Tànkùt 4
4
Neghù zenu mbèn ndé'e
1Nshumnshum tshàm, bin ju' nezi'te ta' tà,
bin kù' ntoṅ, num nelèn
zenu.
2Nummbe me ke mfà à
ntag mebwô bin;
kà bin ghua' yàm netswite.
3Me na' mb'a nkwi nshum
mbaṅ tàa.
Ta' nshum nenywi' bo ta' nkwi nshum
mbaṅ màa.
4A lo ke nzi't'àm, nke ntshob me ndù:
A bwô o lé' ntshob màm ntù o.
Ze ntag màm, o nsi yôge.
5Ghù zenu, ghù nezi'te.
Kà lag ntshob mi a tum
ntshu àm nà ke lo' mvèn o ntam ntshob là yi.
6Kà ghua' i a nsi béb o,
kô i, a nsi kabt'o.
7Tshù, neto'te zenu b'a ndù
o ghù zenu,
ndo' mba ke lo z'o ghù là
njun nezi'te yi.
8A bwô ndù o lèn njoṅ i, a bù't'o,
a nsi fà nkuni wù, a be z'o tat'é là.
9A nsi te tshe' kondèn
tu o,
a nsi lo' ta' kuni kétmbùm
kwi o yi.
A bwô nekù nze tshùagkèt benntùn
10Nshum àm, ju' ntshob màm ntshùbe,
ndù ngu'njù yôg tsho yàme.
11M'a' la't'o manze zenu,
m'a' tshagt'o num ba manze ndaṅndaṅ.
12A be z'o tshwèt nzin nà mba ku o
ke nsi tiage,
mbe z'o tshwèt nkù nde là mb'o ke nsi fa'te.
13Tshùb ju z'o zi'te là,
kà kag i nsi.
Lem i kua' mebwô, nummb'a so yôg.
14Kà tsho num manze ghatshùagntù,
ke ke nzin num ze manze
ben kebwô.
15Le'te num bwe, kà tshùa bwe!
Kaṅ mvèn o ntam i yi, tshùa dù' ghua.
16Nummb'a be bo ke zi ke be ndù
bo ghù nukebwô,
be miaglo ke tsho tu bo ke be ndù
bo ma' mènntùn nsi.
17Nummbe bo ke njù à bàn
tshùagntù,
nke nu à ndù' nefètte
lem.
18Ze manze ben netsin b'a mba nelàn
z'a tshwèt nké' là,
ndù ze neziag be nèn tà nkum
netèt lé'njù.
19Ze manze ghatshùagntù b'a mba
njam nà,
bo ke' be yen ju z'a ghù bo
vù nsi là.
A bwô netshùb ngùninu neta
20Nshum àm, kù' ntoṅ num ntshob màm,
kù' ntoṅ nju' tshàm tshô fa.
21A ke' bwô ndù bo lo num miag mu.
Lem njoṅ i fa ntùm ntù o.
22Nummb'a b'a yôg num njoṅ benntùn fa tse bo fon yub là,
mbe ntswe mebwô njoṅ wut yub fa.
23A bwô ndù o béb ntù o ntshùa njoṅ tshu fa,
nummbe njoṅ tsho tumnsi ntse yôg fa
b'a bwe.
24Sô tatte ntshu o,
sô ba lamte num nkub ntshu mu.
25A bwô ndù o te miag mu num manze netsin z'a be mbwe o là,
yu nelôte nèn be ndaṅndaṅ mbwe o.
26Lôte #Héb. 12.13manze z'o tshwèt ntshùa bwe là,
tsiagte njoṅ nzin mu fa.
27Kà ke ngwù bag bag, ke bu zwim
ke bu kwéb lo.
Sô ku o num manze kebwô.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.