Lute 1
1
Elimeleki na ba lupashi lwendi mu Mowambi
1Ha matena owo oho bakakuyata balelelenga kwekalile kapande mu litunga lya Yunda. Mulume umo waku Mbetelehema mu Yunda, wayile mukwikala mu litunga lya Mowambi, niye na mukazendi na bana bendi babalume babili. 2Lizina lya uya mulume wengile Elimeleki, kami lizina lya mukazendi niye Naomi, pe bana bendi babalume babili bengile Mahiloni na Kilyoni. Nibo bengile ba mukoka wa Efulata, wekalilenga mu Mbetelehema mu Yunda. Bayile mu litunga lya Mowambi na kwikalamo. 3Munyima ya matena, Elimeleki mukokwa Naomi wafwile, pe Naomi washalile ninkayendi na bana bendi babalume babili. 4Bahukwile bambuyama babili ba Bamowambi, umo watumbiwile ngayi Olipa na wamina Lute. Bekalile kuyo myaka likumi. 5Mahiloni na Kilyoni nabo kami bafwile, pe Naomi washalile ninkayendi, kwakubula mukokwendi na bana bendi babalume babili.
Naomi na Lute ba kuboka ku Mbetelehema
6Ha shikati shamina, Naomi wayuvwile ngayi Nyambi ya Ngula watandalishilile bantu bendi na kubapana mbuto yayiwahe, nohobene waliwahishile kufuma ku Mowambi na bakowendi babili. 7Nimwabo bakatukile nihobabokele ku Yunda. 8Ngoboni ha nzila Naomi wambile kukwabo ngayi, “Bokenu kukwenu, mukekale ku minkanda ya bamandizenu. Nyambi ya Ngula mwanga ekale na nceshe kukwenu, ngonehe shiya mwekala na nceshe kukwami na ku baya ba kufwa. 9Nyambi ya Ngula kami ashibotopeshe ku muntu na muntu kukwenu kuyekiwa ngayi mwanga muwane ku mwena.”
Niho Naomi abazupezele na kubashalishaho. Ngoboni nibo batatikile kulila, 10pe bambile kukwendi ngayi, “Byo, etu tukuya nobe ku bantu bobe.”
11Naomi wakumbwile ngayi, “Enu bana bami mu ku fwanina ku boka. Shumangani mu kushingila kuya na nami? Kati ami nishili na ngovu za kubeleka bana babalume ba kutwesha kumiyeka ndi? 12Bokenunga kukwenu, ami na kulakale, kutwesha kuyekiwa kami nifwako. Hinge ndi nishili kulumbeza na kuhanganika ha bya kuyekiwa, hinge ndi shinga nikuyekiwa bene uno wushiku na kwikala na bana babalume, 13kati mu kutwesha kutatilila ngayi hantu banakulu ngayi mwanga bamiyeke ndi? Kati eshe shikamikwangisha kuyekiwa ku bantu bashenge ndi? Byo, enu bana bami, mu kulimuka ngayi shinengi shashikalu shikuma kukwami kupitakana kukwenu. Ndaba Nyambi ya Ngula unamfutulukili na kundwisha.”
14Niho batatikile kulila kami pe Olipa wazupezele mukowendi na kumushalisha. Niho abokele kukwabo, ngoboni Lute wamukakatilile. 15Pe Naomi wambile kuli Lute ngayi, “Mona, mukonzowobe unaboko ku bantu bendi naku banyambi bendi, pe yanga nendi.”
16Ngoboni Lute wakumbwile ngayi, “Hinga unkandamika ngayi nikushiye. Ndehe niye nobe. Nimwako oku ukaya nami nikonikaya, nimwako oku ukekala na nami niko nikekala. Bantu bobe bakenga bantu bami na Nyambi yobe ukenga Nyambi yami. 17Nimwako oku ukafwila nami niko nikafwila, pe kuyo niko nikafundiwa. Mwanga kashushwilo ka Nyambi ya Ngula kakabi kakeze hahami ndi nikwitabila shuma shamina kuntapulula kukwobe ndele lufu.”
18Oho Naomi amonene ngayi Lute unamukakatili, kaliha wambile shamina kami.
19Bayilenga wubili wabo hantu noho bakakumine ku Mbetelehema. Oho bakumine, baha munzi nimwabo bawahililile, pe bakazi bakomokele na kwamba ngayi, “Kati ou nengi Naomi ndi?”
20Naomi wakumbwile ngayi, “Hinga muntoya ngayi Naomi,#1:20 Naomi Mu Shiheblu Naomi likutontoloka ngayi “Ku wahilila.” ntoyenunga ngayi Mala#1:20 Mala: Kutontolola ngayi wululu. ndaba Nyambi Mpandashilanga unalulishi wumi wami. 21Oho nafumine kuno nekalile na byabingi, ngoboni Nyambi ya Ngula unambweshe mabokoboko. Shumangani mu kuntumbila ngayi Naomi oho Mpandashilanga unanyeneshe kami nantumini makando?”
22Eshe nisho abokele Naomi kufuma ku Mowambi na Lute, mukowendi wa Kamowambi. Bakumine ku Mbetelehema ha kutatika kwa kuteza luku.
Libuka Lya Kuyela © Bible Society of Zambia, 2020.