɔ ŋu. 22Dzi meɖe le ƒonye ya ɖe nye nɔnɔme ta o, elabe mɔkpɔkpɔ nyui le asinye be mahaya tso nye dɔlélea me. 23Ke mede dzesii be ɣeyiɣi siwo me aʋa kplɔ tɔ́nye yi dzigbemenutowo me la, eɖo ame eɖokui teƒe. 24Ale be ne nane si womekpɔ mɔ na o la va dzɔ, alo nya vɔ̃ aɖe dzɔ la, naneke maɖe fu na amewo le fiaɖuƒea me godoo o, elabe woanya ame si si me dziɖuɖua le. 25Gawu la, menya ale si fia siwo le míaƒe liƒowo dzi kple esiwo nye aƒelikawo na nye fiaɖuƒea la le mɔnu dim hele lalam be yewoakpɔ nu si ava dzɔ lae. Esia ta metɔ asi vinye ŋutsu Antioxo dzi be wòazu fia. Edziedzi ne mezɔ mɔ yi dzigbemenutowo me la, eya sie metsɔa nuwo dena eye mekafunɛ na mi. Nu si meŋlɔ ɖe agbalẽ sia me la ke meŋlɔ na eya hã. 26Eya ta medi tso mia gbɔ, eye meɖe kuku na mi, be miaɖo ŋku subɔsubɔdɔ siwo wòwɔ na dua kple esiwo wòwɔ na mi ɖekaɖekae la dzi, ale be mia dome ame sia ame ƒe nyuidiname nam fifia la nanɔe na vinye hã. 27Elabe meka ɖe edzi be alé nye ɖoɖowo me ɖe asi, eye wòakplɔ mi kple ŋuɖɔɖo kple dɔmenyo.”
28Ale amewula kple busunyagblɔla sia, esi wòkpe fuwo ƒe fu abe ale si eya ŋutɔ hee va ame bubuwo dzi ene la, ƒe agbe wu enu nublanuitɔe le towo dzi le anyigba trama aɖe dzi. 29Filipo, eƒe aƒemenɔlawo dometɔ ɖeka, tsɔ eƒe ŋutilã yi aƒee. Esi wòvɔ̃ na Antioxo vi la ta la, egbugbɔ yi Ptolemi Filometor gbɔ le Egipte - nyigba dzi.
EƲEGBE BIBLIA © The Bible Society of Togo, 2014.