2 Tésalônikà 3
3
1Fèt tshag, ndonni bin le'te Nsi num tu bag, ndù ntshob Tshùaben nèn mbwe, mbe neghamte mb'a be la' bin nà, 2mba ndù Nsi kwé yag bu ghadiag ntsha mba ben kebwô; nummbe njoṅ benntùn fa ke' ghù bamntù. 3Là Tshùaben b'a mèn nenùne, a nsi fà tànntù bin, bèn tshètte zin num mèn kebwô. 4Bag tshwèt nywinte num Tshùaben num bin, ndù bin tshwèt ngù, ndù bin nsi ghù tshu tse bag na' ntshob bin nà. 5A bwô ndù Tshùaben tshagte ntù tsin nkôni Nsi mba ntùm nefènte Kristô.
6Fèt tshag, bag tshob bin num lén Tshùaben Yésu Kristô, ndù bin kù njoṅ fètfèt fa tse bo ke nzin mba ntshagntshag benntùn nà, ke be ju ze bin na' nkwé bag là. 7Tu wut tsin lèn mb'a bwô ndù bin fi'te yag là, bag lo ke b'a ntshagntshag benntùn netèt bin, 8bag lo ke jù ju sàm mèn banban, là ntùm fa' neshu mba ngùtni, bag lo fa' tèttswe' mba mbwôgtshù ndù kà bag be lèt sàm mèn netèt bin. 9Yen nà ke b'a ndù bag lo ke ghù ngù', là bag lo kô nefà mfi' bin num tu wut tshage, ndù bin fi'te yage. 10Nummbe ngelaṅ bag na' mbe la' bin nà, bag lo tshob yen ni bin ndù: A be ze mèn ke' kô nefa' là, k'a nebèn njù ju. 11Nummbe bag lo ju' ndù tsemo' ben netèt bin ke nzin à mba ntshagntshag benntùn nà, ke be fa' fa', là nke nzwi'te benntùn. 12Bag tsiaṅ lèn tshen ben nà, num Tshùaben Yésu Kristô, ntshob bo ndù bo fa'a, ke tshobte, njù ko' yub jujù.
13Fèt tshag, mba bin nà, kà bin bot, bin ghù a bwô; 14a be ze mèn ke' ju' ntshu num ju ze bag kite ntùm yen ṅwa'ni li là, bin yen i mebwô, ke bèn mbe ntùm sàm nu bin à bo, ndù tuswe ko i. 15Kà bin lo' i mba ngakeban nà, là bin tagt'é mba mfèt zin nà.
Tsha'te
16A bwô ndù tu wut Tshùaben fite fà fite bin njoṅ ngelaṅ fa ntùm njoṅ mat fa. Tshùaben be boa njoṅ zin fa.
17Tu wul àm Paulo kite tsha't'à kua' ko' bu àm, a b'a lèn num njoṅ ṅwa'ni tshàm fa; a b'a mba me ke nkite là. 18Kondèn Tshùaben be yésu Kristô be boa njoṅ zin fa.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.