मरकुस 3
3
शोकैयोंदै हाथोवाल़ै आदमी कै ठीक कौरणा
(मत्ती 12:9-14; लूका 6:6-11)
1ऐक विशांव कै दूसै यीशु यहूदी सभा-घोर दा हौटा; तिथै ऐक आदमी थिया, जैसका हाथ शोकै रौआ थिया। 2तिनुमुंजी दै कुणजैई फरीसी लोग यीशु पांदी इलजाम लाणौ कारिए तैसकै ताको दै लागै रौवै थिए, कै जांचुबै, जै सै तैसीखै विशांव कै दूसै ठीक कौरदा कै ना। 3तैणै शोकैयोंदै हाथ वाल़ै आदमी खै बौल़ौ, “ऐशणै जौगैह दा खौड़ा हौए जा जिथै ताखै सौबै दैखलै।” 4औरौ तिनुखै बौल़ौ, “का विशांव कै दूसै भौला कौरणा ठीक औसौ या बुरा कौरणा, प्राणो खै बौचाणा या मारणा?” पौरौ सै चुपी रौवै। 5यीशु गुस्सा हौयौ चोऊ ढौबौ लोगौ कै दैखदा लागा, औरौ बौहिता उदास हौआ जिथुकै सै बौहितै जिद्दी थिए। औरौ तैसी आदमी खै बौल़ौ, “आपणा हाथ उंढा कौर।” तैणै आपणा हाथ आगु कौरा, औरौ तैसका हाथ ठीक हौए गौआ। 6तोबै फरीसी लोग बायरै जाएयो राजा हेरोदियों कै लोगौ कै साथै मिलैयौ यीशु कै खिलाफ तिनका साथ दैंदै लागै, कै तैसी कैशैखै मारी।
भीड़ौ को यीशु कै धोरे आणौ
7यीशु आपणै चैलै कै साथै गलील झील कै ढौबौ हौटै गौआ: औरौ गलील जिले शै ऐक बैजाए बौड़ी भीड़ तैसकै पौछौड़ियौ हौए गौए। 8औरौ यहूदिया प्रदेश, औरौ यरूशलेम शहर, औरौ इदुमिया जिले, औरौ यरदन नोंदी कै पारौशै, औरौ सूर औरौ सैदा शहर कै आंडे-पांढे कै कैई जौगैह शै ऐक बैजाए बौड़ै भीड़ ऐजौ शोणेयो कै सै कैशणै चौमत्कार कै काम कौरौ, तैसकै धोरे ओऊवे। 9यीशुए आपणै चैलै खै बौल़ौ, “भीड़ बौढ़ै गौए इथकारिए ऐक नानड़ै किश्ती मुखै तैयार राखौ ताकि भीड़ मुखै दबाए नी दैंव।” 10यीशुए बौहितै लोगौ कै ठीक कौरे राए थिए। जिथुकै बौहितै सारै बीमार लोगौ कै भीड़ तैसी बाइरै कौठै हौए रौए थी, औरौ तैसीखै छुणौ कै कौचिश कौरौ थिए। 11जोबै कौलोंई बै दुष्टआत्मा वाल़ै लोग तैसीकै दैखौ थिए, तोबै सैजै यीशु कै धोरे लैरौ मारदै औरौ धैनै रेढ़ीयो तैसीकै आदर दैयौ खै ऐशै बौल़ौ थिए कै, “तू पौरमेशवर का बैटा औसौ।” 12यीशुए दुष्टआत्माओं कै चिताऐबा आदैश दिया कै, कोसिया नै बौलेया कै सै पौरमेशवर का बैटा औसौ।
यीशु कै बारौ चैलो खै छाटणै
(मत्ती 10:1-4; लूका 6:12-16)
13तोबै यीशु धारो पांदी हौटै गौआ, औरौ जिनुखै सै चांव थिया कै सै चोणेयौंदे चैलै बौणणौ कारिए तैसकै साथै जुड़ौ; औरौ सै तैसकै धोरे ओऊवे। 14तोबै तैणै तिनुमुंजी दै बारौ मौरदो खै छांटै, औरौ तिनु आपणै चोणेयौंदे चैलै हौणौ कारिए चोणे दिए। सै चांव थिया कै सैजै तैसकै साथै-साथै रौंव, ताकि सै तिनुखै प्रचार कौरणौ कारिए छाड़ै सौकौ। 15औरौ तिनुकै दुष्टआत्माओं खै निकाल़णौ का औधिकार दिया।
