थरप्या तका का काम 27
27
पोलुस ने रोम खन्दाणो
1जद्याँ आ बात ते वेगी के आपीं जाँजऊँ इटली जावाँ, तो वाँकाणी पोलुस अन वींका हातेवाळा ने युलियुस नाम का हो सपायाँ का सेनापती ने हूँप दिदा, वीं फोज ने “राजा की फोज” केता हा। 2अदमुतियुम को एक जाँज जो आसिया का बन्दरगा में वेन जाबावाळो हो, माँ वींपे चड़न चाल पड़्या अन थिसलुनीके को मकिदुनीवाळो अरिस्तखुस नाम को मनक माकाँ हाते हो। 3दूजे दन माँकाणी सेदा का बन्दरगा का नके जाँज रोकी, युलियुस पोलुस पे दया किदी के, वो हण्डाळ्याऊँ मलबा जावे ताँके वीं जरुरत की चिजाँ आने देवे। 4वटूँऊँ जाँज के हामे वइरो वेबाऊँ माँ साइपरस की आड़ में वेन चाल्या। 5अन पछे किलिकिया अन पफुलिया का नके समन्द में वेन लूसिया का मूरा में पूग्या। 6वटूँऊँ सेनापती ने एक सिकन्दरिया को जाँज इटली जातो तको मल्यो, अन वणी माँने वींमें बेटा दिदा।
7जद्याँ माँ नरई दन तईं धीरे-धीरे चालता अन अबकीऊँ कनिदुस का नके ग्या काँके वइरा का हामे माँ टक ने सक्या ईं वाते माँ सलमोने का हामे वेन क्रेता टापू की आड़ में चाल्या। 8अन अबकीऊँ वींका कनारे-कनारे चालता तका सुरकसित बन्दरगा नाम की जगाँ पोंच्या, जो लसया नगरऊँ छेटी ने हो।
9नरई दन वेग्या हा अन वर का अणा दनाँ में जद्याँ वरत के तेंवार#27:9 यो तेवार सितम्बर के अन्त का दनाँ में कन अक्टुबर का पेला दनाँ में मनायो जावे हे। वणीस टेम में खराब मोसम वेबाऊँ पाणी की जातरा अबकी वेती ही। का दन पूरा वेग्या हा, पाणी की जातरा अबकी वेती ही, ईं वाते पोलुस वाँने ओ केन सला किदी के, 10“हो भला मनक, मने अस्यान लागरियो हे के, अणी जातरा में घणो नकसाण वेई, बेस जाँज अन माल कोईस ने पण आपणाँ जीव को भी नकसाण वेई।” 11पण सेनापती पोलुस की बाताँ ने, ने मानन जाँज का मालिक अन जाँज ने चलाबावाळा की बात मानी। 12वणी बन्दरगा में हियाळा का दन काटणा हव कोयने हा, ईं वाते घणा लोगाँ तो ते किदो के, वे सके तो वटूँ कस्यान भी फिनिक्स जान हियाळा का दनाँ ने काटाँ। ओ तो क्रेता को एक बन्दरगा हो जो लंकव-आतमणो अन धरव-आतमणो का आड़ी खलतो हो।
समन्द में डूँज
13जद्याँ थोड़ो-थोड़ो लंकव का आड़ीऊँ वइरो बाजबा लागो, तो वाँकाणी होच्यो के जस्यान वणा मन में धारियो हो वस्यानीस वे जाई, ईं वाते लंगर काड़ दिदो अन क्रेता का कनारे-कनारे जाबा लागा। 14पण थोड़ीक देर केड़े वाँका आड़ी एक जोरऊँ डूँज अई, जो धरव-उगमणी डूँज केवाती ही। 15जद्याँ डूँज जाँज पे आगी तो जाँज डूँज का हामे ठम ने सक्यो तो माँ जाँज ने वइरा का जस्यान चालबा वाते छोड़ दिदो। 16जद्याँ जाँज रोदा नाम का एक फोराक टापू के आड़ में आयो तद्याँ माँ बंचबावाळी फोरी नाव ने घणी अबकीऊँ बंचान ठाणे किदी। 17पछे वीं बंचबावाळी नावा ने उठान जाँज में मेल दिदी अन जाँज ने टूटवाऊँ बंचबा वाते जाड़ा हींदराऊँ च्यारूँमेरऊँ बांद दिदो अन कटेई सुरतिस का हेवा पाणी में ने फसन टूट ने जावे, ईं दरपऊँ पाल उतारन जाँज ने वेवा दिदो।
18जद्याँ डूँजऊँ माँ धक्का खादा तो दूजे दन वे माल ने फेंकबा लागा। 19अन तीजे दन वाँकाणी आपणाँ हाताऊँ जाँज की थोड़ीक चिजाँ ने फेंक दिदी। 20नरई दन तईं, ने सुरज, ने तारा दिक्या अन जोरऊँ डूँज चालरी ही, तो पछे माँके बंचबा की आस जाती री।
