मरकुस 11
11
यरूशलेम मा विजय-प्रवेश
(मत्ती 21:1-11; लूका 19:28-40; यूहन्ना 12:12-19)
1जब यीशु अर वेका चेला यरूशलेम शहर का नजीक पौंछिनी त उ जैतून डाला का डांडा का किनारा पर बैतफगै अर बैतनिय्याह का गौं मा ऐ, त वेल अपड़ा चेलों मा बट्टी द्वी चेलों तैं इन बोलि के भेजि, 2“संमणी का गौं मा जावा अर उख पौंछि के तुम तैं एक गधा कु बच्चा जै पर अभि तक कैल भि सवारी नि कैरी तुम तैं बंधयूं मिललो वे तैं खोलि के इनै ल्यावा।” 3जु तुम मा कुई पूछो कि इन किलै कना छा? त बुल्यां यीशु हमारा प्रभु तैं यु कि जरुरत च अर उ जल्दी ही वे तैं इख वापिस भेजि द्याला। 4चेला उख गौं मा गैनी ऊं तैं एक घौर का द्वार का संमणी गधा कु बच्चा बंधयूं मिली अर उ वे तैं खुलण लगि गैनी। 5उख जु लोग खड़ा छा ऊंमा बट्टी कै-कैन पूछि, “तुम यु क्य कना छा गधा का बच्चा तैं किलै खुलणां छा?” 6जन यीशु ल ऊं कु बुल्युं छो चेलों ल उन ही ऊं लुखुं मा बोलि, तब ऊं लुखुं ल गधा तैं लिजांण दींनि। 7ऊं द्वी चेला वे गधा का बच्चा तैं यीशु मा लै के ऐनी अर वे पर अपड़ा भैरा का कपड़ा डलिनि अर यीशु वेमा बैठी के जांण लगि गै। 8जन ही यीशु गधा पर सवार हवे के यरूशलेम की तरपां ऐनी त भौत सारा लुखुं ल अपड़ा कपड़ा बट्टा मा बिछै कै वेको सम्मान कैरी अर भौतों ल खजूर की डाली काटि-काटि के बिछै वेको सम्मान कैरी। 9जु वेका अगनैं-अगनैं अर पिछनै-पिछनै जांणा छा पुकारी-पुकारी के बुल्दी जांणा छा “होशाना”#11:9 परमेश्वर की स्तुति हो हो धन्य च उ जु परमेश्वर की सामर्थ से आंद। 10हमारा पुरणों मा राजा दाऊद कु राज्य जु परमेश्वर की सामर्थ मा आंणु च परमेश्वर जु स्वर्ग मा रांदो वेकी होशाना हो। #मत्ती 23:39 11जब यीशु यरूशलेम शहर मा पौंछि के यरूशलेम शहर का मन्दिर मा ऐ अर चौतरफी देखि की उख क्य चलणु च किलैकि रुमुक हवे गै छै इलै उ रात बितांणु कु अपड़ा बारह चेलों का दगड़ा मा बैतनिय्याह चलि गै।
फल रहित अंजीर कु डालो
(मत्ती 21:18-19)
12हैंका दिन जब यीशु अर वेका चेला बैतनिय्याह गौं बट्टी यरूशलेम शहर गैनी त यीशु तैं भूख लगि। 13वेल दूर एक पत्तों से भुर्युं बेडु को डालो देखि त तब उ वेका नजीक गै कि हवे सकदु वे पर कुछ फल हो पर पत्तों का सिवै वे पर वेल कुछ नि पै किलैकि फल लगणों को बगत नि छो। 14यां पर यीशु ल वे डाला कु दंड दे के बोलि, “अब बट्टी त्वे पर कभि फल नि लगुनु” अर वेका चेला सुनणा छा।
मन्दिर बट्टी व्यापारियों तैं भगौण
(मत्ती 21:12-17; लूका 19:45-48; यूहन्ना 2:13-22)
15फिर यांका बाद यीशु अर वेका चेला यरूशलेम शहर पौंछिंनी अर उ यरूशलेम शहर का मन्दिर म गै अर उख जु पैसों कु लींण दींण कना छा ऊं तैं भैर निकलण लगि गै अर सुनारु का ठिया अर कबूतर बिचण वलो कि चौकि तैं भि फरकै दींनि। 16अर यीशु ल लुखुं तैं आज्ञा दींनि की उ यरूशलेम शहर का मन्दिर का अमणी-संमणी का क्षेत्र बट्टी चीजों तैं लिजांण बंद कैरी द्या। 17अर ऊंकु बोलि “पिता परमेश्वर का वचन मा यु लिख्युं च कि मेरू घौर सभि जातियों का लुखुं कु पिता परमेश्वर बट्टी प्रार्थना कु मन्दिर बुलयालो? पर तुम ल यु तैं डकैतों को उडयार बणैयेलि।” 18यु सूंणि के प्रधान याजक अर मूसा की व्यवस्था तैं सिखांण वला, कि यीशु क्य बुल्णु च अर क्य कनु च, त उ यीशु तैं नाश कनु को मौका खुज्योंण लगि गैनी किलैकि उ वेकी लोकप्रियता से डरदा छा, अर जु उ सिखांदु छो भीड़ का लोग वे तैं पसंद करदां छा इलै अर हकदक रै जांदा छा। 19जब रुमुक हवे त यीशु अर वेका चेला उ शहर छोड़ी के बैतनिय्याह गौं मा सींणु कु चलि गैनी।
