लूका 6
6
ईसु अरामहाळा दिन को बी परबु
(मत्ती 12:1–8; मरकुस 2:23–28)
1अरामहाळा दिन ईसु अर बिका चेला ग्युंवा का खेता मऊँ जार्या हा, जणा बिका चेला हा जखा बाळ्या तोड़-तोड़ बानै हाताऊँ मसळता जाय अर बाको फांको मारता जाय। 2जणा क्युंक फरिसी बाऊँ बोल्या, “थे बो काम क्युं कर्या हो? जखो अरामहाळा दिन करबो बरजेड़ो ह।” 3जणा जुबाब म ईसु बानै कह्या, “जद दाऊद अर बिकाळा सिरी भूखा हा, जणा दाऊद काँई कर्यो हो? के थे आ कोनी बाच्या? 4अर बो कंय्यां परमेसर का घर म जार चढावा म चढेड़ी रोटी खाई अर आपका सिर्यानै बी खुवाई। थे तो जाणोई हो बा रोट्यानै याजक क सिवाय दुसरा को खाणो बरजेड़ो ह।” 5अर बो बाऊँ बोल्यो, “मिनख को बेटो अरामहाळा दिन को बी परबु ह।”
अरामहाळा दिन टुंडा मिनखनै निरोगो करबो
(मत्ती 12:9–14; मरकुस 3:1–6)
6दुसरा अरामहाळा दिन बो अरदास करबाळी झघा म परबचन देर्यो हो। अर बठै एक अंय्यां को मिनख आयो जिको दाइणो हात सूकेड़ो हो। 7सास्तरी अर फरिसी आँख गाड राखी क बो बिनै अरामहाळा दिन निरोगो करै क कोनी करै। क्युं क बे तो बिपै दोस मंढबा की तक म हा। 8पण बो तो बाकै मना की बात जाणतोई हो जणा बो बि टुंडा मिनखऊँ बोल्यो, “खड़्यो हो अर सकै सामै आज्या” अर खेताई बो खड़्यो होगो। 9जणा ईसु मिनखाऊँ बोल्यो, “म थारूँ बुजूँ हूँ अरामहाळा दिन बिधी गेल काँई ह कोईको भलो करबो नहिस बुरो करबो? कोईकी ज्यान बचाबाऊँ मारबो चोखो ह के?” 10अर ईसु च्यारूमेर बानै देख-दाख, बिऊँ कह्यो, “तेरा हातनै सिदो करले।” अर ईसु क कह्या गेल बंय्यांई बो आपका हातनै सिदो कर लिओ अर बिको हात ओज्यु ठिक होगो। 11अंय्यां देखर बे लाल-ताता होगा अर भेळा होर बतळाबा लागगा की, “ईसु को काँई करां?”
बारा जणानै खास काम ताँई टाळबो
(मत्ती 10:1–4; मरकुस 3:13–19)
12बा दिना म बो अरदास करबा डूँगरी प गयो। अर सगळी रात परमेसरऊँ अरदास करतो-करतो आँख्या मई काड दि। 13अर दिन उगताई बो आपका चेलानै बुलाया अर बामैऊँ बारानै टाळर बानै भेजेड़ा चेला नाम दिओ, 14अर बाका नाम अ हीं समोन जिको दुसरो नाम पतरस जखो नाम ईसु को काडेड़ो हो। अर बिका भाईड़ा अंदरिआस, याकूब अर यहून्ना, फलिपूस, अर बरतुल्मै, 15अर मत्ती, अर थोमा, अर हलफई को छोरो याकूब, अर देस भगत समोन। 16अर याकूब को छोरो यहूदा, अर यहूदा इस्करोती जखो ईसुनै धोकाऊँ पकड़ाबाळो हो।
ईसु मिनखानै सीखायो अर रोगलानै निरोगो कर्यो
(मत्ती 4:23–25)
