Zincimpi 23

Kushiwulula 6

1Oho ukulya na shilolo,

penzeshesha shiwahe owo uli nendi ngayi nengi yani,

2ndi uli na nzala shikuma,

tula mutima mushali.

3Hinga uminina mate byakulya byabiwahe ebye anawahishi,

hamina binengi byakulya bya kushinga kukwezeka.

Kushiwulula 7

4Hinga ulipokwesha kushinga wuheti,

yikala na ngana za kufumishako mutima.

5Wuheti wobe ukatwesha kumana mu shikati shashishe,

ngo wuli na mbando za kutuka nehi ngonga.

Kushiwulula 8

6Hinga ulya byakulya bya muntu waku haka kulya,

kami hinga ulishoza byakulya byendi byabiwahe.

7Ndaba unengi ngo muntu ukukubeba mu mutima wendi na kwamba ngayi, “Lya na kunwa”

ngoboni mu mutima wendi muli byashenge.

8Ukaluka byakulya ebye unali na kuyandisha mazu obe amawahe akukambilila.

Kushiwulula 9

9Hinga wamba oho shibulangana ha yuvwilila,

ndaba ukalimbulula mazu obe a ngana.

Kushiwulula 10

10Hinga uhenyesha nginza ya ku shiya bashikale,

kami hinga wingina mu mafuba a banginga.

11Mukakuba kuliziza wabo wenga wa ngovu,

ukemanina shambo shabo na kukulwisha.

Kushiwulula 11

12Yaka mutima wobe ku nobyo ba kuku longesha,

kami matu wobe ayuvwilile ku kalimukisho.

Kushiwulula 12

13Hinga uleha ku shangamisha kanuke,

afwako kukafwa ndi ukamuzipola na lunyanzi.

14Ukapulwisha wumi wendi,

ndi ukumuzipolanga na lunyanzi.

Kushiwulula 13

15Mwanami, ndi mutima wobe ukwinga wangana,

nami kami mutima wami ukawahilila.

16Moyo wami ukatangala,

oho nikayuvwa hiwamba bya kupwisha.

Kushiwulula 14

17Hinga ulishoza bakawubi

ngoboni zamina kuyuvwila Nyambi ya Ngula bowa matena nimwawo.

18Mwa shikuma ukayoya shiwahe kumbili,

kami kulumbeza kwobe kufwako kukakwangana.

Kushiwulula 15

19Yuvwilila obe mwanami, kami yikala na ngana,

yaka mutima wobe mu nzila yayiwahe.

20Hinga ulifungila na bakakunwa shikuma waine,

hinge na bamutongo ba kuvwota byakulya shikuma,

21ndaba mukakunwa malovu shikuma na muntu wa mutongo bakenga bancepwe,

kami tulo twatwingi tukabaletesha ngayi bavwale bincancolo.

Kushiwulula 16

22Yuvwilila tatiyobe wakubelekele,

kami hinga ukenda mandiyobe oho wakulumpalakale.

23Lilandile kupwisha kami hinga ulandishakwo,

lilandile ngana na kufundiziza na ku yuvwishisha.

24Tata mwana wakulunga ukatangala shikuma,

muntu wa beleka mwana wangana ukawahilila mumwendi.

25Leha tatiyobe na mandiyobe benge ba ku wahilila,

leha mandiyobe wakubelekele atangale.

Kushiwulula 17

26Obe mwanami nyuvwilile shiwahe,

kami konkezeka zinzila zami.

27Ndaba mukazi walwiholwiho wenga liteke lya kunonka,

mbuyama wa mwendela wenga lishima lya kushinana.

28Wabelaminanga ngo lingwangwa,

wavulishanga kuluwa mukati ka balume.

Kushiwulula 18

29Yani uli na wukalu? Yani uli na wunginga?

Yani uli na mangunga? Yani uli na manyengo?

Yani uli na bitombo bya kubula mulandu? Yani uli na meho a kufubila?

30Babengi obo ba kutalyangila na waine,

obo bakwezeka kuya na kunwa kushinga kufungila waine.

31Hinga ulishoza waine oho yahokakale,

oho yikubila munkomoki na kupita ha mulivu shiwahe.

32Ku mamaninino ahumananga ngo liyoka,

kami ali na wuhungu ngo mpili.

33Meho wobe akamona byashenge,

ukamba byuma bya kubula ku fwanina.

34Ukafweka ngo muntu uli hakati ka mankanyi a liwate,

ngonehe muntu nalangana ku ntongo ya wato wawunene.

35“Bakamuyaha ngoboni ukamba ngayi, ‘Shilolo nilemane.’

Bakamukama ngoboni ukamba ngayi, ‘Kuyuvwa kukola nifwako,

nikapinduka mwaka ngani?

Niye na kunwa kami.’”

Mụtakwuo maka Libuka Lya Kuyela

Zincimpi 23

Amaokwu Akwụkwọ Nsọ Ndị Ama Ama siteré na Zincimpi 23

Amaokwu Akwụkwọ Nsọ Ndị Ama Ama siteré na
Zincimpi 23