Taitashi 3
3
Nyinkalo ya Bakakilishitu
1Anukisha bantu ngayi benge ba kubomba ku bamyene na bakakutwaminina, babombatale kami benge bakakuliwahishila kutenda milimo nimwayo yayiwahe. 2Hinga bamba byabibi ha muntu wamina, mwanga babule kulyamba na muntu, ngoboni benge ba kubomba, pe bamoneshe shishemo ku bantu nimwabo. 3Ndaba nanetu kami, ha shikati sha kunyima twengile bakuyeba, bakakubula kwombatala, bakakwongeziwa na bakakutenda milimo ya bifungo bya kulishiyashiya na bya myelembo. Twengile bakankwela na bakamwili, bantu batuzimbile nanetu kami twabazimbile. 4Ngoboni oho nceshe na shishemo sha Nyambi Mulamwini wetu byamonekele, 5watupulwishile, kaliha ndaba ya milimo twatendele ya kulunga, ngoboni ndaba ya shikeketima shendi, watuyoweshele mu Moyo wa Kuyela, watupanine kuhemuwa kwakupya, pe twawanine wumi wawupya. 6Nyambi watupanine Moyo wa Kuyela mu wingi kupitila muli Yeshu Kilishitu Mulamwini wetu, 7ngayi mwanga tutweshe kwinga bakwoloka na nceshe zendi na kwinga bakakukona wumi wa mwaya myaka ou tukulumbeza. 8Eye nyambilo yenga ya kupwisha.
Nikushinga obe ushumishe ku longesha byuma ebye, ngayi baya banakulupili muli Nyambi bazundamine kutenda milimo yayiwahe. Byuma ebye byabiwahe kami bikuyavwa bantu nimwabo. 9Ngoboni obe hinga utenda nkani za kuyeba, nkani za bya mikoka na byakulyamba amba na kukananganisha ha bya Ndayano za Moshesha, ndaba nkani zanoho zenga zowa, kami kuyavwa zifwako. 10Shiwulula kabili muntu uya uku longesha bya mahalo, ndi kuyuvwa wufwako, pe mushiye nahiya. 11Limuka ngayi muntu wanoho wakukontama, kami uli na wubi, pe unaliyata niye mwine nanebye akutenda.
Mazu amamaninino
12 #
Mil 20:4; Efwe 6:21-22; Kolo 4:7-8; 2Tim 4:12. Oho nikatuma Atemashi kukwobe, hinge Tikikashi, ukanyankupe kwiza kukwami ku Nikopolishi, ndaba nisho ninahanganiki ngayi nikekala kuyo mupepo. 13#Mil 18:24; 1Koli 16:12. Ezeka shikuma kuyavwa Zenashi mukakwimanina byambo na Apoloshi ha mukala wabo, ngayi bekale na byuma nimwabyo bya kuliyavwa nabyo. 14Na bantu betu kami balilongeshe kuzamina kutenda milimo yayiwahe, ya kuliyavwa, ngayi hinga babula kuyima mbuto.
15Nimwabo bali na nami kuno baku kushangwisha. Shangwisha aba ba kutuhaka mu kukulupila. Nceshe zikale nenu nimwenu.
Libuka Lya Kuyela © Bible Society of Zambia, 2020.