17जणा बो डूँगरी पऊँ बाकै सागै तळै उतर्यो अर मैदान म आर खड़्यो होयो, अर बठै बिका बोळा चेला क सागैई सगळा यहूदिआ, यरूसलेम, सूर अर सैदा क समदर किनारा का मिनखा की घणीसारी भीड़ भेळी होरी ही। 18बे बिनै सुणबा अर बिमार्याऊँ निरोगा होबा ताँई बठै भेळा होया हा, अर सूगली ओपरी बलायऊँ दुखी मिनखा को जापतो बी बठै होयो हो। 19अर सगळा बिकै अड़बो चावा हा क्युं क बिमैऊँ सक्ति निकळरी ही जखी सगळानै निरोगो कर'री ही।
दुख अर खुसी का बचन
(मत्ती 5:1–12)
20इकै पाछै बो आपका चेला कानि देखर बोल्यो,
“थे गरीब हो जणाई भागहाळा हो,
इ बजेऊँई परमेसर को राज थारो ह।
21थे भागहाळा हो जखा भूखा हो,
थानै धपायो ज्यासी।
थे भागहाळा हो जखा आज रोर्या हो,
क्युं क आगै थे हसस्यो।
22 #
1 पत 4:14
थे भागहाळा हो जद मिनख का बेटानै मानबा की बजेऊँ दुसरा मिनख थारूँ बेर राखीं,
थानै समाज क बारनै करीं, थारी बेजती करीं अर थानै बुरा बतावीं हीं।
23 #
काम 7:52
बि दिन थे राजी होर नाचा-कूदि करज्यो क्युं क ईस्बर नगरी म थारै ताँई बडोसारो इनाम ह
अर बाका बाप-दादा बी परमेसर की खेबाळा क सागै अंय्यांई करता हा।
24थार प हाय ह, थे जखा पिसाळा हो,
क्युं क थे मजा ले लिआ हो।
25हाय थार प जखा धापेड़ा हो
क्युं क थे बास्या मरस्यो हाय ह थार प जखा हसो हो, क्युं क पाछै थे बार घालता रोस्यो
26हाय ह थार प जाकी सगळा मिनख बडाई करीं हीं,
क्युं क बाका बाप-दादा बी बा मिनखा क सागै अंय्यांई करता हा जखा खेता हा,
म्हें परमेसर कानिऊँ बोलां हां पण बे सचमई परमेसर की खेबा की बजाय खुदकी खेता हा।
दुस्मनाऊँ परेम
(मत्ती 5:38–48; 7:12a)
27“सुणबाळो म थारूँ बोलुँ हूँ, दुस्मनाऊँ परेम करो जखा थारो बुरो करीं, बाको भलो करो। 28थानै सराप दे बिनै आसिरबाद द्यो अर जखा थारै सागै बुरो बरताव करै बा ताँई अरदास करो। 29अर कोई थारा गाल प थपड़ मारै जणा दुसरो गाल बी आगै कर द्यो अर जखो थारो कोट खोसै बिनै थारो कुर्तीयो लेबाऊँ बी मना मत करो। 30अर जखो थारूँ क्युं माँगै थे बो देद्यो अर जखो थारी कोई चिज खोसले बा बिऊँ पाछी लेबा की कोसिस मना करो। 31#मत्त 7:12मिनखाऊँ बंय्यां को बरताव करो जंय्यां को थे बाऊँ चाओ हो। 32अर थे बाऊँई जखा थारूँ प्यार-परेम राखै ह प्यार-परेम करो जणा काँई गुण-एसान? क्युं क आपकाऊँ तो पापी बी प्यार-परेम राखै। 33अर थे थारो भलो करबाळा को भलो करो जणा इमै काँई गुण-एसान? अंय्यां तो पापीई करीं हीं। 34थे थारा बिस्वास हाळानैई करजो द्यो हो इमै काँई गुण-एसान? क्युं क पापी बी तो पाप्यानै करजो देवीं हीं, क बे बत्तोई ओटो चूक सकै। 35पण थारा दुस्मनाऊँ बी प्यार-परेम राखो, बाकै सागै बी भलाई करो, अर क्युं बी पाछो नइ आबा की आस कर बानै करजो द्यो। अर अंय्यां करस्योक जणा थारै ताँई बडो इनाम होसी। अर थे परम-परधान परमेसर का टाबर खुवास्यो क्युं क बो तो बुरा अर बिको धनेवाद नइ करबाळा प बी दया दिखावै ह। 36जंय्यां थारो परम-पिता दयालु ह बंय्यांई थे बी दयालु बणो।
