2 Samuél 2
2
David mfen Yuda
1Yen nà be tôg David bètte Tshùaben nu ntshob ndù: Be me ko' nèn ntùm mo' ta' tusô Yuda ké ? Tshùaben bùnte yi ndù: Ko'o. David tshob ndù: Me ko' nèn a yà ? Tshùaben bùnte ndù: Ko' nèn Hébron. 2David #1 Sam. 25.42-43ko' nèn bwe boa zwi tse bàa fa, Akinoam ze Yizréel bo Abigail ze Karmél, nzwi Nabal. 3David ghù mba ben tse bo be mbaṅ i là ko', mba we lo bo ze tunndà; bo tswete ntùm ntusô Hébron. 4Ba #1 Sam. 31.11-13Yuda se', njo' David bwe num ze tunndà Yuda.
Bo soṅ David mbe ba Yabès tse bo Galad là na' mbèn ntshoṅ Saulo. 5David tum benntùn ba Yabès ntshob bo ndù: Tshùaben tam ntse bin, mba bin na' nda'te mat mebwô num Saulo mfen zin, ntshoṅ i là. 6Ndonni a bwô ndù Tshùaben be ngabwôntù, mbe mèn nenùn num bin! Mba tu wul àm nsi ghù mebwô bin mba bin na' ngù ndùlala là. 7A bwô ndù mbu min ghù neta, bin be ba neta nduku. Saulo mfen zin lo kwù, a b'a me ze tunndà Yuda yo' àm mfen ndù me tô i là.
Ish-Boshet, nshum Saulo be mfen Israél Mahanaim ntsho netèt ba la'
8Mba tà ndùlala Abner nshum Ner, tàndà ntsho Saulo, lo' Ish-Boshet nshum Saulo nèn yi Mahanaim. 9A tsho bwe ngom i fen num Galad, num ben Gueshur, num Yizréel, num Efraim, num Benjamin, num njoṅ ba Israél fa. 10Ish-Boshet lo be be mfen Israél ndù a ghù ngu'njù ṅam nkuà. A tô num ngu'njù bàa. Nda' tunndà Yuda na' mbèn ndat wut num David. 11David tô tunndà Yuda ngu'njù sammbàa ṅwù ntôge, nke ntswe Hébron.
12Abner nshum Ner boa ben Ish-Boshet, nshum Saulo, tum Mahanaim nèn num Gabaon. 13Yoab nshum Tseruya boa ben David, tum yub ntam nze. Bo bumte mbaṅ tôntse Gabaon, ntsine, tsemo' be yen yoṅ ni, tsemo' be yen yoṅ nà.
14Abner tshob Yoab ndù: Tshen bonnshum ni lo nsi ma' ntsho mbwe be! Yoab bùnte ndù: Bo lo là, mb'a ku'u! 15Bo lo nsi nkù' nse'e, njoṅ yub be be ndaṅndaṅ: Ben ntshob bàa gham tum Benjamin mbe num ze njam Ish-Boshet nshum Saulo, tse ntshob bàa gham netèt ben David. 16Mba we lo ghom ze mèn z'a tshwèt maṅt'é là tutu, nso bi fal i, bo tum ngwù nsi yoṅ ntshù'. Bo yab lén yen dù' là z'a be mbaṅ Gabaon nà ndù Helkat-Hatsurim. 17Mo' neta ntsho be sen lé'njù là kà ben David yab nge' num Abner boa bon Israél, ntshùa yub ntsho.
18Nshum Tseruya tat lo be bwe: Yoab, Abishai bo Asaél. 19Nku Asaél lo fùag à mba mi njuanyàm z'a tshwèt là. A yab njam Abner, nta' i, ke nèn bu zwim ke ze kwéb lo. 20Abner kaṅ wul i njam ntshob ndù: A b'a wù ké Asaél? A bùnte ndù: A b'a kua' me. 21Abner tshob yi ndù: Tshùa bu zwim ke bu kwéb lo nzwi mo' ta' ménnshum ndo' ze ntsha'. Là Asaél ke bam nelo njam Abner. 22Abner bèn ntshob yi ndù: Lo njam àm, numk'o nke nànt'àm me zwi o, nso o ntùm tsha'a. A be ndùlala mba m'a' bèn ndôte mfèl o Yoab se se à ndùke? 23Mb'a ke nga be negha là, Abner tshag kô njam ke kaṅ wul i, ntam i num bam i a tum njamnjam. Asaél tum ngwù nsi nkwù dù' i; njoṅ benntùn fa tse bo ke nkum yen dù' là là nke ntsine.
24Yoab bo Abishai yab njam Abner. Bo kum kônga Amma ndùse nyam ke mbi là. Amma b'a mbwe Guiak num manze z'a be kônkwa Gabaon nà.
25Tse nshum Benjamin tsho njam Abner boa bo tù' ntshù', nkù nèn ntshùa ta' kônga. 26Abner tsiaṅ Yoab ntshob yi ndù: Ndù ṅwi a' ke nzwit'a be nezwite ké? O ke' lèn ndù zwe nsi gha' mbu ndù nemiagte ké? O nsi tshob ngô à ndùke ndù kà bo neta' fèt tshob à? 27Yoab bùnte ndù: Nsi b'a ntùn! Me nu ngu wù ndù o lo mbe ke tshob mba ngô a' ta' fèt tse ke tsin tà nkum nkebnjù. 28Yoab tô nta, ngô fa tsin; bo ke bèn neta' ba Israél, bo ke bèn nema' ntsho netèt bo. 29Abner boa ben tse zin tèttswe' mà tômbo'o; bo dut Yordan, nja' ntùm Bitron fa nèn nkum Mahanaim. 30Yoab fe mb'a ke nta' Abner là, ntse'te ngô fa. Ben David tsi ntu ntshob bwe'e gham, mbèn ngù Asaél. 31Là ben David lo zwite ben Benjamin boa tse Abner ben bon ntôg nkù tat. 32Bo ket fe Asaél nèn ntshoṅ ntùm fi tàab Bétléhém. Yoab boa ben tse zin tèttswe' fa, nkum Hébron ndùse njù ke nké'te là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.