सुख्यां अंजीर का डाला बट्टी शिक्षा
(मत्ती 21:20-22)
20फिर दुसरा दिन सबेर मा जब यीशु अर वेका चेला वापिस यरूशलेम शहर की तरपां जांण छा त ऊंल वे बेडु का डाला तैं जौड़ा तक सुख्युं देखि। 21पतरस तैं व बात याद ऐ अर वेल यीशु मा बोलि, “गुरु जी देख यु बेडु कु डालो जै तैं तिल श्राप दे छो उ जौड़ा बट्टी सूखि गै।” 22यीशु ल वे तैं जवाब दे “परमेश्वर पर विश्वास रखा की जु तुम ल मांगि वे तैं परमेश्वर ल पूरो कन।” 23मि तुम मा सच-सच बुल्णु छौं जु कुई यु डांडा कु बुललो तु उखड़ि जा अर समुद्र मा पोड़ि जा अर अपड़ा मन मा शंका नि कैर बल्कि विश्वास कैर कि जु बुल्णु च उ हवे जालो त वेको उन ही हवे जालो। 24इलै मि तुम मा बुल्णु छौं कि जु कुछ तुम पिता परमेश्वर बट्टी प्रार्थना कैरी के मांगिल्या त विश्वास कैरा कि उ तुम तैं मिली गै अर पिता परमेश्वर तुम तैं दयालो। 25अर इन ही जब कभि तुम पिता परमेश्वर बट्टी प्रार्थना करदा अर जु तुमारा दिल मा कैका खिलाफ कुई बैर हो त माफ कैरा इलै कि पिता परमेश्वर जु स्वर्ग मा रौंद तुमारा पापों तैं भि माफ करलो। 26अर जु तुम दुसरो की गलतियों तैं माफ नि करिल्या त तुमारो बुबा भि जु स्वर्ग मा च तुमारी गलतियों तैं माफ नि करलो।
यीशु कु अधिकारों कु प्रश्न
(मत्ती 21:23-27; लूका 20:1-8)
27यीशु फिर एक बार यरूशलेम शहर मा ऐ अर जब उ यरूशलेम शहर का मन्दिर मा टैलणु छो त प्रधान याजक, दाना-सयाणों अर मूसा की व्यवस्था तैं सिखांण वलो अर यहूदी अगुवा वेमा ऐ के पुछण लगि गैनी। 28ऊंल यीशु कु बोलि, “यूं कामों तैं कनु कु त्वे तैं क्य अधिकार च? अर यु अधिकार त्वे तैं कैल दींनि कि तु यु काम कैरी।” 29यीशु ल ऊंमा बोलि, “जु तुम मि तैं जवाब द्या त मि भि तुम मा एक बात पुछणु छौं, त मि तुम तैं बतौलु कि यु काम मि कै अधिकार से करदु।” 30यूहन्ना तैं बपतिस्मा दींण कु कैल भेजि? क्य स्वर्ग बट्टी परमेश्वर ल या मनिख्युं ल मि तैं जवाब द्या? 31तब उ आपस मा बातचित कन लगि गैनी पर जु हम लुखुं मा बोलुला त क्य होलो कि, यूहन्ना परमेश्वर का अधिकार ल बपतिस्मा दींद त वेल पुछण कि फिर तुम ल वेको विश्वास किलै नि कैरी? 32उ डरदा छा कि जु इन बोला कि, यूहन्ना कु अधिकार मनिख्युं की तरपां बट्टी च त लोग ऊं कु परेशानी खड़ी कैरी दयाला किलैकि सभि जंणदा छा कि यूहन्ना सचमुच मा परमेश्वर का तरपां बट्टी बुल्ण वलो छो। 33त तब ऊंल यीशु तैं जवाब दे “हम नि जंणदा की कैल भेजि” यीशु ल ऊंमा बोलि, मि भि तुम तैं नि बतौंदु कि यु काम कनु कु अधिकार वे तैं कख बट्टी मिली।
Nke Ahọpụtara Ugbu A:
मरकुस 11: GHMNT
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.