21जद्याँ वीं नरई दन तईं भूका रिया तो पोलुस वाँका बचमें ऊबो वेन क्यो, “हो लोगाँ, जद्याँ थाँ क्रेताऊँ ने निकळबा की मारी बात ने मानता, तो ने आ अबकी वेळा आती अन ने यो घाटो अन नकसाण वेतो। 22पण अबे मूँ थाँने धिजो बंदान केऊँ के, हिम्मत राको, काँके थाँकामूँ कुई भी ने मरी, पण जाँज को नास वेई। 23काँके जीं परमेसर को मूँ हूँ अन जिंकी भगती मूँ करूँ हूँ, वींको हरग-दुत आज राते मारा नके आन क्यो, 24‘हे पोलुस, दरप मती! थने केसर का हामे ऊबो वेणो जरूरी हे। देक, परमेसर थाँरा पे भलई किदी हे, ईं वाते जो थाँरा हाते जातरा कररिया हे वे भी बंचाया जाया।’ 25ईं वाते राजी वे जावो, काँके मूँ परमेसर पे विस्वास करूँ हूँ के, जस्यान माराऊँ क्यो हे वस्यानीस वेई। 26पण आपीं जरुर कटेई हेवा पाणी की जगाँ में एकदम फसाँगा।”
27जद्याँ डूँज की चवदवी रात वी, अन माँ धक्का खाता तका अद्रिया का समन्द में पराग्या हा, जद्याँ आदीक रात का जाँजवाळा आसरो लगायो के, आपीं कणी कनारा का नके हा। 28जद्याँ वटे वणा पाणी माप्यो तो बीस बाम पायो अन थोड़ाक आगे जान पाछो माप्यो तो पन्दरा बाम पायो। 29तद्याँ पाणी में मोटा भाटाऊँ टकरावा की दरपऊँ माँ जाँज का पाला पाल्डे चार लंगर पाणी में नाक दिदा अन वीं दन ऊँगवा की अरज करबा लागा। 30पण जाँज में काम करबावाळा जाँजऊँ भागणा छारिया हा। आगला पाल्ड़े लंगर ने फेंकबा का बायने बंचबावाळी नावा ने रेटे उतारन जाणा छारिया। 31तो पोलुस सेनापती अन सपायाऊँ क्यो, “यद्याँ ईं लोग जाँज पे ने रिया तो थाँ भी ने बंच सको।” 32तद्याँ सपायाँ हींदरा ने काटन फोरी नाव ने समन्द में वेवा दिदी।
33अन भाग-फाट्याँ के पेल्याँ पोलुस ओ केन हंगळा ने रोट्याँ खाबा के वाते हमजाया के, “आज चवदा दन वेग्या के थाँ होच में पड़न भूका रिया, अन कई ने खादो। 34ईं वाते थाँकाऊँ अरज करूँ हूँ के, कई खालो, जणीऊँ थाँ बंच सको, काँके थाँकामूँ किंको भी एक भी बाल वाको ने वेई।” 35ईं बाताँ केन वणी रोटी लेन तोड़ी अन हंगळा के हामे परमेसर ने धन्नेवाद देन खावा लागो। 36तद्याँ वीं हंगळा भी हिम्मत राकन रोट्याँ खाबा लागा। 37माँ जो जाँज में हा, वीं दोस्ये छिय्योतर जणा हाँ। 38जद्याँ वे रोट्याँ खान धापग्या, तो जाँज ने हलको करबा वाते गऊँ फेंक दिदा।
जाँज को टूटणो
39जद्याँ दन व्यो तो वाँकाणी वणी जमीन ने, ने ओळकी, पण एक रेत वाळा कनारा ने देक्यो अन वणा होच्यो के, वे सके तो जाँज उटेईस टकावाँ। 40पाली रात ने जो लंगर नाक्या हाँ वाँने काट दिदा अन जीं हींदराऊँ पतवार बान्दयो हो वींने खोल दिदो अन वइरा का हामे पाल ताण दिदो अन कनारे का आड़ी चालबा लागा। 41अन जाँज रेतऊँ जा टकरायो अन जाँज को आगलो हिस्सो जा फस्यो अन जाम वेग्यो अन जोरकी लेराऊँ जाँज को पालो हिस्सो टुटबा लागो। 42तद्याँ सपायाँ ओ बच्यार किदो के, केदयाँ ने मार नाका, अस्यान ने वे के कुई तरन भाग जावे। 43पण सेनापती पोलुस ने बंचाबा की मरजीऊँ वाँने रोक्या अन क्यो के, जो तर सके वीं, पेली कूदन कनारा पे परा जावो। 44अन जिंने तरता ने आवे वीं जाँज का टूटा तका पाट्याँ-पूटी ने अन चिजाँ ने पकड़न बारणे निकळ जावे, अणी तरियाऊँ हंगळा बंचग्या।
Nke Ahọpụtara Ugbu A:
थरप्या तका का काम 27: एम टी आर
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
(c) 2010-2017, New Life Computer Institute. All rights reserved