खुदनै जाचो
(मत्ती 7:1–5)
37“कोईको भलो-बुरो कर न्याय मना करो जणा परमेसर बी थारो न्याय कोनी करसी। गळत मना बताओ जणा परमेसर थानै बी कोनी बतासी। माफ करो जणा परमेसर थानै बी माफ करसी। 38दुसरानै दिआ करो जणा परमेसर थानै बी निका नाप तोलर दबा-दबा अर हला-हला चोखी ढाळ उंदकतो देसी। क्युं क जि नापऊँ थे दुसरानै द्यो हो बि नापऊँई थानै दिओ जासी।”
39 #
मत्त 15:14
जणा बो एक बात बोली, “आँदो-आँदानै गेलो दिखा सकै ह के? अंय्यां करसी जणा के बे दोन्युई खाडा म जार कोनी पड़सी? 40#मत्त 10:24,25; यह 13:16; 15:20चेला गरूऊँ बडा कोनी, पण जखो चेलो पूरो ज्ञान लेले जणा बो आपका गरूजी जंय्यां को होज्या। 41तनै डूँगर बळती तो दिखै पण पगा बळती कोनी दिखै। 42थारी खुदकी गळत्या तो थानै दिखई कोनी अर चाल्या दुसरा की गळत्या सुदारबा। ओ ढोंगी पेली खुदकी बडी-बडी गळत्यानै तो सुदारले जणा पाछै कठै जार तू ओरा की छोटी-छोटी गळत्यानै पिछाण्बा म अर बानै सुदारबा म बाकी मदद कर सकै ह। जणा पाछै तू कंय्यां खे सकै ह आ भाईड़ा म तेरी गळत्यानै सुदार द्युँ।
जंय्यांको पेड़ बंय्यांको फळ
(मत्ती 7:16–20; 12:33–35)
43“चोखा दरखत प चोखा फळ लागै अर बुरा दरखत प बुरा फळ लागै। 44#मत्त 12:33इ बजेऊँई तो सगळा पेड़ आपका फळाऊँई पिछाण्या जावै ह मतबल ओ ह क झाड़ी क अंजीर कोनी लागै अर नइ झाड़ी क अँगूर लागै। 45#मत्त 12:34चोखो मिनख आपका चितऊँ चोखी बात काडै अर बुरो बुरीई चितै, मतबल ओ ह क जखो मांयनै होसी बोई बारनै आसी।
दो भात का मिनख
(मत्ती 7:24–27)
46“जद थे मेरो खेणो मानोई कोनी जणा पाछै मनै हे परबु हे परबु क्याले बोलो हो? 47जखो मेरै कनै आवै अर मेरी सुणै अर मानै ह बिनै म बतास्युं बो कंय्यां को ह, 48बो बि मिनख की जंय्यां ह जखो आपको घर ढाड प बणायो। अर जद बाढ आई जणा पाणी की टकर बिकै लागी पण बि मकाननै हला कोनी सकी क्युं क बो पक्को चिणेड़ो हो। 49पण जखो सुणर कोनी मानै बो बि मिनख की जंय्यां ह जखो माटी प बिना निम क घर चिण्यो अर जद पाणी की धार लागी जणा बो हात्युहात तबा होगो अर सक्यु ढेग्यो।”
Nke Ahọpụtara Ugbu A:
लूका 6: एस डब्लु वी
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
(c) 2010-2017, New Life Computer Institute. All rights reserved