Zincimpi 27
27
1Hinga ulilundumika ha bya nzona,
ndaba kulimuka ebye eze bikatendiwe ha mutena uyo ufwako.
2Leha muntu washenge akuyemeze, kaliha obe mwine,
kufume ku muyeni, kaliha mukanwa kobe.
3Limanya lyenga lyalilemu, lihekelela kami lyalilemu
ngoboni eshe akushonkomona muntu wakuyeba shenga sha kulema kupitakana wubili wabyo.
4Wukali wenga nguma na kunongesha,
ngoboni kowa shinafwanikizi na lihungu.
5Shashiwahe kwambila muntu shintwantwa kupitakana,
shishemo sha kumuholamina.
6Bitombo bya muhoni wa muntu bilishiwahe,
kupitakana ku zupeza kwa mukankole.
7Wushi kaliha watobalanga ku muntu nekutu,
ngoboni ku muntu uli na nzala nebye byabilulu byenga byabitobe.
8Nehe kayoni ka shiyanga lihwa lyako,
na muntu washiyanga munzi wendi.
9Mazi na lukumba bya wahilishanga ku mutima,
ngoboni wukalu wamanishanga ku mwena.
10Ha shikati sha makalikiza hinga ukana muhoni wobe na muhoni wa batatiyobe oho ukushinga kuyavwiwa.
Kami hinga uya ku litala lya kawushinda wobe,
shashiwahe kuhenyena ku minobe uli nendi hahepi kupitakana kawushinda wobe uli kwakutali.
11Obe mwanami, yikala na ngana pe mutima wami ukawahilila,
ngayi nitweshe kukumbula baya ba kunyanca.
12Muntu wangana waholamanga ndi namono malamo,
ngoboni shibulangana ukuhenyenako pe hakwikala mu wukalu.
13Muntu nimwendi ukukulupisha kwimanina mukuli wa muyeni wakuyeba,
pe wafwanina kuyumba wuheti wendi nimwawo.
14Muntu ukutandalisha minendi na lizu lya kukangoka ku shikati sha lumenemene shikuma,
bakamutoya ngayi uli na kukutula.
15Mbuyama wa nkani,
wafweka ngo mvula wa muvumbi.
16Kukanisha mbuyama owe kunalifweke ngo kukanisha mpepo,
hinge kwinzalisha mazi a mema mu liboko lya shilyo.
17Shondo shikukumba shondo shimina,
kami muntu uku longesha minendi muntu.
18Muntu ukukobelela mutondo wa mukuyu, ukalya mikabo yawo,
kami muntu nimwendi ukulama hekulyendi ukatambula maleema.
19Ngonehe muntu alimonanga lupala lwendi ha shimboni,
na mutima wendi nisho wahololanga eshe ekala.
20Kalunga ka bafu na ngehena kukahuputuka bifwako,
ngonehe kami meho a muntu abulanga ku huputuka nanebye aku mona.
21Shiliva na ngolinde bayiyungululanga na mundilo,
kami muntu ba kumuyata na maleema aya akutambula ku bantu.
22Hinge ndi ukushimba mumba na kutwa wakuyeba hamo naheke mu nkunzu,
ngoboni wuleya wendi kukamumana wufwako.
23Kobelela shiwahe muhoko wa bambelele bobe,
hamo na matanga a zingombe zobe.
24Ndaba wuheti wabulanga kwihala mwaya myaka,
ngonehe matunga a kubula kutwesha kwikala kubikati nimwabyo?
25Oho mwila unayumu, kwamenanga wawupya,
pe mwila ukumena kunkumo ya mapili bakawukungwila hamo.
26Bambelele ba kukuletela bivwalo,
pe ha bampongo ukalandaho mfuba.
27Kami ukekala na mahwe a bampongo amengi,
a kulya hamo na bakalupashi lwobe na bakamilimo bobe babambuyama.
Libuka Lya Kuyela © Bible Society of Zambia, 2020.