16ऐजै सैजै बारौ चैलै औसौ जिनु यीशुए ठोहराए राए: शमौन जैसकौ नांव तैणै पतरस राखौ। 17औरौ जब्दी का बैटा याकूब, औरौ याकूब का भाई यूहन्ना, जैसकौ नांव बुअनरगिस राखौ। जिथका मतलब औसौ सै गुड़कौ कै जैशणा आदमी थिया। 18औरौ अन्द्रियास, औरौ फिलिप्पुस, औरौ बरतुल्मै, औरौ मत्ती, औरौ थोमा, औरौ हलफईस का बैटा याकूब; औरौ तद्दै, औरौ शमौन कनानी जिथका मतलब औसौ खिजकुटा। 19औरौ यहूदा इस्करियोती, जैणै यीशु खै बोइरी लैई थोम्बाए बै दिया।
यीशु औरौ बालज़बूल
(मत्ती 12:22-32; लूका 11:14-23; 12:10)
20तोबै यीशु औरौ तैसकै चैलै ऐकी घोरे ओऊवे, औरौ ऐशणै भीड़ कौठै हौए गौए, कै यीशु औरौ तैसकै चैलै कै रोटी खाणौ का बै वकत ना भैटी। 21तोबै जू तैसकै कुड़बे कै थिए ऐजौ शोणेयो, सै तैसीखै घोरे निणो कै ओऊवे; जिथु सै बौल़ौ थिए कै तैसका दिमाक ठिकाणै दा ना आथी।
22औरौ यहूदी शास्त्री बै जू यरूशलेम शहर पौरैशै आए रौवै थिए, ऐजौ बौल़ौ थिए, “कै तेसिदा दुष्टआत्माओं का ठोगड़ा शैतान औसौ, औरौ सै शैतान कै मोदत लैई दुष्टआत्माओं खै घाड़ो।” 23औरौ यीशुए चैलै खै आपणै धोरे बोइदै औरौ तिनु कै उदारण देएबा बौलदा लागा, “शैतान कैशैखै आपणी ही दुष्टआत्माओं खै लोगौ पौरैशी गाड़ै सौकौ?” 24जैसी राज्य कै लोगौ मुंजी फूट पौड़ी जांव, तौ तैसी राज्य कै टोल चोके रौए। 25औरौ जैसी घोरो दै फूट पौड़ी जांव, तौ तैसी घोरो कै टोल बै चोके रौए। 26तैशैकैई जोबै आपी मुंजी शैतान औरौ दुष्टआत्माओं दै फूट पौड़ै जांव, तौ तिनकै शौकतै चोके जांव। तैशैकैई तिनका काम तमाम हौए जांदा।
27यीशुए ऐकी आदमी कै तुलना तागतवर आदमी कै जैशणै राए कौरे जैशैखै तागतवर आदमी कोसी कै घोरो खै तांव तौड़ी ना लोटै सौकौ, जांव तौड़ी कै सै तैसी तागतवर आदमी खै बानै ना दैंव; औरौ तोबै सै तैसकी घोरो खै लोटै सौकौ।
28“हांव तुऔं कैई साचौ बुलू, कै आदमी कै सौबै पाप औरौ नेंदैया जू सै पौरमेशवर कै खिलाफ कौरौ, पौरमेशवर तिनकै पापौ कै माफ कौरे दैला। 29पौरौ जू कुणिए पवित्र आत्मा कै खिलाफ नेंदैया कौरलै, पौरमेशवर तैसी आदमी कै कौलोंई बै माफ ना कौरदा। सै इनु पापौ कारिए तैसी आदमी खै सौदा दोषी मानला।”
30यीशुए ऐजौ इथकारिए बौल़ौ, जिथु सै ऐजौ बौल़ौ थिए, तैसदै दुष्टआत्मा औसौ।
यीशु कै माँ औरौ भाऐ
(मत्ती 12:46-50; लूका 8:19-21)
31तोबै यीशु कै माँ औरौ तैसकै नानड़ै भाए ओऊवे, औरौ बायरै खौड़ै हौयौ तैसीखै बोईददै लोग छाड़ै। 32औरौ भीड़ तैसी बायरै बौठै रौए थी, औरौ तिनुऐ यीशु खै बौल़ौ, “दैख, तैरी माँए औरौ तैरै नानड़ै भाईए बायरै ताखै जौए लौआ।” 33यीशुए तिनुखै बौल़ौ, “मैरै माँ औरौ मैरै भाए कुण औसौ?” 34औरौ तिनु पांदी जू तैसकै आयरै-बायरै बौठै रौवै थिए, तिनकै ढौबौ दैखैयो बौल़ौ, “दैखौ, ऐजै मैरै माँ औरौ मैरै भाए औसौ। 35जू कुणिए पौरमेशवर कै मोरजी पूरी कौरौ, सैजै मैरै भाईटु औरौ माँ औसौ।”
Nke Ahọpụtara Ugbu A:
मरकुस 3: SRXNT
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.