Esaya 3
3
Va' ntùm nufen mà Yuda
1Tshùaben Nsi tàndà ntsho
nsi sô njoṅ ywimte fa Yérusalém bo Yuda.
A nsi sô njoṅ ywimte bàn fa,
sô njoṅ ywimte ntse fa,
2sô njoṅ ywimte ghama' ntsho fa.
A nsi sô ngatshob ntshob Nsi
sô ngangàm bo nkum mèn,
3sô ngalôte ben ṅam ntàn bo nkame,
sô ngafà ntag bo nkum ngatshob
nu ndamnjù mba zete ngaka.
4Fenfen tshob nsi b'a nshumnshum,
bontsit bônke' ke ntô yube.
5Ngôngô nsi ke zwite wut tshob bo bo.
Mèn nsi ghùtni mèn, mèn ghùtni mfèl i.
Ménnshum nsi kam njwèn mèn ntsha
fenyu' mèn ghù be ndaṅndaṅ num mèn ze lén se ju'ni là.
6Mèn nsi nèn ntùm ndà tàab ghom mfèl i
tshob yi ndù:
Be yag mfen mb'o ghù nzwe là!
A bwô ndù o lo' men mfam ni
nke ndôte.
7Ng'é nsi gha num sen lé'njù là, bùnte tshob ndù:
Me ke' b'a ngatshwimte,
mbèn mbe, bàn ke nzwe lo, ke ndà àm.
Kà bin te àm num fen.
Tshùaben tsho'te ghatshagte
8Yérusalém tshwèt ngwù bag bag,
Yuda nke nkôg ngwù nsi.
Yen nà b'a nummbe ntshob mub boa mfa' mub
b'a nelo' mban Tshùaben yi,
bo nelo' nkamte yantù i yi, yi mèn nekuni.
9Ntshù mub tshwèt nkwé nta
kebwô num bo,
bo nke nsa nukebwô ke lemte ndaṅndaṅ
mba Sodom nà.
Nge' tu bo là, nummbe bo ke nzwi à be
tu wut tshobe.
10Mènfen b'a mèn netsine,
nummb'a nsi jù ntàm fa' mi,
11Nge' tu ngatshùagntù là, nummb'a ke nsi ghù sàm ju.
Ntsho'fa' mi nsi b'a mba mbu mi
na' mfa' yi là.
12Ghafétte yàm nzwit mèn b'a bônke',
ben bo tshwèt ntô yub là b'a bènnzwi.
Ben tshàm tse bo tshagt'o là ghù o fàn manze.
Bo bagte nze z'o be nzin num bwe là.
13Tshùaben se' nesa' kame,
a tsin tù netsho'te ngôngô.
14Tshùaben b'a nsi kam boa kamkam ze ngô,
boa fenfen tshobe,
nke ntshob ndù: Bin lo jù nkùa,
ndagte ntsha' mbwoṅ mèn nèn yi
ntùm ndà tsine!
15Tshùaben Nsi tàndà ntsho tshob ndù:
Bin ke njé't'a yà kà nke nyiaṅte
yàm nzwit mèn nku,
kà nke nyiaṅte se njennge' à?
Ntsha tu ngonngon Yérusalém
16Tshùaben tshob ndù:
Mba ngonngon Yérusalém be
ghako'tewut,
nke mbe zin nsô kekot yub,
nke ndôte miag ke bwôg là,
mba bo be mbe zin nke nsoṅ nku nsi,
nke ngù nkwa nke nyi'te
nku bo là,
17Tshùaben be nsi ghù tèt tu ngonngon Yérusalém
tsho'te,
Tshùaben bèn ntèt yub tù tunntôg.
18Tshùaben nsi sô nkwa mi a be nku bo là num sen lé'njù là, tsho' ntùn mi bo sote num nyiaṅtu tshobe, boa nkwa mi bo ma' tô bo là. 19A nsi sô mba'ntoṅ, sô mbuo, lé' nzwe ze bo ma' tu bo là. 20A nsi sô kétmbùn, mba tshan num bo, sô nkob tun bo, ké' tshu nelam boa nkim num bo. 21Tshùaben nsi sô nkwa ndùb boa mi nke' num ntselag yub; 22a sô nzwe tanjoṅ boa nkum mi a zi là, nsô nkummbaṅ, nkwé mbàm. 23A lo' ba yente boa nkum mebwô, nké' ba kuttu boa nzwe nema' tu mèn ts'a fùag là.
24Nelam nsi be num dù' nelamte,
mfèt be num kob,
tu netsho'te be num dù' tu nebote,
nke'bàm be num dù' kummbaṅ se nezi,
mfaṅ be num dù' mebwô.
25Ben tsho nsi vù num ntshùag ṅwi,
tsho sa'nde' ghô tshwèt ntsho.
26Netsham zwe bo ntsenyà nsi be num nsém Yérusalém,
Yérusalém, mba mènnzwi là
tam tun num tsha' mba bo sat'é fa là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.